ရှီကျင့်ဖိန်နှင့် ရုရှားနိုင်ငံ သမ္မတ ပူတင် တွေ့ဆုံဆွေးနွေး

ပေကျင်း၊ စက်တင်ဘာ ၃ 

တရုတ်နိုင်ငံ သမ္မတ ရှီကျင့်ဖိန်နှင့် တရုတ်နိုင်ငံသို့ လာရောက်၍ ၂၀၂၅ ခုနှစ် ရှန်ဟိုင်းပူးပေါင်းဆောင်ရွက်မှုအဖွဲ့ (SCO) ထိပ်သီးအစည်းအဝေး၊ တရုတ်ပြည်သူများ ဖက်ဆစ်ဂျပန် ခုခံတော်လှန်ရေးစစ်ပွဲနှင့် ကမ္ဘာ့ဖက်ဆစ်တော်လှန်ရေးစစ်ပွဲ အောင်နိုင်ခြင်း နှစ် ၈၀ ပြည့် အထိမ်းအမှတ် အခမ်းအနား တက်ရောက်သည့် ရုရှားနိုင်ငံ သမ္မတ ပူတင်တို့သည် တရုတ်နိုင်ငံ ပေကျင်းမြို့ ပြည်သူ့ခန်းမဆောင်၌ စက်တင်ဘာ ၂ ရက် နံနက်ပိုင်းက တွေ့ဆုံဆွေးနွေးခဲ့သည်။

ထိုသို့တွေ့ဆုံရာတွင် ရှီကျင့်ဖိန်က တရုတ်-ရုရှားဆက်ဆံရေးသည် နိုင်ငံတကာအခြေအနေ ပြောင်းလဲမှုများ၏ စမ်းသပ်ချက်ကို ကြံ့ကြံ့ခံနိုင်ခဲ့ပြီး ရေရှည်သင့်မြတ်၍ ချစ်ကြည်ရင်းနှီးမှု၊ ဘက်စုံ မဟာဗျူဟာမြောက် ညှိနှိုင်းပူးပေါင်းဆောင်ရွက်မှု၊ အပြန်အလှန် အကျိုးဖြစ်ထွန်း၍ ဘုံအကျိုးစီးပွားဖော်ဆောင်မှု ဟူသည့် နိုင်ငံကြီးဆက်ဆံရေး စံနမူနာပြုခဲ့ကြောင်း၊ နှစ်ဖက်က မူလရည်ရွယ်ချက်ကို လက်ကိုင်ထားပြီး ခိုင်မြဲတည်ငြိမ်မှုအားကို ထိန်းသိမ်းကာ ကဏ္ဍစုံ၌ ပူးပေါင်းဆောင်ရွက်မှုများသည် အပြုသဘောဆောင်သော ရလဒ်များ ရရှိခဲ့ကြောင်း ထောက်ပြပြောကြားခဲ့သည်။

တရုတ်နိုင်ငံအနေဖြင့် ရုရှားနိုင်ငံနှင့်အတူ အဆင့်မြင့်အလွှာဆက်ဆံမှုကို နီးကပ်စွာ လုပ်ဆောင်၍ အပြန်အလှန် ဖွံ့ဖြိုးတိုးတက်မှုအား ထောက်ခံအားပေးသွားလိုကြောင်း၊ နှစ်နိုင်ငံ၏အဓိကအကျိုးစီးပွားနှင့် အရေးကြီးဂရုပြုမှု အကြောင်းအရာများနှင့်စပ်လျဉ်း၍ ရပ်တည်ချက်များကို အချိန်မီညှိနှိုင်းကာ တရုတ်-ရုရှားဆက်ဆံရေး ပိုမိုကြီးမားသည့် တိုးတက်မှုများ ရရှိရန် တွန်းအားပေးသွားလိုကြောင်း ၎င်းက ပြောကြားခဲ့သည်။

