မြန်မာ - တရုတ် "M. C. Song" တရုတ်သီချင်းဆိုပြိုင်ပွဲ အောင်မြင်စွာကျင်းပပြီးစီး

 

တာမွေ   ၊   နိုဝင်ဘာ     ၂၄

ဂီတမှတဆင့် မြန်မာ - တရုတ်ချစ်ကြည်ရင်းနှီးမှု အစဉ်အလာကို ဂုဏ်ပြုသောအားဖြင့် မြန်မာ - တရုတ် နှစ်နိုင်ငံအကြား ယဉ်ကျေးမှုဖလှယ်ရေးကို တိုးမြှင့်စေရန်နှင့် ယဉ်ကျေးမှုကို နားလည်သဘောပေါက်ရန်၊ စင်မြင့်ထက် တွင် မိမိတို့၏ အိပ်မက်များကို အကောင်အထည်ဖော်နိုင်ရန် ကျင်းပသည့် မြန်မာ - တရုတ် "M. C. Song" တရုတ် သီချင်းဆိုပြိုင်ပွဲနှင့် ဆုပေးပွဲအခမ်းအနားကို ယနေ့မွန်းလွဲပိုင်းအချိန်က ရန်ကုန်ကုန်မြို့ရှိ Times City Jewellery Mall ၌ စည်ကားသိုက်မြိုက်စွာ ကျင်းပပြုလုပ်ခဲ့သည်။

အခမ်းအနားတွင် မြန်မာနိုင်ငံဆိုင်ရာ တရုတ်သံရုံး ယဉ်ကျေးမှုဌာနမှ ဌာနမှူး မစ္စတာလီချန်းကော်နှင့် ရန်ကုန် နိုင်ငံခြားဘာသာတက္ကသိုလ်ပါမောက္ခချုပ် ဒေါက်တာကြည်ရွှင်တို့က အဖွင့်အမှာစကားများ အသီးသီးပြောကြားခဲ့ပြီး ပြိုင်ပွဲဝင်မူလတန်းအဆင့်၊ အလယ်တန်းအဆင့်နှင့် အထက်တန်းအဆင့် ကျောင်းသား/ ကျောင်းသူလေးများက ပြိုင်ပွဲ ဝင်တေးသီချင်းများဖြင့် သီဆိုဖျော်ဖြေခဲ့ကြသည်။

ထို့နောက် တက်ရောက်လာကြသည့် မြန်မာနိုင်ငံဆိုင်ရာ တရုတ်သံရုံး ယဉ်ကျေးမှုဌာနမှ တာဝန်ရှိသူများ၊ ရန်ကုန်နိုင်ငံခြားဘာသာတက္ကသိုလ်မှ တာဝန်ရှိသူများနှင့် ဖိတ်ကြားထားသော ဧည့်သည်တော်များက ပြိုင်ပွဲတွင် ထူးချွန်ဆုရရှိကြသည့် ကျောင်သား/ကျောင်းသူလေးများအား ဆုများအသီးသီးပေးအပ်ချီးမြှင့်ခဲ့ကြသည်။

မြန်မာ - တရုတ် "M. C. Song" တရုတ်သီချင်းဆိုပြိုင်ပွဲကို ၂ဝ၂၄ - ခုနှစ် နိုဝင်ဘာလ အစောပိုင်းတွင် ရန်ကုန် နိုင်ငံခြားဘာသာတက္ကသိုလ်နှင့် မြန်မာနိုင်ငံတစ်ဝှမ်းလုံးရှိ တရုတ်ဘာသာသင်ကြားရေးစင်တာများ၌ ပဏာမပြိုင်ပွဲ များကို ဆက်တိုက်ကျင်းပခဲ့ပြီး ပြိုင်ပွဲဝင်များ၏တင်ဆက်မှုများကို သေချာစွာ အကဲဖြတ်ပြီးနောက် မူလတန်းအဆင့်မှ (၃၉)ဦး၊ အလယ်တန်းအဆင့်မှ (၄၀)ဦးနှင့် အထက်တန်းအဆင့်မှ (၃၇)ဦးတို့ကို နောက်ဆုံးဆန်ကာတင်အဖြစ် ရွေး ချယ်ခဲ့သည်။ နောက်ဆုံးအဆင့်ပြိုင်ပွဲများကို နိုဝင်ဘာလ (၂၂)ရက်နေ့နှင့် (၂၃)ရက်နေ့တွင် ရန်ကုန်မြို့ရှိ တရုတ် ယဉ်ကျေးမှုစင်တာ၌ ကျင်းပခဲ့ပြီး Grand Final ဖျော်ဖြေပွဲနှင့် ဆုပေးပွဲကို ယနေ့တွင် Times City Jewellery Mall ၌ စည်ကားသိုက်မြိုက်စွာ ကျင်းပခဲ့ခြင်းဖြစ်သည်။

"M. C. Song" တရုတ်သီချင်းဆိုပြိုင်ပွဲကို မြန်မာနိုင်ငံဆိုင်ရာတရုတ်သံရုံးနှင့် Center for Language Education and Cooperation မှ ကြီးမှူး၍ ရန်ကုန် Bowen Schoolမှ တာဝန်ယူကျင်းပပြုလုပ်ခြင်းဖြစ်သည်။ ထို့အပြင် ရန်ကုန်မြို့ရှိ တရုတ်ယဉ်ကျေးမှုစင်တာ၊ ရွှေဇာမဏီဂျာနယ်တိုက်၊ မြန်မာနိုင်ငံ (တရုတ်) ယူနန်ကုန်သည် ကြီးများအသင်း၊ တရုတ်နိုင်ငံ ကျေးလက်ဖွံ့ဖြိုးတိုးတက်ရေးဖောင်ဒေးရှင်း မြန်မာနိုင်ငံရုံး၊ မြန်မာ - တရုတ် စီးပွားရေး ပူးပေါင်းဆောင်ရွက်ရေးနှင့် ဖွံ့ဖြိုးမှုမြှင့်တင်ရေးအသင်း၊ မြန်မာနိုင်ငံ တရုတ်စာပန်းချီနှင့် ပန်းချီအသင်းအဖွဲ့၊ FSSL (MYANMAR) SERVICES LIMITED နှင့် အခြားအဖွဲ့အစည်းများက ပံ့ပိုးကူညီပေးထားကြောင်း သတင်းရရှိပါသည်။

နိုင်လင်းအောင်

https://t.me/MyanmarNationalPost