အန္တရာယ်ကင်းပရိတ်တရားတော်များရွတ်ဖတ်ပူဇော်ခြင်း အောင်ပွဲနှင့် ဆွမ်းဆန်စိမ်းလောင်းလှူဒါန်းပွဲပြုလုပ် - MyanmarNationalPost

MyanmarNationalPost

News Agency

Breaking

အန္တရာယ်ကင်းပရိတ်တရားတော်များရွတ်ဖတ်ပူဇော်ခြင်း အောင်ပွဲနှင့် ဆွမ်းဆန်စိမ်းလောင်းလှူဒါန်းပွဲပြုလုပ်




မန္တလေး၊ ဇန်နဝါရီ ၁၂

၂၀၂၅ ခုနှစ် နှစ်သစ်ကူးအန္တရာယ်ကင်းပရိတ်တရားတော်များ ရွတ်ဖတ်ပူဇော်ခြင်းအောင်ပွဲ၊ ရေစက်ချအခမ်းအနားနှင့် ဆွမ်းဆန်စိမ်းလောင်းလှူဒါန်းပွဲကို မန္တလေး၊ အောင်မြေသာစံမြို့နယ်၊ ဥပုသ်တော်ရပ်ကွက်၊ မန္တလေးတောင်ခြေရှိ မဟာသကျမာရဇိန်ကျောက်တော်ကြီးဘုရားရင်ပြင်တော်တွင် ယနေ့နံနက် ၉ နာရီက ကျင်းပပြုလုပ်သည်။

အခမ်းအနားသို့ မဟာသကျမာရဇိန်ကျောက်တော်ကြီးမြတ်စွာဘုရား ဂေါပကအဖွဲ့ဩဝါဒါစရိယ၊ အရှေ့ခင်မကန်တိုက်၊ သက်တော်ရှည်ဆရာတော် အဂ္ဂမဟာမဏ္ဍိတဘဒ္ဒန္တသုဇနအမှူးပြုသော ပင့်သံဃာဆရာတော် ၉ ပါးကြွ‌ရောက်တော်မူကြပြီး မန္တလေးတိုင်းဒေသကြီးအစိုးရအဖွဲ့ဝန်ကြီးချုပ် ဦးမျိုးအောင်နှင့်အစိုးရအဖွဲ့ဝင်ဝန်ကြီးများ၊ ဥပဒေချုပ်ဦးမြင့်အောင်၊ အစိုးရအဖွဲ့အတွင်းရေးမှူး ဦးဝေဇင်ထွန်း၊ ဒုတိယတိုင်းဒေသကြီးရဲတပ်ဖွဲ့မှူး ရဲမှူးကြီးမြင့်ကျော်၊ အောင်မြေသာစံခရိုင်စီမံအုပ်ချုပ်ရေးအဖွဲ့ဥက္ကဋ္ဌ၊ ခရိုင်အုပ်ချုပ်ရေးမှူးဦးအောင်ဆွေနှင့် ခရိုင်စီမံအုပ်ချုပ်ရေးအဖွဲ့ဝင်များ၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ၊ မြို့နယ်အုပ်ချုပ်ရေးမှူး ဦးအောင်သန်းဇော်နှင့် မြို့နယ်စီမံအုပ်ချုပ်ရေးအဖွဲ့ဝင်များ၊ဖိတ်ကြားထားသော ဌာနဆိုင်ရာများ၊ ဂေါပကအဖွဲ့ဥက္ကဋ္ဌ ဦးကျော်ဝင်းနှင့်အဖွဲ့ဝင်များ၊ အလှူရှင်များ တက်ရောက်ကြပြီးသည်။

အခမ်းအနားကို နမောတဿသုံးကြိမ်ရွတ်ဆိုပူဇော်ဖွင့်လှစ်‌ပေးကြပြီး သက်တော်ရှည်ဆရာတော် အဂ္ဂမဟာမဏ္ဍိတ ဘဒ္ဒန္တသုဇနထံမှ ငါးပါးသီလခံယူ ဆောက်တည်ကြကာ ဆရာတော်အရှင်သူမြတ်တို့ ရွတ်ပွားချီးမြှင့်တော်မူသော မေတ္တာသုတ်ပရိတ်ဒေသနာတော်မြတ်တို့ကို နာယူကြည်ညိုကြသည်။

