ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်းနှင့်တာဝန်ရှိသူများ ဟင်္သာတမြို့နယ်အတွင်း ဆီထွက်သီးနှံ ပဲပုတ်နှင့်အခြားသီးနှံများ စိုက်ပျိုးထားရှိမှု ကွင်းဆင်းစစ်ဆေး

 

ဟင်္သာတ၊ စက်တင်ဘာ ၂၆

ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်း သည် လုံခြုံရေးနှင့်နယ်စပ်ရေးရာဝန်ကြီး ဗိုလ်မှူးကြီး ခန့်မွန်ဆွေ၊ လမ်းပန်းဆက်သွယ်ရေးဝန်ကြီး ဦးအောင်စန်းချစ်နှင့် တိုင်းခရိုင်မြို့နယ်တာဝန်ရှိသူများ လိုက်ပါလျက် စက်တင်ဘာ ၂၄ ရက်နေ့ ညနေပိုင်းက ဟင်္သာတမြို့နယ်၊ ခေါင်းဆေးကျွန်းကျေးရွာအုပ်စု၊ ခေါင်းဆေးကျွန်းကျေးရွာသို့ ရောက်ရှိခဲ့ပြီး ကွင်းအမှတ် (၁၄၄၄)၊ ဦးပိုင်အမှတ် (၄၀/၄၃/၄၄) တောင်သူ ဦးမျိုးလွင်ဦးနှင့် ဦးသန်းထွန်း ပိုင် ဧက(၇၀)ရှိ ပဲကြီး-ပဲပုတ် ရောနှောစိုက်ခင်းအား ကြည့်ရှုစစ်ဆေးခဲ့ကြပြီး တောင်သူများ၏တင်ပြချက်များအပေါ် လိုအပ်သည်များ ဖြည့်စွက်လမ်းညွှန်မှာကြားခဲ့သည်။

ထို့နောက် ဝန်ကြီးချုပ်နှင့်အဖွဲ့သည် ဟင်္သာတမြို့နယ် အထွေထွေ အုပ်ချုပ်ရေးဦစီးဌာနရုံးသို့ ရောက်ရှိခဲ့ပြီး အစည်းအဝေးခန်းမ၌ ဟင်္သာတခရိုင်နှင့် မြန်အောင်ခရိုင်တို့မှ ခရိုင်အုပ်ချုပ်ရေးမှူးများ၊ မြို့နယ်အုပ်ချုပ်ရေးမှူးများ၊ စိုက်ပျိုးထုတ်လုပ်မှုတိုးတက်မြင့်မားရေးကြီးကြပ်မှုကော်မတီ အဖွဲ့ဝင်များ၊ ဟင်္သာတခရိုင်နှင့် မြန်အောင် ခရိုင်အတွင်းရှိ ဆန်စက်လုပ်ငန်းရှင်များ၊ ဆီစက်လုပ်ငန်းရှင်များ၊ ဆန်ကုန်သည်များ၊ ပဲ/နှမ်း ကုန်သည်များ၊ ဆီထွက်သီးနှံ ပဲပုတ်စိုက် တောင်သူများနှင့် တွေ့ဆုံခဲ့သည်။

တွေ့ဆုံပွဲတွင် တိုင်းဒေသကြီး ဝန်ကြီးချုုပ် ဦးတင်မောင်ဝင်းက အမှာစကား ပြောကြားခဲ့ပြီး၊ ဆန်စက်လုပ်ငန်းရှင်များကိုယ်စား ဦးဖြိုးမောက်က ဆန်စက်လုပ်ငန်းများနှင့်ပတ်သက်၍လည်းကောင်း၊ ဆီ/ပဲပုတ်ဆီ ကြိတ်ခွဲထုတ်လုပ်ရေးအတွက် ဆီစက်လုပ်ငန်းရှင် ဦးထက်အာကာညွန့်က ပဲပုတ်ဆီ ကြိတ်ခွဲထုတ်လုပ်ရေးလုပ်ငန်းများနှင့်ပတ်သက်၍ ဆောင်ရွက်ထားရှိမှု အခြေအနေများအားလည်းကောင်း ၊ဧရာဝတီတိုင်းဒေသကြီး၊ ပဲ၊ ပြောင်း၊ နှမ်းအသင်း ဥက္ကဋ္ဌ ဦးမြင့်သိန်းဦးက ပဲ/ ပြောင်း/နှမ်း စိုက်ပျိုးထုတ်လုပ်မှု အခြေအနေများနှင့် ဈေးကွက်အခြေအနေများအားလည်းကောင်း ၊ ပဲကြီး/ပဲပုတ်စိုက် တောင်သူများကိုယ်စား ခေါင်းဆေးကျွန်းကျေးရွာနေ တောင်သူ ဦးသန်းထွန်းက ပဲကြီး/ပဲပုတ် စိုက်ပျိုးထားရှိမှုနှင့် အောင်မြင်ဖြစ်ထွန်းနေမှု အခြေအနေများအား တင်ပြဆွေးနွေးခဲ့ကြသည်။ ထို့နောက် ဟင်္သာတခရိုင်/မြန်အောင်ခရိုင် အုပ်ချုပ်ရေးမှူးများနှင့် တက်ရောက်လာသော လုပ်ငန်းရှင်များ၊ တောင်သူများမှ အထွေထွေတင်ပြဆွေးနွေးခဲ့ကြရာ  ဝန်ကြီးချုပ်က တင်ပြဆွေးနွေးချက်များအပေါ် လိုအပ်သည်များ ဖြည့်စွက်မှာကြားခြင်းနှင့် နိဂုံချုပ်အမှာစကားပြော ကြားခဲ့ကြောင်း သိရသည်။

https://t.me/MyanmarNationalPost