ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း CGTN ရုပ်သံဌာနမှ တွေ့ဆုံမေးမြန်းမှုများကို ဖြေကြား

၁၅-၈-၂၀၂၃ ရက်နေ့မှ ၁၈-၈-၂၀၂၃ ရက်နေ့အထိ တရုတ်ပြည်သူ့သမ္မတနိုင်ငံ ယူနန်ပြည်နယ် ကူမင်းမြို့၌ ကျင်းပသည့် (၇) ကြိမ်မြောက် တရုတ် - တောင်အာရှပြပွဲ၊ (၂၇) ကြိမ်မြောက် တရုတ် (ကူမင်း) ပို့ကုန်၊ သွင်းကုန် ကုန်စည်ပြပွဲဖွင့်ပွဲ၊ ၂၀၂၃ ခုနှစ် မဟာမဲခေါင်ဒေသခွဲ စီးပွားရေးစင်္ကြံအုပ်ချုပ်သူများဖိုရမ်နှင့် ဆက်စပ်အစည်းအဝေးများသို့ တက်ရောက်ရန် ကူမင်းမြို့၌ရောက်ရှိနေသည့် ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်းသည် ခရီးစဉ်အတွင်း ၁၈-၈-၂၀၂၃ ရက်နေ့ ညနေပိုင်းက China Global Television Net (CGTN) နှင့် တွေ့ဆုံ၍ မေးမြန်းမှုများကို ဖြေကြားခဲ့ပါသည်။ အဆိုပါ တွေ့ဆုံ မေးမြန်းမှုများကို CGTN တွင်လည်းကောင်း၊ ၂၄-၈-၂၀၂၃ ရက်နေ့တွင် မြန်မာ့ရုပ်မြင်သံကြားကလည်းကောင်း ထုတ်လွှင့်ခဲ့ပါသည်။ အဆိုပါတွေ့ဆုံမေးမြန်းမှု အပြည့်အစုံမှာ အောက်ပါအတိုင်းဖြစ်ပါသည်။

မေး ။    ။ Belt and Road အဆိုပြုချက်ကို အများသိရှိအောင် ဆောင်ရွက်ရာမှာ မီဒီယာပူးပေါင်းဆောင်ရွက်မှုက အရေးပါတဲ့ အခန်းကဏ္ဍကနေ ပါဝင်နေပါတယ်။ တချို့အနောက်တိုင်းနိုင်ငံက Belt and Road ကို နာမည်ဖျက်ခြင်းနဲ့ တရုတ်နိုင်ငံပုံရိပ်ကို နာမည်ပျက်အောင် လုပ်တာကြောင့် တရုတ်-မြန်မာနှစ်နိုင်ငံ ပြည်သူတွေကြား အထင်လွဲမှုအများအပြား ဖြစ်စေခဲ့ပါတယ်။ တရုတ်-မြန်မာ ချစ်ကြည်ရင်းနှီးစွာ ပူးပေါင်းဆောင်ရွက်မှုကို အတူတကွမြှင့်တင်ဖို့ မြန်မာပြည်သူတွေက Belt and Road အဆိုပြုချက်အပေါ် နားလည်သိရှိမှုကို ဘယ်လိုတိုးမြှင့်နိုင်မယ်လို့ ထင်ပါသလဲ။ မီဒီယာက ဒေသတွင်းတည်ငြိမ်အေးချမ်းမှု၊ ဖွံ့ဖြိုးတိုးတက်မှုနဲ့ စည်ပင်ဝပြောမှု ထိန်းသိမ်းရေးအတွက် ပိုအကျိုးရှိတဲ့ လူထုသဘောထား ပတ်ဝန်းကျင်ဖန်တီးရာမှာ ဘယ်လိုအခန်းကဏ္ဍကနေ ပါဝင်နိုင်မယ်လို့ ယူဆပါသလဲ။