တရုတ်-ရုရှားနှစ်နိုင်ငံ ကိုယ်စီဖွံ့ဖြိုးတိုးတက်မှုတွင် အားကောင်းသည့် တွန်းအားများရှိကြရာ နှစ်ဖက်အနေဖြင့် စီမံကိန်းကြီးများဖြင့် ပူးပေါင်းဆောင်ရွက်မှုအား ဦးဆောင်၍ စံပြပူးပေါင်းဆောင်ရွက်မှု စီမံကိန်းများကို ဖန်တီးတည်ဆောက်ပြီး အကျိုးစီးပွား နက်ရှိုင်းစွာပေါင်းစပ်မှုအား မြှင့်တင်ရမည်ဖြစ်ကြောင်း၊ ပူးပေါင်းဆောင်ရွက်မှု၏ ကြံ့ကြံ့ခံနိုင်မှုကို မြှင့်တင်ကာ ပူးပေါင်းဆောင်ရွက်မှုဆိုင်ရာ စိတ်တူကိုယ်တူရှိမှုကို တိုးမြှင့်၍ ပူးပေါင်းဆောင်ရွက်မှု အခင်းအကျင်းကြီးအား အစွမ်းကုန် ခိုင်မြဲစေရန် ကာကွယ်ထိန်းသိမ်းရမည်ဖြစ်ကြောင်း ရှီကျင့်ဖိန်က အလေးထား ပြောကြားခဲ့သည်။

တရုတ်-ရုရှား နှစ်နိုင်ငံအကြီးအကဲများက တစ်ဖက်နိုင်ငံ၌ ကျင်းပသည့် ကမ္ဘာ့ဖက်ဆစ်တော်လှန်ရေးစစ်ပွဲ အောင်နိုင်ခြင်း အထိမ်းအမှတ် အခမ်းအနားများအား အပြန်အလှန် တက်ရောက်ခဲ့ကြောင်း၊ ယင်းသည် ဒုတိယကမ္ဘာစစ်၏ အဓိကစစ်အောင်နိုင်သည့်နိုင်ငံနှင့် ကုလသမဂ္ဂ လုံခြုံရေးကောင်စီ အမြဲတမ်းအဖွဲ့ဝင်နိုင်ငံ အနေဖြင့် နိုင်ငံကြီးတာဝန်သိမှုကို အပြည့်အဝ ထင်ဟပ်စေပြီး ဒုတိယကမ္ဘာစစ် အောင်နိုင်ခြင်းရလဒ်အား ကာကွယ်မှု၊ မှန်ကန်သော ဒုတိယကမ္ဘာစစ်သမိုင်းအမြင်အား ကာကွယ်လိုသည့် ခိုင်မြဲသောသန္နိဋ္ဌာန်ကို ဖော်ပြနေကြောင်း၊ မိမိအနေဖြင့် ကမ္ဘာလုံးဆိုင်ရာ စီမံခန့်ခွဲမှု အစီအမံ (GGI) အဆိုပြုခြင်းသည် စိတ်တူကိုယ်တူရှိသည့် နိုင်ငံအားလုံးနှင့်အတူ ကုလသမဂ္ဂ ပဋိညာဉ်စာတမ်း ရည်ရွယ်ချက်နှင့် အခြေခံမူအား ခိုင်မာစွာ ကာကွယ်ရန်၊ ပိုမိုတရားမျှတ၍ သမာသမတ်ကျသော ကမ္ဘာလုံးဆိုင်ရာ စီမံခန့်ခွဲမှုစနစ် တည်ဆောက်မှုအား တွန်းအားပေးရန် ဖြစ်ကြောင်း ရှီကျင့်ဖိန်က ထောက်ပြ ပြောကြားခဲ့သည်။

