လုပ်ငန်းသုံး မော်တော်ယာဉ်(၁၃)စီး ပြန်လည်ထုတ်ပေးနိုင်ပါရန် (အိတ်ဖွင့်ပေးစာ)

နိုင်ငံတော်စီမံအုပ်ချုပ်ရေးကောင်စီ၏ လမ်းညွှန်မှုနှင့်အညီ ပြင်ဆင်မှု လျှောက်ထားခဲ့၍ ခရိုင်တရားရုံးတော်မှ မော်တော်ယာဉ်(၁၃)စီးကို ပြန်လည် ပေးအပ်စေရန် အမိန့်ချမှတ်ခဲ့သော်လည်း ထုတ်ယူ၍မရသဖြင့် ကူညီ ပေးပါရန် ရိုသေလေးစားစွာဖြင့် အသနားခံ လျှောက်ထား တင်ပြခြင်း

ရည် ညွှန်း ချက် ။ 

(၁) ပုသိမ်ကြီးမြို့နယ်တရားရုံး၏ ၂၃-၇-၂၀၂၄ ရက်စွဲပါအမိန့်အမှတ်၊ ၂၀၂၄ ခုနှစ်၊ ရာဇဝတ်ကြီးမှုအမှတ်-၁၁၆

(၂) အောင်မြေသာစံခရိုင်တရားရုံး၏ ၁၄ - ၁ - ၂၀၂၅ ရက်စွဲပါ ရာဇဝတ် ပြင်ဆင်မှုအမှတ်-၁၀၉/၂၀၂၄ ချမှတ်ခဲ့သောစီရင်ချက်အမိန့်

(၃) ၂၃ - ၁ - ၂၀၂၅ ရက်စွဲပါ သက်သေခံ မော်တော်ယာဉ်များအား ထုတ်ယူ ခွင့်ပြုပါရန် လျှောက်လွှာ

အမှုဖြစ်စဉ်မှာ မန္တလေးတိုင်းဒေသကြီး၊ အောင်မြေသာစံခရိုင်၊ ပုသိမ်ကြီးမြို့နယ်၊ နန်းဦးလွင် ကျေးရွာရှိ မြေပိုင်ရှင် ဦးရန်ကျုံးရှော်(ခ)ဦးလောဝူမှ ၎င်းပိုင်ဆိုင်သော လယ်ယာမြေပေါ်တွင် လမ်းခင်းကျောက်ကြမ်းချရန်အတွက် အခကြေးငွေဖြင့် ကျောက်သယ် မော်တော်ယာဉ်(၁၃)စီးကို ငှားရမ်းခဲ့သဖြင့် ကျောက်ပျက်သွားရောက် သယ်ယူပို့ဆောင်ခဲ့ခြင်းအပေါ် ပုသိမ်ကြီးမြို့နယ် အထွေထွေအုပ်ချုပ်ရေးဦးစီးဌာန၏ (၁၁.၃.၂၀၂၄)ရက်နေ့ ရက်စွဲပါစာအမှတ်-၅/ ၁၆ ဦး/ ၆(၁၆၆၇)၊ ဒေသန္တရအမိန့်အမှတ်-၁/၂၀၂၄ ထုတ်ပြန်ထားသည့် အမိန့်ကို ဖောက်ဖျက်ပြီး ပုဒ်မ-၁၄၄ ထုတ်ပြန် ထားသည့် လယ်ယာမြေပေါ်တွင် ကျောက်ပျက်ချရန် သွားရောက်ခဲ့သည်ဟု ဆိုကာ မန္တလေးတိုင်း ဒေသကြီးဝန်ကြီးချုပ်၏ ညွှန်ကြားမှုဖြင့် ဒုရဲမှူးဝင်းထွဋ်မှ တရားလိုပြုလုပ်၍ ရာဇသတ်ကြီးပုဒ်မ ၅၀၅-က ဖြင့် တရားစွဲဆိုခံခဲ့ရပါသည်။ အခင်းဖြစ်ပွားရာနေရာနှင့် ဘေးပတ်ဝန်းကျင် နေရာ များတွင် ပုဒ်မ-၁၄၄ ဆိုင်းဘုတ်များ ထောင်ထားမှုမရှိခြင်း၊ ယာဉ်မောင်းများနှင့် ယာဉ်ပိုင်ရှင် များမှာ ၎င်း နေရာနှင့်(၁၆)မိုင် ကွာဝေးသော ထုံးဘိုကျေးရွာတွင် နေထိုင်သူများဖြစ်၍ တားမြစ် အမိန့်ထုတ်ပြန်ထားသည်ကို မသိရှိပါသောကြောင့် သွားရောက်မိခဲ့ပါကြောင်းကို နိုင်ငံတော်စီမံ အုပ်ချုပ်ရေးကောင်စီရုံးသို့ ရိုးသားစွာ အသနားခံတင်ပြခဲ့ပါသည်။

သို့ဖြစ်ပါ၍ အဆိုပါအမှုမှ ယာဉ်မောင်း ညီညီအောင်ပါ(၁၃)ဦးတို့ အပေါ် စွဲဆိုထားသည့် အမှုကို ရုပ်သိမ်း/ ပိတ်သိမ်းနိုင်ရေး ဆောင်ရွက်သွားရန် ပုသိမ်ကြီးမြို့နယ်တရားရုံးမှ ရည်ညွှန်းချက်(၁)ပါ စာဖြင့် ရာဇဝတ်ကျင့်ထုံး ဥပဒေပုဒ်မ-၄၉၄ စာဖြင့် ရုပ်သိမ်းခွင့်ပြုပြီး ပုဒ်မ-၄၉၄(ခ)အရ အမှုမှ အပြီးပြတ် လွှတ်ပေးခဲ့ပါသည်။