ဖြေ ။ ။ Belt and Road ဆိုတာကတော့ အဓိကကတော့ ယဉ်ကျေးမှုနဲ့ ပြည်သူတွေရဲ့ အပြန်အလှန်ဆက်ဆံမှု၊ ယဉ်ကျေးမှုတွေနဲ့ နက်ရှိုင်းကျယ်ဝန်းတဲ့ ကဏ္ဍကြီးပါပဲ။ အဲဒီတော့ ဒါကိုအကျိုးရှိအောင် အသုံးချမယ်ဆိုရင် အားလုံးအတွက် ကောင်းမွန်တဲ့ လုပ်ငန်းစဉ်ကြီးတစ်ခုပါ။ ကျွန်တော့်အနေနဲ့ ကမ္ဘာ့ကုလသမဂ္ဂကို ရောက်သွားတဲ့အခါမှာ အသားရောင်မခွဲခြားဘဲနဲ့ ကမ္ဘာကြီးဟာ ရွာကြီးလိုပဲ တကယ့်လူသားတွေ အားလုံးဟာ ကမ္ဘာကြီးပေါ်မှာ ရပ်တည်တယ်ဆိုတဲ့ အနေအထားကို တွေ့ခဲ့ရပါတယ်။ တစ်နိုင်ငံချင်း တစ်နိုင်ငံချင်း၊ နိုင်ငံတိုင်း နိုင်ငံတိုင်းဟာ ပူးပေါင်းဆောင်ရွက်မယ်ဆိုရင် ကမ္ဘာကြီးဟာ၊ လူသားတွေနေထိုင်တဲ့ ကမ္ဘာကြီးဟာ ပိုမိုပြီးတော့မှ တည်ငြိမ်ပြီးဖွံ့ဖြိုးတိုးတက်တဲ့ အခန်းကဏ္ဍတစ်ခုဖြစ်မယ်လို့ ယုံကြည်ပါတယ်။

အဲဒီတော့ Belt and Road နဲ့ပတ်သက်လို့ ကျွန်တော်တို့နိုင်ငံအနေနဲ့ စိတ်ဝင်စားပါတယ်၊ ပူပေါင်းပါဝင်ဖို့လည်း ဆန္ဒရှိပါတယ်။ နေ့ခင်းကကူမင်းမြို့ထဲမှာ လေ့လာရေးခရီးစဉ် ထွက်တဲ့ အခါမှာ ကမ္ဘာပေါ်မှာ တတိယအကြီးဆုံးလို့ပြောတဲ့ ဈေးကြီး၊ အဲဒီဈေးကြီးကို ရောက်ခဲ့သလိုပန်းတွေကို ဖြန့်ချိတဲ့နေရာကိုလည်း ရောက်ခဲ့ပါတယ်။ ဒါတွေဟာ အိမ်နီးနားချင်းနိုင်ငံတွေ၊ နောက်ကမ္ဘာကြီးကိုပါ ပြန့်သွားမယ်ဆိုတော့ ဒါတကယ်ကောင်းမွန်တဲ့ စီးပွားရေးလုပ်ငန်းတစ်ခုပါ။ ဒီလိုပါပဲ မြန်မာနိုင်ငံရဲ့ ထုတ်ကုန်ပစ္စည်းတွေကို ပြည်ပနိုင်ငံတွေထံ ပို့ဆောင်ခြင်းအားဖြင့်၊ ဒီကပစ္စည်းတွေကိုလည်း ကျွန်တော်တို့နိုင်ငံကို ပို့ဆောင်ခြင်းအားဖြင့် နှစ်နိုင်ငံပြည်သူတွေဟာ စားဝတ်နေရေးတွေ ပြေလည်လာမယ်၊ အဆင့်အတန်းတွေ မြင့်လာမယ်လို့ ယုံကြည်ပါတယ်။