တရုတ်-ရုရှားနှစ်နိုင်ငံလုံးသည် အချုပ်အခြာအာဏာ တန်းတူညီမျှမှု၊ နိုင်ငံတကာ တရားဥပဒေ စိုးမိုးမှု၊ နိုင်ငံစုံ ပူးပေါင်းဆောင်ရွက်မှုဝါဒကို အလေးထား ဖော်ဆောင်ကြကြောင်း၊ ကုလသမဂ္ဂ၊ ရှန်ဟိုင်းပူးပေါင်းဆောင်ရွက်မှုအဖွဲ့ (SCO) ၊ BRICS ၊ G20 စသည့် နိုင်ငံစုံပလက်ဖောင်းများတွင် ညှိနှိုင်းပူးပေါင်းဆောင်ရွက်မှုအား မြှင့်တင်ကာ လူသားမျိုးနွယ် အေးအတူပူအမျှ အသိုက်အဝန်း တည်ဆောက်မှုအား အတူလက်တွဲ တွန်းအားပေးသွားမည်ဖြစ်ကြောင်း ၎င်းက ပြောကြားခဲ့သည်။

ပူတင်က မိမိနှင့် သမ္မတ ရှီကျင့်ဖိန်၏ ဦးဆောင်လမ်းညွှန်မှုအောက်တွင် ရုရှား-တရုတ်ဆက်ဆံရေးသည် မြင့်မားသော မဟာဗျူဟာမြောက်မှုကို ထင်ဟပ်စေပြီး သမိုင်းအရ အမြင့်ဆုံးအဆင့်သို့ ရောက်ရှိခဲ့ကြောင်း၊ သမ္မတ ရှီကျင့်ဖိန်သည် မေလတွင် ရုရှားနိုင်ငံသို့ နိုင်ငံတော်ခရီးစဉ်လာရောက်၍ ဆိုဗီယက်ပြည်ထောင်စု၏ မဟာမျိုးချစ်စစ်အောင်ပွဲ နှစ် ၈၀ ပြည့် အထိမ်းအမှတ် ဂုဏ်ပြုအခမ်းအနား တက်ရောက်ခဲ့ကြောင်း၊ မိမိအနေဖြင့် မနက်ဖြန်တွင် တရုတ်ပြည်သူများ ဖက်ဆစ်ဂျပန် ခုခံတော်လှန်ရေးစစ်ပွဲ အောင်နိုင်ခြင်း နှစ် ၈၀ ပြည့် အထိမ်းအမှတ် အခမ်းအနားအား တက်ရောက်သွားမည်ဖြစ်ကြောင်း ပြောကြားခဲ့သည်။

ယင်းသည် ရုရှား-တရုတ်သည် ကမ္ဘာ့ဖက်ဆစ်တော်လှန်ရေးစစ်ပွဲအတွင်း အပြန်အလှန်ဖေးမကူညီ၍ ပခုံးချင်းယှဉ် တိုက်ပွဲဝင်ကာ ဥရောပ ပင်မစစ်မျက်နှာစာနှင့် အရှေ့တိုင်း ပင်မစစ်မျက်နှာစာ၌ အောင်နိုင်မှု ရရှိရန်အတွက် အရေးကြီး အခန်းကဏ္ဍမှ ပါဝင်မှုကို နှစ်နိုင်ငံက ကမ္ဘာကြီးထံသို့ ဖော်ပြခြင်းဖြစ်သလို သမိုင်း၏ ဖြစ်ရပ်မှန်အား အတူကာကွယ်မှု၊ ဒုတိယကမ္ဘာစစ် အောင်နိုင်ခြင်းရလဒ်အား ကာကွယ်မှုအတွက် ခိုင်မြဲသော သဘောထားကို ဖော်ပြခြင်းလည်းဖြစ်ကြောင်း၊ ရုရှား-တရုတ်က ကမ္ဘာ့ဖက်ဆစ်တော်လှန်ရေးစစ်ပွဲအတွင်း စည်းလုံးညီညွတ်စွာ ပူးပေါင်းဆောင်ရွက်မှုသည်လည်း ခေတ်သစ် ရုရှား-တရုတ်ဆက်ဆံရေး တိုးတက်မှုအတွက် ခိုင်မြဲသော အခြေခံအုတ်မြစ် ဖြစ်လာခဲ့ကြောင်း ၎င်းက ဆိုသည်။

