MNP ၊ အောက်တိုဘာ ၃
မွန်ပြည်နယ်၊ သထုံမြို့နယ်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် အခြေခံပညာဦးစီးဌာနတို့ပူးပေါင်း၍ ကျောင်းသားကျောင်းသူများ ဗလငါးတန်ဖွံ့ဖြိုးရေး လူငယ်အသိပညာပေးဟောပြောပွဲကို ယနေ့၊ နံနက်(၁၀)နာရီအချိန်ခန့်က အမှတ်(၃)အခြေခံပညာအထက်တန်းကျောင်း၊ သင်ကြားသင်ယူမှု အထောက်အကူပြုခန်းမ၌ ကျင်းပပြုလုပ်သည်။
ဟောပြောပွဲတွင် ခရိုင်ပြန်ကြားရေးနှင်ပြည်သူ့ဆက်ဆံရေးဦးစီးဌာနမှ လက်ထောက်ညွှန်ကြားရေးမှူး ဒေါ်လှလှဌေးက လူငယ်ရေးရာဟောပြောပွဲ ကျင်းပပြုလုပ်ရသည့်ရည်ရွယ်ချက်ကို ပြောကြားပြီး “လူငယ်နှင့် ဗလငါးတန်ဖွံ့ဖြိုးမှု” ခေါင်းစဉ်ဖြင့် ဟောပြောခဲ့ရာ၌ ကျောင်းသားကျောင်းသူများအနေဖြင့် နောင်တစ်ချိန်တွင် နိုင်ငံနှင့်လူမျိုး အကျိုးအတွက် သယ်ပိုးထမ်းရွက်လာကြရမည်ဖြစ်ပြီး နိုင်ငံနှင့်လူမျိုးကို ချစ်မြတ်နိုးတတ်အောင်၊ တန်ဖိုးထားတတ်အောင် အသိပညာအတတ်ပညာများကို လေ့လာဆည်းပူးကြစေလိုပါကြောင်း၊ အသိပညာမြင့်မားမှသာ ဗလငါးတန်ဖွံ့ဖြိုးပြီး ကိုယ်ရည်ကိုယ်သွေးမြင့်မားမည်ဖြစ်ကြောင်း၊ ကျောင်းပိတ်ရက် ကာလများတွင် အချိန်ကို အကျိုးရှိစွာ အသုံးချစေလိုပြီး အနာဂတ်အတွက် ရည်မှန်းချက်ထားရှိရမှာ ဖြစ်ကြောင်း၊ စိတ်ဓာတ် စည်းကမ်းကောင်းပြီး ရိုးသားကြိုးစားတရားမျှတမှုရှိကာ မေတ္တာတရားဖြင့် ညှာတာထောက်ထားတတ်သူများဖြစ်ရန်လိုအပ်ကြောင်း ပြင်ပဗဟုသုတရရှိစေရန် စာပေများ ဖတ်ရှုလေ့လာကြစေလိုပါကြောင်း၊ လူငယ်များ အကျင့်စာရိတ္တ ကောင်းမွန်ရမည်ဖြစ်ပြီး၊ လူ့ပတ်ဝန်းကျင်နှင့် လိုက်လျောညီထွေနေတတ်စေလိုကြောင်းစသည်ဖြင့် လူငယ်များ ဘက်စုံဖွံ့ဖြိုးရေးဆိုင်ရာများကို ဆွေးနွေးဟောပြောသည်။
ယင်းနောက် ကျောင်းသားကျောင်းသူတို့က သိလိုသည်တို့ကို ဆွေးနွေးမေးမြန်းကြရာ ခရိုင်ပြန်ကြားရေးနှင်ပြည်သူ့ဆက်ဆံရေးဦးစီးဌာနမှ လက်ထောက်ညွှန်ကြားရေးမှူးက ပြန်လည်ရှင်းလင်းပေးပြီး အမှတ်(၃)အခြေခံပညာအထက်တန်းကျောင်းမှ တာဝန်ခံကျောင်းအုပ်ဆရာမကြီး ဒေါ်နော်အက်စတာက လူငယ်ရေးရာဟောပြောပွဲ လာရောက်ပြုလုပ်ပေးခြင်းနှင့်စပ်လျဉ်း၍ ကျေးဇူးတင်စကား ပြန်လည်ပြောကြားခဲ့သည်။
အဆိုပါအခမ်းအနားသို့ အမှတ်(၃)အခြေခံပညာအထက်တန်းကျောင်း(သထုံ)မှ ဆရာဆရာမများ၊ ကျောင်းသားကျောင်းသူများ တက်ရောက်ခဲ့ကြပြီး ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ သိမှတ်ဖွယ်ရာ နံရံကပ်စာစောင်များကို ခင်းကျင်းပြသထားရာ ဟောပြောပွဲသို့ တက်ရောက်လာကြသူတို့က စိတ်ပါဝင်စားစွာဖြင့် ကြည့်ရှုလေ့လာ မှတ်သားခဲ့ကြကြောင်း သိရသည်။
https://t.me/MyanmarNationalPost
No comments:
Post a Comment