ယနေ့နိုင်ငံတော်အကြီးအကဲ ဗိုလ်ချုပ်မှူးကြီးမင်းအောင်လှိုင်အနေနဲ့လည်း အသေးစား၊ အငယ်စား၊ အလတ်စား စက်မှုလုပ်ငန်းတွေကို အထူးအလေးထား ဆောင်ရွက်နေပါတယ်။ ပြည်တွင်းမှာတင် ဖူလုံဖို့နဲ့ ပိုလျှံရင်ပြည်ပကို ပို့မှာပါ။ အဲဒီလိုဆောင်ရွက်တဲ့အခါမှာ ဗိုလ်ချုပ်မှူးကြီးအနေနဲ့ အမျိုးသားရေး ရည်မှန်းချက်နှစ်ခု ထားပါတယ်။ အဲဒါက တိုင်းပြည်သာယာဝပြောရေးနဲ့ စားရေရိက္ခာဖူလုံရေးဆိုတာကို အဓိကထားပါတယ်။ တိုင်းပြည် သာယာဝပြောရေးဆိုတဲ့ အခန်းကဏ္ဍကအများကြီး ကျယ်ပြန့်ပါတယ်။ နှစ်နိုင်ငံမှာရှိတဲ့ ပြည်သူပြည်သားတွေ အားလုံးဟာ စားဝတ်နေရေးမှာ အစားအသောက်ရော၊ အဝတ်အစားရော၊ အနေအထိုင်ရော၊ သွားရေးလာရေးရော တိုင်းပြည်သာယာဝပြောတယ်ဆိုတာတော့ ကဏ္ဍကကြီးကျယ်ပါတယ်။ ဒါတွေက ဗိုလ်ချုပ်မှူးကြီးရဲ့ အမျိုးသားရေးရည်မှန်းချက်၊ ပထမရည်မှန်းချက် တစ်ခုပေါ့။ ဒီရည်မှန်းချက်ကို ဆောင်ရွက်တဲ့အခါ နိုင်ငံတော်ဖွံ့ဖြိုးတိုးတက်ဖို့ဆိုရင် စီးပွားရေးကောင်းမွန်ဖို့လိုတယ်။ ပြီးရင်တည်ငြိမ်ဖို့လိုတယ်။ ဒီ Belt and Road အစီအစဉ်ကြီးက မှန်မှန်ကန်ကန်သုံးသပ်မယ်ဆိုရင် နှစ်နိုင်ငံချစ်ကြည်ရေးရော၊ နောက်တစ်ခါ ကမ္ဘာကြီးအတွက်ရော ထိရောက်မှုရှိတဲ့ အခန်းကဏ္ဍကြီးတစ်ခုပါ။ ကျွန်တော်တို့နိုင်ငံအနေနဲ့လည်း အကျိုးရှိမယ်။ နောက်တရုတ်နိုင်ငံ အနေနဲ့လည်း အကျိုးရှိမယ်။ နှစ်နိုင်ငံအစိုးရချင်းလည်း အကျိုးရှိမယ်။ နှစ်နိုင်ငံပြည်သူတွေလည်း အကျိုးရှိမယ်ဆိုတော့ Belt and Road အစီအစဉ်က ကောင်းမွန်တဲ့အစီအစဉ် များပါတယ်။ ဒါကြောင့်ကျွန်တော်တို့အနေနဲ့တော့ ဒီကဏ္ဍမှာလည်း ပါဝင်ပူးပေါင်းဖို့ ဆန္ဒရှိပါတယ်၊ ဒါကိုလည်း အထူးပဲစိတ်ဝင်စားတယ်လို့ ပြောပါရစေ။

မေး ။    ။အခုနှစ်မှာ သမ္မတရှီကျင့်ဖျင်က ကမ္ဘာလုံးဆိုင်ရာ လူမှုယဉ်ကျေးမှုအစီအမံ အဆိုပြုခဲ့ပြီးတော့၊ မတူညီတဲ့ လူမှုယဉ်ကျေးမှုတွေ အပြန်အလှန်လက်ခံပြီးတော့ အတူယှဉ်တွဲတည်ရှိခြင်းနဲ့ ကူးလူးဖလှယ်အပြန်အလှန် အတုယူခြင်းက လူနေမှုအဖွဲ့အစည်း ခေတ်မီမှုဖြစ်စဉ် စည်ပင်ဝပြောတဲ့ ကမ္ဘာ့လူမှုယဉ်ကျေးမှု ဥယျာဉ်ကြီးဖော်ဆောင်ရာမှာ အစားထိုးမရတဲ့ အခန်းကဏ္ဍကနေ ပါဝင်နေတဲ့အကြောင်း အလေးထားပြောကြားခဲ့ပါတယ်။ ဒီအစီအမံကိုရော ဝန်ကြီးအနေနဲ့ ဘယ်လိုနားလည်ပါသလဲရှင့်။ မီဒီယာကနှစ်နိုင်ငံအကြား ယဉ်ကျေးမှုဆိုင်ရာ ကူးလူးဖလှယ်မှု မြှင့်တင်ရေးမှာလည်း ဘယ်လိုအခန်းကဏ္ဍကနေ ပါဝင်နိုင်ပါမလဲ၊ မီဒီယာကို နှစ်နိုင်ငံပြည်သူတွေ အပြန်အလှန် နားလည်သိရှိရင်းနှီးစေတဲ့ ပေါင်းကူးတံတားဖြစ်လာအောင် ဘယ်လိုဆောင်ရွက်နိုင်မယ်လို့ ယူဆပါသလဲ။