တရုတ်နိုင်ငံက ရှန်ဟိုင်းပူးပေါင်းဆောင်ရွက်မှုအဖွဲ့ (SCO) ထျန်းကျင်းထိပ်သီးအစည်းအဝေးကို အောင်မြင်စွာ ကျင်းပ၍ အစည်းအဝေးတွင် သဘောတူညီချက်များစွာ ရရှိရန် ဦးဆောင်ခဲ့ကာ SCO အဖွဲ့ ဖွံ့ဖြိုးတိုးတက်မှုအား အင်တိုက်အားတိုက် တွန်းအားပေးလိုက်ခြင်းအပေါ် ဂုဏ်ပြုလိုကြောင်း၊ သမ္မတ ရှီကျင့်ဖိန် အဆိုပြုသည့် ကမ္ဘာလုံးဆိုင်ရာ စီမံခန့်ခွဲမှု အစီအမံ (GGI) သည် လွန်စွာ ချိန်မီခါမီဖြစ်၍ မဖြစ်မနေလိုအပ်ကာ ယင်းသည် ကမ္ဘာလုံးဆိုင်ရာ စီမံခန့်ခွဲမှုလိုအပ်ချက်အား ဖြေရှင်းရန်အတွက် အရေးကြီး အခန်းကဏ္ဍမှ ပါဝင်သွားမည် ဖြစ်ကြောင်း၊ ရုရှားအနေဖြင့် တရုတ်နိုင်ငံနှင့် မဟာဗျူဟာမြောက် ညှိနှိုင်းပူးပေါင်းဆောင်ရွက်မှုကို ထိန်းသိမ်းထားကာ အဆင့်မြင့်အလွှာဆက်ဆံမှုကို နီးကပ်စွာလုပ်ဆောင်၍ ကဏ္ဍစုံ လက်တွေ့ပူးပေါင်းဆောင်ရွက်မှုအား မြှင့်တင်ကာ နှစ်နိုင်ငံဆက်ဆံရေး ဆက်လက်အဆင့်မြင့်မားစွာ ဖွံ့ဖြိုးတိုးတက်ရန် တွန်းအားပေးသွားမည်ဖြစ်ကြောင်း ပူတင်က ပြောကြားခဲ့သည်။

နှစ်နိုင်ငံအကြီးအကဲများက အတူတကွ ဂရုပြုကြသည့် နိုင်ငံတကာနှင့် ဒေသတွင်း အရေးကိစ္စများနှင့် စပ်လျဉ်း၍လည်း သဘောထားအမြင်ချင်း ဖလှယ်ခဲ့ကြသည်။

ထိုနေ့ နေ့လယ်ပိုင်းတွင် ရှီကျင့်ဖိန်နှင့် ပူတင်တို့သည် လက်ဖက်ရည်စကားဝိုင်းငယ်ဖြင့် စကားစမြည် ပြောဆိုဆွေးနွေး၍ ဧည့်ခံပွဲ ကျင်းပခဲ့သည်။

နှစ်ဖက်က စွမ်းအင်၊ အာကာသ၊ ဉာဏ်ရည်တု (AI)၊ စိုက်ပျိုးရေး၊ ပိုးမွှားရောဂါ ကင်းရှင်းရေး စစ်ဆေးမှု၊ ကျန်းမာရေး၊ သိပ္ပံသုတေသန၊ ပညာရေး၊ မီဒီယာ စသည့်ကဏ္ဍများတွင် နှစ်ဖက်ပူးပေါင်းဆောင်ရွက်မှု စာချုပ် ၂၀ ကျော် လက်မှတ်ရေးထိုးခဲ့သည်။

အထက်ပါအခမ်းအနားအစီအစဉ်များသို့ ချိုက်ချီ၊ ဝမ်ရိ တက်ရောက်ခဲ့ကြောင်း သိရသည်။ 

Ref - (Xinhua)

https://t.me/MyanmarNationalPost