MNP ၊ ဩဂုတ် ၂၅
ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့နယ်တွင် ဆီထွက်သီးနှံဖြစ်သည့် မိုးနှမ်းစိုက်ပျိုးမှုမှာ ယခင်နှစ်ထက် မိုးနှမ်းတိုးချဲ့ စိုက်ပျိုးမှုရှိသော်လည်း မိုးရွာသွန်းမှုများခြင်းကြောင့် မိုးနှမ်းစိုက်တောင်သူများ အခက်ကြုံဖွယ်ရှိကြောင်း တောင်သူများထံမှ သိရသည်။
နှမ်း အထွက်နှုန်းကောင်းရေးအတွက် မျိုးကောင်းမျိုးသန့်များဖြစ်သည့် ဆင်းရတနာ-၃၊ ဆင်းရတနာ-၄၊ ဆင်းရတနာ-၁၂၊ ဆင်းရတနာ-၁၄ မျိုးများကို စိုက်စနစ်မှန်ကန်စွာ တစ်ဧကလျှင် (၂) ပြည်မှ (၃) ပြည်နှုန်း၊ နွားချေး၊ မြေဆွေး (၅) စီးမှ (၆) စီး၊ ပုလဲ (၁၆) ပြည်၊ တီစူပါ (၁၆) ပြည်၊ ပိုတက် (၈) ပြည် မြေပြုပြင်ချိန်ထည့်၍ နှမ်းလျှင်မျိုးကို ပင်ကြားတန်းကြား (၁၂×၄) လက်မ၊ နှမ်းကြီးမျိုးကို ပင်ကြားတန်းကြား (၁၈×၄) လက်မဖြင့် စိုက်ပျိုးရကြောင်း၊ အဖူးဝင်ချိန် ပုလဲမြေသြဇာ (၈) ပြည်ထပ်ကျွေး၍ အဖူးဝင်ချိန်နှင့် နှမ်းသီးချိန်တွင် အစိုဓါတ်လုံလောက်အောင်ထားရကြောင်း စိုက်ပျိုးရေးဦးစီးဌာနမှ သိရသည်။
ဖြူးမြို့နယ်အတွင်း ဆီထွက်သီးနှံဖြစ်သည့် မိုးနှမ်းကို မေလမှစတင်စိုက်ပျိုးခဲ့ရာ (၂၂၈) ဧကထိ တိုးချဲ့စိုက်ပျိုးခဲ့သော်လည်း ရာသီဥတုအခြေအနေကြောင့် အထွက်နှုန်း နည်းနိုင်ကြောင်း၊ ဆောင်းရာသီတွင် ဆောင်းနှမ်းများကို စိုက်ပျိုးမှုဧကပိုမိုများပြားစွာ စိုက်ပျိုးလေ့ရှိပြီး အထွက်နှုန်းပိုကောင်းကြောင်း သိရသည်။
နေမျိုးလွင်
https://t.me/MyanmarNationalPost
No comments:
Post a Comment