ဖြေ။ ။တရုတ်နိုင်ငံနဲ့ မြန်မာနိုင်ငံက နှစ်ပေါင်းများစွာ ချစ်ကြည်ရင်းနှီးစွာ နေထိုင်လာခဲ့တဲ့ အိမ်နီးချင်းနိုင်ငံတွေဖြစ်ပါတယ်။ အခုဆိုရင် ဆွေမျိုးပေါက်ဖော် ချစ်ကြည်ရေးအဆင့်ကို ရောက်ပြီးတော့မှ ထဲထဲဝင်ဝင်နှစ်နိုင်ငံ ချစ်ကြည်ရေးကိုလည်း တိုးမြှင့်လျက်ရှိပါတယ်။ ကျွန်တော်တို့နိုင်ငံမှာ “အမျိုးသားကဇာတ်ရုံ” ဆိုရင်လည်း တရုတ်နိုင်ငံက ဆောင်ရွက်ပေးထားတာ ဖြစ်ပါတယ်။ နောက်တစ်ခါ “သုဝဏ္ဏအားကစားကွင်း” ကိုလည်း တရုတ်နိုင်ငံကပဲ စီမံဆောင်ရွက်ပေးထားတာ ဖြစ်ပါတယ်။ အခုဆိုရင် ကျွန်တော်တို့ နိုင်ငံတော်စီမံအုပ်ချုပ်ရေးကောင်စီ အနေနဲ့ တချို့စီမံကိန်းတော်တော်များများကိုလည်း တရုတ်နိုင်ငံရဲ့အကူအညီနဲ့ ပူးပေါင်းဆောင်ရွက်ဖို့ ညှိနှိုင်းလျက်ရှိပါတယ်။

Art Center (အနုပညာ ဗဟိုဌာန)၊ နောက်ပြီးတော့ “ဝဇီရာရုပ်ရှင်ရုံ” ပေါ့။ ဒါကို နိုင်ငံတော်အနေနဲ့ “National Red Carpet Theatre” အဖြစ်သတ်မှတ်ပြီး တရုတ်နိုင်ငံရဲ့ အထောက်အပံ့နဲ့ပြုပြင်ဖို့ စီမံလျက်ရှိပါတယ်။ “ဖလင်ပိဋကတ်တိုက်” လည်း ပါဝင်ပါတယ်။ ယဉ်ကျေးမှုနဲ့ နှစ်နိုင်ငံအပြန်အလှန် ချစ်ကြည်ရေးအတွက် ဒါတွေကို ကမ်းလှမ်းထားတာရှိပါတယ်။ ကျွန်တော်တို့အနေနဲ့ကတော့ နှစ်နိုင်ငံပြည်သူတွေဟာ အိမ်နီးနားချင်းလည်းဖြစ်တဲ့အတွက် … ဘာပဲပြောပြော နှစ်နိုင်ငံ ပြည်သူတွေ အမြင်တွေရှင်းကြမယ်ဆိုရင် အစိုးရချင်းလည်း အမြင်ရှင်းမယ်၊ ပြီးရင် အိမ်နီးနားချင်းဖြစ်တဲ့အတွက် “အိမ်သာမှ ဧည့်လာမှာပေါ့”။ ကိုယ့်ဘေးနားက အိမ်နီးနားချင်းက အားနည်းမှု ရှိတယ်ဆိုရင် အားသာတဲ့ အိမ်နီးနားချင်းနိုင်ငံကြီးက ကူညီရမှာပေါ့။ ဒီလိုပါပဲတစ်ဖက်ကနိုင်ငံကြီးမှာ ပြဿနာဖြစ်တယ်ဆိုရင်လည်း ကျွန်တော်တို့နိုင်ငံက အိမ်နီးနားချင်းတွေလို ကူညီရမှာပေါ့။