ဆက်လက်၍ ဆရာတော်သံဃာတော်တို့အား ဝန်ကြီးချုပ်က လှူဖွယ်ပစ္စည်း ဆက်ကပ်လှူဒါန်းပြီး မဟာသကျမာရဇိန်ကျောက်တော်ကြီးမြတ်စွာဘုရား ဂေါပကအဖွဲ့ဩဝါဒါစရိယ၊ မြို့နယ်သံဃနာယကအဖွဲ့ဥက္ကဋ္ဌ၊ အရှေ့ခင်မကန်တိုက်၊ ကထိန်ကျောင်းဆရာတော် ဘဒ္ဒန္တပညာသီရိဘိဝံထံမှ အနုမောဒနာနှင့် ရေစက်သွန်းတရားနာယူကြသည်။

ဆက်လက်၍ ဘုရားအမှူးပြုသော ပင့်သံဃာဆရာတော်ကြီး ၉ ပါး၊ အန္တရာယ်ကင်းပရိတ်တရားတော်များ ရွတ်ဖတ်ပူဇော်ခဲ့သည့် သံဃာတော်အပါး ၃၀ တို့ကို ဝန်ကြီးချုပ်နှင့်ဝန်ကြီးများ၊ ဂေါပကအဖွဲ့ဥက္ကဋ္ဌနှင့်အလှူရှင်များက ဆွမ်းဆန်တော်နှင့်လှူဖွယ်ပစ္စည်းများလောင်းလှူကြသည်။

မဟာသကျမာရဇိန်ကျောက်တော်ကြီးမြတ်စွာဘုရား အာရုံခံတန်ဆောင်းတွင် ကျင်းပပြုလုပ်သည့် ၂၀၂၅ ခုနှစ် ကမ္ဘာ့နှစ်သစ်ကူးအခါသမယရက်မြတ်တွင် ထေရဝါဒဗုဒ္ဓသာသနာတော်မြတ်ကြီးအရှည်ခန့်၍တည်တံ့ခိုင်မြဲစေရန်၊ ကမ္ဘာလောကကြီးအေးချမ်းသာယာပြီး အခါခပ်သိမ်း သိကြား၊ ဗြဟ္မာ၊ နတ်ဒေဝါတို့က စောင့်ရှောက်စေရန်၊ ကမ္ဘာသူ/ကမ္ဘာသားများ၊ မြန်မာနိုင်ငံသူ မြန်မာနိုင်ငံသားများနှင့် မန္တလေးသူ/မန္တလေးသားများ ဘေးဥပါဒ်ရန်အသွယ်သွယ်တို့မှ ကင်းဝေးစေရန်ဟူသော မွန်မြတ်သောရည်ရွယ်ချက်ဖြင့် မန္တလေးတိုင်းဒေသကြီးအစိုးရအဖွဲ့မှ ဦးဆောင်ကာ ၁-၁-၂၀၂၅ ရက်နေ့မှ ၁၁-၁-၂ဝ၂၅ ရက်နေ့အထိ ၁၁ ရက်တိုင်တိုင် အန္တရာယ်ကင်းပရိတ်ကြီး ၁၁ သုတ်၊ မဟာသမယသုတ် ၇ သုတ်နှင့် ဥပ္ပါတသန္တိကျမ်းမြတ်များ ရွတ်ဖက်ပူဇော်ခဲ့ခြင်းဖြစ်ကြောင်း သတင်းရရှိသည်။


မြင့်မော်ထွန်း

Join - https://t.me/MyanmarNationalPost

No comments:

Post a Comment

Donate and Support

Donate and Support

မြန်မာနေရှင်နယ်ပို့စ် သတင်းအေဂျင်စီ သည် အမျိုးသားရေးကို ဦးထိပ်ထားသည့် သတင်းမီဒီယာဖြစ်ပါသည်။ တိုင်းရင်းသား ပြည်သူများ သတင်းမှန်များ သိရှိစေရေးကိုသာ ဦးစားပေး ဆောင်ရွက်လျက်ရှိပါသည်။ မြန်မာနေရှင်နယ်ပို့စ်သို့ အနှောင်အဖွဲ့ကင်းစွာ ကူညီပံ့ပိုးနိုင်ပါသည်။

KBZ Pay - 09793975969 (U Nauing Win Tun)

Wave Pay - 09692366274 (U Naing Win Tun)