မြေပိုင်ရှင်ဖြစ်သူ ဦးရန်ကျုံးရှော်(ခ) ဦးလောဝူအား လယ်ယာမြေပေါ်တွင် ဥပဒေနှင့် မညီသော အခြားနည်းအသုံးပြုခြင်းအတွက် ထောင်ဒဏ်(၂)နှစ် ချမှတ်ခဲ့ပြီး ဖြစ်ပါသည်။ မော်တော်ယာဉ်များမှာ မြေပိုင်ရှင်ဖြစ်သူ ဦးလောဝူ ပိုင်ဆိုင်သောယာဉ်များ မဟုတ်ဘဲ ခေါက်ကြေးငွေဖြင့် ငှားရမ်း၍ သွားရောက်ချပေးသော ကျောက်သယ်ယာဉ်(၁၃)စီးအား ပုသိမ်ကြီး မြို့နယ်တရားရုံးမှ ပြည်သူ့ဘဏ္ဍာအဖြစ် သိမ်းဆည်းခဲ့ပါသည်။

သို့အတွက် ညီညီအောင်ပါ ယာဉ်မောင်း(၁၃)ဦးတို့က အောင်မြေသာစံ ခရိုင်တရားရုံးတော် သို့ (၁၈-၁၁-၂၀၂၄)ရက်နေ့တွင် အယူခံပြင်ဆင် တက်ရောက်ခြင်းအား ဆက်လက်ဆောင်ရွက်ခဲ့ရာ (၁၄-၁-၂၀၂၅)ရက်နေ့တွင် မော်တော် ယာဉ်(၁၂)စီး Loaderယာဉ်(၁)စီးတို့ကို ပြန်လည်ပေးအပ် စေရန် ဥပဒေစီရင်ထုံးနှင့်အညီ ရည်ညွှန်းချက်(၂)ပါစာဖြင့် ပြင်ဆင်အမိန့်ချမှတ်ခဲ့ပါသည်။ 

ဖော်ပြပါ အမှုမှ မော်တော်ယာဉ်(၁၃)စီးတို့ကို (၁၅-၁-၂၀၂၅)ရက်နေ့တွင် ပုသိမ်ကြီးမြို့နယ် တရားရုံးသို့ သွားရောက်ထုတ်ယူရာတွင် အမှုတွဲရောက်ရှိပြီး ဖြစ်သော်လည်း မန္တလေးတိုင်း တရားသူကြီးချုပ် ဒေါ်ခင်သင်းဝေမှ ဖုန်းဖြင့် အမှုတွဲတောင်းယူသွား၍ ပုသိမ်ကြီးမြို့နယ် တရားရုံးမှ နောက်တစ်ပတ်မှ ပြန်လာထုတ်ယူရန် ပြောကြားခဲ့သဖြင့် (၂၃-၁-၂၀၂၅)ရက်နေ့တွင် အောင်မြေသာစံ ခရိုင်တရားရုံးတော်မှ ရည်ညွှန်းချက်(၃)ပါ စာဖြင့် သွားရောက်ထုတ်ယူသည့် အခါတွင် မူလရုံးအမှုတွဲကို မန္တလေးတိုင်း ဒေသကြီး တရားလွတ်တော်မှ အမှုတွဲတောင်းခေါ် သွားသည့်အတွက် ယနေ့အချိန်ထိ ယာဉ်(၁၂)စီးနှင့် Loaderယာဉ်(၁)စီးကို ထုတ်ယူခြင်းကိစ္စ ဆိုင်းငံခြင်း ခံခဲ့ရပါသည်။

သို့ဖြစ်ပါ၍ အောင်မြေသာစံခရိုင်တရားရုံးမှ ပြန်လည်ပေးအပ်စေရန် ပြင်ဆင်အမိန့်ချမှတ် ပြီးသော မော်တော်ယာဉ်(၁၂)စီးနှင့် Loaderယာဉ်(၁)စီးကို ဥပဒေနှင့်အညီ မူလပိုင်ရှင်မှ ပြန်လည် ထုတ်ယူခွင့် ရရှိစေရေး သက်ဆိုင်ရာ ဌာနများသို့ လမ်းညွှန်မှုပြုပေးပါရန် ရိုသေလေးစားစွာဖြင့် အသနားခံ တင်ပြအပ်ပါသည်။

ရိုသေလေးစားစွာဖြင့်

ဦးမင်းစောထွန်း၊ ဦးဌေးဇော်အောင် 

(မှတ်ချက် - အဆိုပါ ဖြစ်စဉ်မှ မော်တော်ယာဉ်မောင်းများ၏ မိသားစုဝင်များ အသနားခံတင်ပြစဉ်ကလည်း မြန်မာနေရှင်နယ်ပို့စ်မှ သတင်းဖော်ပြပေးခဲ့ပါသည်။ ဆက်စပ်ပေးပို့လာသော အိတ်ဖွင့်ပေးစာကို တာဝန်ရှိသူများ သိရှိ၍ ပြည်သူများ နစ်နာမှုမရှိစေရေး ကူညီဆောင်ရွက်ပေးနိုင်ရန်အတွက်သာ ဖော်ပြပေးခြင်း ဖြစ်ပါသည်။ - မြန်မာနေရှင်နယ်ပို့စ် )

#MNP #News 

Join - https://t.me/MyanmarNationalPost