သမ္မတကြီး ရှီကျင့်ဖျင်ရဲ့ ပေါင်းစည်းရေးလုပ်ငန်းတွေကိုလည်း ကျွန်တော်တို့အနေနဲ့ အထူးပဲ အလေး အနက်ထားပါတယ်။ ကျွန်တော်တို့နိုင်ငံကို အတတ်နိုင်ဆုံး တည်ငြိမ်မှုရှိအောင်လည်း နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်အနေနဲ့ အထူးပဲကိုယ်စွမ်းဉာဏ်စွမ်းရှိသရွှေ့ နေ့မအား၊ ညမနား ဆောင်ရွက်လျက်ရှိပါတယ်။ လာမယ့်ကာလတွေမှာတော့ သမ္မတကြီးရှီကျင့်ဖျင် မျှော်မှန်းတဲ့ နှစ်နိုင်ငံချစ်ကြည်ရေးတွေ၊ အပြန်အလှန် ယဉ်ကျေးမှုဖလှယ်တာတွေ အဲဒါအပြင် အခုဆိုရင် ကျွန်တော်တို့ ကူမင်းမှာကျင်းပတဲ့ ကုန်စည်ပြပွဲကြီးကို ပြည်ထောင်စုဝန်ကြီးသုံးဦးကို စေလွှတ်ပြီးတော့မှ တက်ရောက်စေတာဟာ ဒါကဘာကိုဖော်ပြသလဲဆိုရင် တရုတ်နိုင်ငံအပေါ်မှာ မြန်မာနိုင်ငံရဲ့ အလေးထားမှုကို ဖော်ပြတဲ့သဘောပါပဲ။

ကျွန်တော်တို့ ပြည်ထောင်စုဝန်ကြီးသုံးဦးဟာ စီးပွားရေးကဏ္ဍတွေ၊ လူမှုရေးကဏ္ဍတွေ၊ ပြီးရင်အခုမီဒီယာကဏ္ဍမြှင့်တင်ဖို့၊ ထဲထဲဝင်ဝင်ပူးပေါင်းဆောင်ရွက်ဖို့ နိုင်ငံတော်ဝန်ကြီးချုပ်က စေလွှတ်လိုက်တာ ဖြစ်ပါတယ်။ လာမယ့်ကာလတွေမှာ နှစ်နိုင်ငံချစ်ကြည်ရေးက ပိုပြီးတော့ အရှိန်မြှင့် ပါမယ်။ မြှင့်တင်တဲ့အခါ မီဒီယာကဏ္ဍအနေနဲ့လည်းပါဝင်မှာ ဖြစ်ပါတယ်။ မီဒီယာဆိုတာတော့ အင်မတန်ကျယ်ပြန့်ပါတယ်။ ပူးပေါင်းဆောင်ရွက် သွားမယ်ဆိုရင် အိမ်နီးနားချင်းနှစ်နိုင်ငံကြား ချစ်ကြည်ရင်းနှီးမှုတိုးတက်ပြီး နှစ်နိုင်ငံလုံး တည်ငြိမ်တိုးတက်တဲ့ အနာဂတ်ကို မလွဲမသွေရောက်မယ်လို့ ယုံကြည်ပါတယ်။

မေး ။    ။ တရုတ်-မြန်မာ နှစ်နိုင်ငံမီဒီယာက Belt and Road ၊ လန်ချန်း-မဲခေါင် ပူးပေါင်းဆောင်ရွက်မှုစတဲ့ ယန္တရားတွေအောက်မှာ ဘယ်လိုရလဒ်တွေ ရရှိခဲ့ပါသလဲ။ ဆက်သွယ်ရေး နည်းပညာအမျိုးအစားတွေ စုံလင်လာတာနဲ့အမျှ မီဒီယာကလည်း Digital အဖြစ် ပြောင်းလဲလာပါတယ်။ နှစ်နိုင်ငံမီဒီယာဆန်းသစ်တီထွင် ပူးပေါင်း ဆောင်ရွက်တဲ့ အနာဂတ်အလားအလာက ဘယ်လိုဖြစ်နိုင်ပါသလဲ။ နှစ်နိုင်ငံမီဒီယာပူးပေါင်း ဆောင်ရွက်မှုအပေါ် ဝန်ကြီးအနေဖြင့် ဘယ်လိုမျှော်လင့်ချက်တွေ ရှိပါသလဲ။

