ပေါင်၊ မေ ၂၃
မွန်ပြည်နယ်၊ပေါင်မြို့နယ်အတွင်းရှိ မိုးစပါးစိုက်တောင်သူများအတွက် ၂၀၂၅ ခုနှစ် စိုက်ပျိုးစရိတ်ချေးငွေကို ယနေ့နံနက်ပိုင်းက ပေါင်မြို့နယ်မြန်မာ့လယ်ယာဖွံ့ဖြိုးရေးဘဏ်ခွဲ၌ စတင်ထုတ်ချေးပေးခဲ့ရာ တောင်သူများ အေးချမ်းစွာ လာရောက်ထုတ်ယူလျက်ရှိကြသည်။
ချေးငွေထုတ်ပေးရာတွင် မြို့နယ်မြန်မာ့လယ်ယာဖွံ့ဖြိုးရေးဘဏ်ခွဲ တာဝန်ခံ မန်နေဂျာ ဒေါ်ယုယုခိုင် က ယခုနှစ် မိုးစပါးချေးငွေ ထုတ်ချေးပေးသွားမည့် အစီအစဉ်များ၊ ချေးငွေများပြန်လည် ပေးသွင်းရမည့်ကာလနှင့် အပြေအကျေ ပြန်လည်ပေးဆပ်ကြရေးတို့ကို ဆွေးနွေးပြောကြားခဲ့သည်။
ပေါင်မြို့နယ်အတွင်း ယခင်နှစ်များက မိုးစပါးနှင့် ဆောင်းသီးနှံ စိုက်ပျိုးစရိတ်ချေးငွေများကို အစောဆုံး အကြေပြန်လည် ပေးဆပ်ခဲ့သည့် သဲဖြူကုန်းကျေးရွာ၊နတ်မှော်ကျေးရွာ၊ဆင်ရွာကျေးရွာမှ တောင်သူ (၁၀၇ ) ဦးတို့၏ စိုက်ဧက (၈၁၅) ဧကအတွက် တစ်ဧကလျှင် ကျပ် တစ်သိန်းခွဲနှုန်းဖြင့် ချေးငွေကျပ် (၁၂၂.၅၀ )သိန်း ကို မိုးစပါးစိုက်ပျိုးစရိတ်အဖြစ် ထုတ်ချေးပေးခဲ့သည်။
ပေါင်မြို့နယ်တွင် ယခုနှစ် မိုးစပါးစိုက်ပျိုးစရိတ်ချေးငွေကို ယခင်နှစ်များက ချေးငွေများ အပြေအကျေပြန်လည်ဆပ်ပြီးသည့် ကျေးရွာအုပ်စုပေါင်း ၄၇ အုပ်စုမှ တောင်သူ (၇၁၉၁ ) ဦးတို့၏ မိုးစပါးစိုက်ဧကပေါင်း (၆၀၀၀၀) အတွက် စိုက်ပျိုးစရိတ်ချေးငွေကျပ် သိန်းပေါင်း သိန်းကိုးသောင်း ခန့်အား မေလ ( ၂၃ ) ရက်နေ့မှ စတင်ကာ စက်တင်ဘာလကုန်အထိ ထုတ်ချေးပေးသွားရန် လျာထားကြောင်း ပေါင်မြို့နယ်မြန်မာ့လယ်ယာဖွံ့ဖြိုးရေးဘဏ်ခွဲမှ သိရသည်။
မွန်မလေး
https://t.me/MyanmarNationalPost
No comments:
Post a Comment