ငလျင်ဒဏ်ကြောင့် ပျက်စီးဆုံးရှုံးမှုများ ဖြစ်ပေါ်ခဲ့သည့်ဒေသများ၌ ကူညီကယ်ဆယ် ရေးလုပ်ငန်းများ အင်တိုက်အားတိုက် ဆက်လက်ဆောင်ရွက်လျက်ရှိ

နေပြည်တော်၊ ဧပြီ ၉

မြန်မာနိုင်ငံတွင် လှုပ်ခတ်ခဲ့သော မန္တလေးငလျင်ကြီးကြောင့် လမ်းတံတား၊ အဆောက်အဦများ ထိခိုက်ပျက်စီးခဲ့ရသည့် နေရာများ၌ ကူညီကယ်ဆယ်ရေးလုပ်ငန်း များကို တိုင်းစစ်ဌာနချုပ်အသီးသီးမှ တပ်မတော်သားများ၊ မြန်မာနိုင်ငံ ရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ ပြည်ပနိုင်ငံများမှ ကူညီကယ်ဆယ် ရေးအဖွဲ့များ၊ ဌာနဆိုင်ရာ ဝန်ထမ်းများ၊ လူမှုကူညီရေးအသင်း/အဖွဲ့များနှင့် ဒေသခံပြည်သူများပူးပေါင်း၍ အချိန် နှင့် တပြေးညီကူညီဆောင်ရွက်ပေးလျက်ရှိသည်။

ထိုသို့ ဆောင်ရွက်ပေးလျက်ရှိရာ ယနေ့တွင် ငလျင်ဒဏ်ကြောင့်ပြိုကျပျက်စီးမှု များဖြစ်ပေါ်ခဲ့သည့် စစ်ကိုင်းတိုင်းဒေသကြီး၊ စစ်ကိုင်းမြို့၊ ပိုးတန်းရပ်ကွက်ရှိ ထူပါရုံ စေတီ၊ တကောင်းရပ်ကွက်ရှိ မဟာစေတီ၊ ပန်းဘဲတန်းရပ်ကွက်ရှိ ရတနာဆင်များရှင် စေတီ၊ မင်းလမ်းရပ်ကွက်ရှိ အခြေခံပညာအလယ်တန်းကျောင်း(ခွဲ)နှင့် ချင်းစုရပ်ကွက်ရှိအခြေခံပညာအလယ်တန်းကျောင်း(ခွဲ)သို့ စစ်ကိုင်းတိုင်းဒေသကြီး ဝန်ကြီးချုပ် ဦးမြတ်ကျော်၊ ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး သက်ပုံနှင့် တာဝန်ရှိသူများက သွားရောက်ကြည့်ရှု၍ ပြိုကျပျက်စီးခဲ့သည့် အပျက်အစီးများအား ဖယ်ရှားရှင်းလင်း နေမှုများနှင့် ပြန်လည်ပြုပြင် တည်ဆောက်နိုင်ရေးတို့အတွက် လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

ထို့အပြင် ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး သက်ပုံနှင့် တာဝန်ရှိသူများသည် ဧရာဝတီမြစ်ကူးတံတား(ရတနာပုံ) တံတားကြီး၏ ချဉ်းကပ်လမ်း များ အပ်ကွဲသွားသဖြင့် ကြံ့ခိုင်မှုစစ်ဆေးနေစဉ် အဆိုပါတံတားပေါ်၌ မော်တော်ယာဉ် များ ဖြတ်သန်းသွားလာနေမှုများအားလည်းကောင်း၊ စစ်ကိုင်းမြို့၊ စစ်ကိုင်းတောင်ရိုးရှိဥမင်ကိုးဆယ်စေတီတော်ကြီးနှင့် ဟံသာဂီရိ ဘုန်းတော်ကြီးကျောင်း သာသနိက အဆောက်အဦးများ ပြိုကျပျက်စီးနေမှု အခြေအနေများကိုလည်းကောင်း၊ စစ်ကိုင်းမြို့၊ နန်းဦးမြို့သစ်ရှိ ဝန်ထမ်းအိမ်ရာ၊ စစ်ကိုင်းခရိုင်မီးသတ်ဦးစီးဌာနရုံး ၊ စာသင်ကျောင်း များ ပြန်လည်ပြုပြင် တည်ဆောက်နိုင်ရေးတို့အတွက် လိုအပ်သည်များ ပေါင်းစပ်ညှိနှိုင်း ဆောင်ရွက်ပေးသည်။

ယင်းနောက် စစ်ကိုင်းမြို့ပေါ်ရှိ ငလျင်ဘေးဒဏ်သင့် ပြည်သူများအတွက် ကျန်းမာရေးစောင့်ရှောက်မှုအဖြစ် တပ်မတော်နယ်လှည့်ဆေးကုသရေးအဖွဲ့နှင့် သောက် သုံးရေအဆင်ပြေစေရန်အတွက် တပ်မတော်ရေသန့်ဖြန့်ဝေရေး မော်တော်ယာဉ်တို့မှ ဧရာဝတီမြစ်ရေကို သန့်စင်၍ သောက်သုံးရေဖြန့်ဝေပေးနေမှုများအား ကြည့်ရှု အားပေးကာ လိုအပ်သည်များ ပေါင်းစပ်ညှိနှိုင်းဆောင်ရွက်ပေးသည်။