ဖြေ ။    ။ အခုခေတ်အခါမှာ မီဒီယာကကမ္ဘာကြီးကို လွှမ်းခြုံထားတယ်လို့ ပြောလို့ရပါတယ်။ ကမ္ဘာကြီးကရွာကြီး ဖြစ်လာနေပြီ။ ယနေ့ဘယ်နေရာမှာ ဘာဖြစ်တယ်ဆိုတာကို ကမ္ဘာပေါ်မှာနေထိုင်တဲ့ လူသားတိုင်းက ချက်ချင်းသိနေနိုင်တယ်။ မီဒီယာက အလွန်မြန်တယ်။ ဟိုးအရင်တုန်းကဆိုရင်တော့ ဒီလိုစနစ်တွေ မရှိသေးတဲ့အခါကျတော့ ကိုယ့်နိုင်ငံထဲမှာကို မနီးမဝေးမှာ ဘာဖြစ်တယ်ဆိုတာ မသိရဘူး။ အခုကျတော့ ဟိုး… ကမ္ဘာအစွန်းဆုံးမှာရှိတဲ့နိုင်ငံတွေ အခုဖြစ်တဲ့ဒီ Current Situation ပေါ့။ လက်ရှိအနေထားကိုတောင်မှ အချိန်နဲ့တစ်ပြေးညီသိရတယ်။ ဒီအွန်လိုင်းခေတ်၊ အင်တာနက်ခေတ်ကြီးက အတော်ကျယ်ပြန့်တယ်။ မီဒီယာဟာ ဒီလိုကျယ်ပြန့်တဲ့အခါမှာအလွန်ကို အရေးကြီးတဲ့ကဏ္ဍကို ရောက်လာပြီ။

မြန်မာနိုင်ငံကိုပဲ ပြန်ကြည့်မယ်ဆိုရင်ဒီနေ့ မီဒီယာကြီးတွေရဲ့ လွှမ်းမိုးမှုက တော်တော်လေးကို ထဲထဲဝင်ဝင်နဲ့နိုင်ငံရဲ့ အခြေအနေကို၊ တိုးတက်မှုကို နှောင့်နှေးအောင် လုပ်တာတွေလည်း တွေ့ရတယ်။ ဆိုလိုတဲ့ သဘောကတော့ သတင်းတု၊ သတင်းမှားတွေကြောင့်ပါ။ မြန်မာနိုင်ငံမှာ လက်ရှိဖြစ်ပေါ်နေတဲ့ သတင်းအမှန်တွေကို အိမ်နီးချင်းနိုင်ငံတွေရော၊ ကမ္ဘာ့နိုင်ငံတွေ အားလုံးကို မသိရအောင်လို့ နည်းပညာနဲ့ဖြစ်စေ၊ တခြားနိုင်ငံရေးနည်းလမ်းတွေနဲ့ဖြစ်စေ ဖုံးလွှမ်းပြီးတော့ မဟုတ်တဲ့သတင်းတု၊ သတင်းမှားတွေကိုပဲ ကမ္ဘာ့နိုင်ငံအသီးသီးကို ရောက်အောင်လို့ တချို့သောနိုင်ငံကြီးတွေက စီမံဆောင်ရွက်နေတာကို တွေ့ရပါတယ်။ ဒီတော့ ဝမ်းနည်းဖွယ်ရာလို့ပဲ ပြောရမှာပါ။

