ပြည်၊ ဇန်နဝါရီ ၇
လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြန်လည်ထူထောင်ရေး ဦးစီးဌာန၊ မူးယစ်ဆေးဖြတ်ပြီးသူများ ပြန်လည်ထူထောင်ရေးစခန်း (ဝက်ထီးကန်) ၏ စခန်း အခြေပြု ပြန်လည်ထူထောင်ရေးသင်တန်းအမှတ်စဉ် (၁/၂၀၂၄) သင်တန်းဆင်းပွဲအခမ်းအနားကို ယနေ့နံနက် ၁၀ နာရီအချိန်က အဆိုပါစခန်းသင်တန်းခန်းမ၌ ကျင်းပခဲ့သည်။
သင်တန်းဆင်းပွဲတွင် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ ပြည်ခရိုင်လူမှုဝန်ထမ်းဦးစီးဌာနမှ လက်ထောက်ညွှန်ကြားရေးမှူး ဒေါ်ယဉ်ယဉ်မြင့်က မူးယစ်ဆေးဝါးဆိုးကျိုးများအကြောင်း၊ မူးယစ်ဆေးဝါးသုံးစွဲမှုနှင့် ဆက်စပ်လျက်ရှိသည့် နောက်ဆက်တွဲအန္တရာယ်များကြောင်းနှင့် ယခု စခန်းအခြေပြုပြန်လည်ထူထောင်ရေး သင်တန်းအမှတ်စဉ် (၁/၂၀၂၄) အား တက်ရောက်ခဲ့ကြသော သင်တန်းသားများအနေဖြင့် သင်တန်းဆင်းပြီးနောက် မိမိတို့ရပ်ရွာသို့ ပြန်လည်ရောက်ရှိချိန်တွင် သင်တန်းတွင် သင်ကြားပို့ချခဲ့သော စိတ်ပိုင်း/ ရုပ်ပိုင်းဆိုင်ရာ ပြန်လည်ထူထောင်ရေး နည်းလမ်းများကို ဆက်လက်လိုက်နာကျင့်သုံး၍ ယခုအချိန်မှစတင်ကာ ခြေလှမ်းအသစ်များဖြင့် စိတ်သစ်၊ လူသစ်၊ ဘဝသစ်ဆီသို့ တက်လှမ်းကြရန် တိုက်တွန်းပါကြောင်း ဆွေးနွေးပြောကြားသည်။
ထို့နောက် ပြန်လည်ထူထောင်ရေးဦးစီးဌာန၊ မူးယစ်ဆေးဖြတ်ပြီးသူများ ပြန်လည်ထူထောင်ရေးစခန်း (ဝက်ထီးကန်) မှ ဦးစီးအရာရှိ၊ ဦးစဝင်းနိုင်က သင်တန်းဖွင့်လှစ်ရခြင်း၏ ရည်ရွယ်ချက်နှင့် သင်တန်းတွင်သင်ကြားခဲ့သော သက်မွေးပညာရပ်များနှင့် သက်ဆိုင်ရာဘာသာရပ်အလိုက် သင်ခန်းစာပို့ချရခြင်းတို့၏ ရည်ရွယ်ချက်များအား ရှင်းလင်းပြောကြားခဲ့သည်။
အဆိုပါသင်တန်းဆင်းပွဲအခမ်းအနားသို့ ပြည်ခရိုင်၊ လူမှုဝန်ထမ်းဦးစီးဌာနမှ လက်ထောက်ညွှန်ကြားရေးမှူး ဒေါ်ယဉ်ယဉ်မြင့်၊ ဘေးအန္တရာယ်ဆိုင်ရာ စီမံခန့်ခွဲမှုဦးစီးဌာနမှ လက်ထောက်ညွှန်ကြားရေးမှူး ဦးရာဇာဝင်းထွန်း၊ စိုက်ပျိုးရေးဦးစီးဌာန၊ မွေးမြူရေးဦးစီးဌာန၊ ခရိုင်နှင့် မြို့နယ်အဆင့်ဌာနဆိုင်ရာ အရာထမ်း၊ အမှုထမ်းများနှင့် သင်တန်းသား၊ သင်တန်းသူများ စုစုပေါင်း (၈၀) ဦးခန့် တက်ရောက်ခဲ့ကြောင်း သိရသည်။
Join - https://t.me/MyanmarNationalPost
No comments:
Post a Comment