အလားတူ ငလျင်ဒဏ်ကြောင့် ပြိုကျပျက်စီးမှုများ ဖြစ်ပေါ်ခဲ့သည့် မန္တလေး တိုင်းဒေသကြီး၊ အမရပူရမြို့နယ်ရှိ မဟာဂန္ဓာရုံကျောင်းတိုက်နှင့် Sky Villa နေရာသို့ ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး မျိုးမိုးအောင်၊ ဒုတိယ ဗိုလ်ချုပ်ကြီး စိုးတင့်နိုင် နှင့် တာဝန်ရှိသူများက ကလည်းကောင်း၊ မန္တလေးမြို့ စန္ဒာမုနိဘုရား၊ အရိပ်မထွက် ဘုရား၊ စကုကျောင်းတိုက်၊ စူဠာမဏိစေတီတော်နှင့် မဟာမုနိဘုရားကြီးသို့ ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး မျိုးမိုးအောင်နှင့် တာဝန်ရှိသူများက လည်းကောင်း၊ ငလျင်ဒဏ်ကြောင့်ပြိုကျ ပျက်စီး ခဲ့သော မန္တလေးမြို့ တိမ်ဖြူဟိုတယ်၊ ကျူးလစ်ဟိုတယ်၊ ဝင်းစတားဟိုတယ်၊ မန်းမြန်မာ ပလာဇာ၊ Ayawaddy River View ဟိုတယ် နေရာများသို့ ကာကွယ်ရေး ဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး စိုးတင့်နိုင် နှင့် တာဝန်ရှိသူများက လည်းကောင်း သွားရောက်၍ အပျက်အစီးများ ရှင်းလင်းဖယ်ရှားရေးနှင့် ပြန်လည်ပြုပြင်တည်ဆောက်ရေးလုပ်ငန်းများ အမြန်ဆုံးအကောင်အထည်ဖော်ဆောင်ရွက်နိုင်ရေး တာဝန်ရှိသူများအားမှာကြားပြီး လိုအပ်သည်များ ပေါင်းစပ်ညှိနှိုင်း ဖြည့်ဆည်း ဆောင်ရွက်ပေးသည်။

ထို့အတူ ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီး မျိုးသန့်နိုင် နှင့် တာဝန်ရှိသူများသည် မြင်းခြံ-မြစ်သား ရေဝန်းလမ်းပေါ်ရှိ ငလျင်ဒဏ်သင့်၍ ကွဲအက်နိမ့်ကျ ပျက်စီးသွားသော မိုင်တိုင် ၄၆/၄ မှ ၄၇/၀ ထိ ၃ ဖာလုံ နေရာ၊ စမုံ တံတားအနီးရှိ ပျက်စီးသွားသော လမ်းပိုင်းနေရာ၊ မြစ်သားမြို့ ဗိုလ်ချုပ်လမ်းပေါ်ရှိပြိုကျပျက်စီး အဆောက်အဦများ၊ မြစ်သားမြို့ ရွှေမုဋ္ဌောစေတီနေရာ၊ ကူမဲမြို့ ယုဇန တံတား ပျက်စီးမှုနေရာနှင့် ကူမဲမြို့ ရန်ကုန်-မန္တလေး လမ်းပေါ်ရှိ ပြိုကျပျက်စီး သွားသော အဆောက်အဦများအား သွားရောက်ကြည့်ရှု၍ အပျက်အစီးရှင်းလင်းဖယ်ရှား အမြန်ဆုံး ပြန်လည်ပြုပြင်နိုင်ရေး တာဝန်ရှိသူများအား မှာကြားပြီး လိုအပ်သည်များ ပေါင်းစပ် ညှိနှိုင်းဆောင်ရွက်ပေးသည်။ ယင်းနောက် ကင်းတားဘက်စုံရေလှောင်တမံ ကြံ့ခိုင်မှုအခြေအနေများအား သွားရောက်ကြည့်ရှုစစ်ဆေး၍ တာဝန်ရှိသူများအား လိုအပ်သည်များမှာကြားပြီး ကျောက်ဆည်မြို့၊ မြို့တော်ခန်းမ၌ ပြုလုပ်သည့် စေတနာရှင် အလှူရှင်များက လှူဒါန်းသော လှူဖွယ်ပစ္စည်းများအား လက်ခံခြင်းအခမ်းအနားသို့ တက်ရောက်သည်။

အလားတူ နေပြည်တော်ကောင်စီနယ်မြေ၊ ပျဉ်းမနားမြို့နယ်၊ လယ်ဝေးမြို့နယ်၊ ပုဗ္ဗသီရိမြို့နယ်၊ ဥတ္တရသီရိမြို့နယ်နှင့် ဒက္ခိဏသီရိ မြို့နယ်တို့ရှိ ဘုရားစေတီများ၊ ဘုန်းတော်ကြီးကျောင်းများ၊ စစ်မှုထမ်းဟောင်းအိမ်ရာများနှင့် ငလျင်ဒဏ်ကြောင့် ပျက်စီးခဲ့သည့်နေရာများ၌ ကူညီကယ်ဆယ်ရေးလုပ်ငန်းများနှင့် ဒဏ်ရာရရှိကြသည့် ဒေသခံပြည်သူများအား ဆေးကုသရေး လုပ်ငန်းများ ဆောင်ရွက် ပေးကြပြီး ယာယီ ဆေးရုံရှိ ဆေးရုံတက်လူနာများအား စားသောက်ဖွယ်ရာများနှင့် သောက်သုံးရေများ ဖြန့်ဝေလှူဒါန်းပေးခဲ့ကြောင်း သတင်းရရှိသည်။

https://t.me/MyanmarNationalPost