အမှန်တကယ် ပကတိမြန်မာနိုင်ငံရဲ့ အနေအထားကို ပြည်ပနိုင်ငံတွေက မသိတဲ့အခါ အထင်အမြင်လွဲမှားမှုတွေ၊ နားလည်မှုတွေ၊ ယုံကြည်မှုတွေ လျော့ပါးတဲ့အခါမှာ နှစ်နိုင်ငံဆက်ဆံရေးတွေ၊ ချစ်ကြည်ရေးတွေကလည်းတကယ့်ကို လျော့ပါးစေတာကို တွေ့ရတယ်။ ဒါကြောင့် ယနေ့မီဒီယာဟာ အရေးကြီးတဲ့ အခန်းကဏ္ဍကိုရောက်လာပြီ။ ကျွန်တော်တို့ ပြန်ကြားရေးဝန်ကြီးဌာနအနေနဲ့ ဆိုရင်အတတ်နိုင်ဆုံး သတင်းတု၊ သတင်းမှားတွေကို ချေဖျက်ပြီးတော့ သတင်းအမှန်တွေကို ပြည်သူတွေသိအောင် နိုင်ငံအတွင်းမှာတော့ အတိုင်းအတာတစ်ခုအထိ ဆောင်ရွက်နေနိုင်ပြီ ဖြစ်ပါတယ်။ သို့သော်လည်း ပြည်ပနိုင်ငံအသီးသီးကို ရောက်ရှိဖို့လိုနေသေးတယ်။

ဒါကြောင့် ယနေ့ ဒီတရုတ်နိုင်ငံရဲ့ကူမင်းမြို့ကို ရောက်တဲ့အခါမှာတော့ ဒီမှာရှိတဲ့ YMG အဖွဲ့နဲ့လည်း အခုပူးပေါင်းဆောင်ရွက်ဖို့ သဘောတူညီတဲ့ အနေအထားရှိပါတယ်။ MoU ကတော့ အဆင့်ဆင့်သွားရမှာပေါ့။ အခုဆွေးနွေးထားပြီး ဖြစ်ပါတယ်။ အပြန်အလှန် သတင်းတွေဖလှယ်ဖို့ စီစဉ်ထားပါတယ်။ နောက်တစ်ခါ CMG ပေါ့နော်။ CMG နဲ့လည်း MoU ထိုးဖို့အဆင့် စီမံဆောင်ရွက်နေပြီဖြစ်ပါတယ်။ နောက်ယူနန်မှာရှိတဲ့ Yunan TV နဲ့လည်း ထဲထဲဝင်ဝင် နှစ်ဦးသဘောတူ တွေ့ဆုံပြီးရင် နံပါတ်(၁)ကတော့ သတင်းဖလှယ်မယ်။ နံပါတ်(၂)ကတော့ အပြန်အလှန်သွားလာ၊ အပြန်အလှန် လေ့လာကြမယ်။ ကျွန်တော်တို့နိုင်ငံရဲ့ မီဒီယာအနေအထား ကိုလည်း ဒီဘက်က လေ့လာပြီးရင် လိုအပ်တာတွေကို ကူညီဆောင်ရွက်ပေးနိုင်အောင် ဖြစ်ပါတယ်။ ပြီးတော့ “Entertainment” အပိုင်း၊ “Entertain-ment” ဆိုတော့ ယဉ်ကျေးမှုနဲ့ ဆိုင်သွားတယ်။ ကူမင်းမှာရှိတဲ့ တရုတ်နိုင်ငံသူ နိုင်ငံသားများရဲ့ ယဉ်ကျေးမှုတွေ ဓလေ့၊ အလေ့အထတွေ၊ နောက် ဇာတ်လမ်းတိုတွေ၊ ဇာတ်လမ်းတွဲတွေကို ကျွန်တော်တို့ပြည်သူတွေ ကြည့်ခြင်းအားဖြင့် တရုတ်နိုင်ငံရဲ့ယဉ်ကျေးမှု၊ တရုတ်နိုင်ငံသူ နိုင်ငံသားတွေရဲ့ သဘောသဘာဝတွေကို ခံစားရတယ်။ ဒီလိုပဲမြန်မာနိုင်ငံက ရိုက်တဲ့ ဇာတ်လမ်းတွဲတွေ၊ မြန်မာ့ယဉ်ကျေးမှုတွေကို ဒီဘက်ကို အပြန်အလှန် ပို့ပေးခြင်းအားဖြင့်လည်း တရုတ်နိုင်ငံသူ နိုင်ငံသားတွေအနေနဲ့ မြန်မာနိုင်ငံရဲ့ တိုင်းရင်းသား ပေါင်းစုံပါဝင်တဲ့ မြန်မာ့လူမျိုးတွေရဲ့ ဓလေ့စရိုက်ကို သိရပါမယ်။ လူဆိုတာက ပုဂ္ဂိုလ်မင်မှ လုပ်ငန်းတွေက ပိုပြီးတိုးတက် အောင်မြင်ပါတယ်။ အဲဒီတော့ လူပုဂ္ဂိုလ်ဆိုတာနှစ်နိုင်ငံ ပြည်သူအချင်းချင်း အပြန်အလှန် နားလည်မှုရှိကြမယ်ဆိုရင် ဘာပဲ ပြောပြော ယဉ်ကျေးမှုတွေ တိုးလာတာနဲ့အမျှ နှစ်နိုင်ငံအစိုးရအချင်းချင်း ဆက်ဆံမှုတွေကလည်း ပိုပိုပြီးတော့ ချစ်ကြည်ရင်းနှီးမှုတွေက နီးကပ်လာမှာ ဖြစ်ပါတယ်။

ကျွန်တော်တို့အနေနဲ့တော့ အိမ်နီးချင်းနိုင်ငံဖြစ်တဲ့ တရုတ်နိုင်ငံရဲ့ အကူအညီနဲ့ ယနေ့ကျွန်တော်တို့နိုင်ငံရဲ့ သတင်းအမှန်တွေကို ကမ္ဘာကြီးသိအောင်၊ ကျွန်တော်တို့က သတင်းတု တွေ၊ သတင်းအမှားတွေကို မပေးပါဘူး။ တကယ့်ကို ပကတိဖြစ်ရပ်မှန် သတင်းအမှန်တွေ၊ နိုင်ငံတော် အစိုးရက စိစစ်ထားပြီးသား သတင်းအမှန်တွေကို တရုတ်မီဒီယာတွေကနေ ကမ္ဘာကြီးကို ဖြန့်ကြက် ခြင်းအားဖြင့် မြန်မာနိုင်ငံရဲ့ ပကတိအခြေအနေမှန်တွေကို ကမ္ဘာကပိုမိုသိရှိပြီးမှ အနာဂတ်မှာ ကျွန်တော်တို့နိုင်ငံရဲ့ တည်ငြိမ်မှု၊ တိုးတက်မှုတွေကို အနှေးနဲ့အမြန် ရောက်လာမယ်လို့ ယုံကြည်ပါတယ်။

ဒီကူမင်းမြို့ကို ရောက်လာခြင်းဟာ ကျွန်တော့်အတွက် အထူးပဲရင်ထဲမှာ ကျေနပ်ပီတိဖြစ်မိပါတယ်။ ယနေ့မီဒီယာကဏ္ဍဆက်ဆံမှုဟာ တကယ့်ကို အရှိန်မြှင့်တဲ့ အနေအထားကိုလည်း တွေ့ရတယ်။ အပြန်အလှန် ယုံကြည်မှုတွေ၊ နားလည်မှုတွေလည်း ရှိနေတဲ့အခါ ကျွန်တော် ဒီကပြန်သွားပြီးရင် နောက်ပိုင်းမှာ ဒီထက်ပိုမိုပြီးတော့မှ နီးစပ်တဲ့၊ နီးကပ်တဲ့ မီဒီယာဆက်ဆံရေးနဲ့ မြန်မာနိုင်ငံနဲ့ တရုတ်နိုင်ငံအပါအဝင် ဒေသကြီးတစ်ခုလုံးရောက်ဖို့ မီဒီယာနည်းလမ်းနဲ့ တတ်နိုင်သရွေ့ ပူးပေါင်း ဆောင်ရွက်သွားမယ်လို့ ပြောချင်ပါတယ်။

အခုလိုဖြေကြားပေးတဲ့အတွက် ပြည်ထောင်စုဝန်ကြီးကို ကျေးဇူးအများကြီး တင်ပါတယ်။

#MyanmarNationalPost