တောင်ကြီး ၊ ဖေဖော်ဝါရီ ၁၁
တတိယအကြိမ် ရှမ်းပြည်နယ်လွှတ်တော် ပထမပုံမှန်အစည်းအဝေး အောင်မြင်စွာကျင်းပနိုင်ရေးအတွက် ကျင်းပရေးဦးစီးကော်မတီနှင့် လုပ်ငန်းကော်မတီများ၏ လုပ်ငန်းညှိနှိုင်းအစည်းအဝေးကို ဖေဖော်ဝါရီလ (၉)ရက်နေ့ မွန်းလွဲပိုင်းက တောင်ကြီးမြို့၊ ရှမ်းပြည်နယ်အစိုးရအဖွဲ့ရုံး အစည်းဝေးခန်းမ (၂)တွင် ကျင်းပခဲ့သည်။
ဦးစွာ ရှမ်းပြည်နယ်အစိုးရအဖွဲ့ဝင်၊ ပြည်နယ်စီးပွားရေးရာဝန်ကြီး ဦးခွန်သိန်းမောင်က လွှတ်တော်အစည်းအဝေးများ အောင်မြင်စွာကျင်းပနိုင်ရေးအတွက် လိုအပ်သော အုပ်ချုပ်ရေးလုပ်ငန်းများဖြစ်သည့် လွှတ်တော်ကိုယ်စားလှယ်များ၏ လုံခြုုံရေး၊ သယ်ယူပို့ဆောင်ရေး၊ ကျန်းမာရေးစောင့်ရှောက်မှုနှင့် လွှတ်တော်ရုံးဝန်း သန့်ရှင်းသာယာလှပရေး၊ သတင်းထုတ်ပြန်နိုင်ရေး၊ လျှပ်စစ်မီးရရှိရေး စသည့်လုပ်ငန်းများအား အချိန်နှင့်တစ်ပြေးညီ ဆောင်ရွက်ပေးနိုင်ရေးအတွက် လုပ်ငန်းကော်မတီ (၈)ခုအား ဖွဲ့စည်းခဲ့ပြီးဖြစ်ပါကြောင်း ပြောကြားခဲ့သည်။
ထို့နောက် ရှမ်းပြည်နယ်အစိုးရအဖွဲ့ အတွင်းရေးမှူး ဦးသန်းဆွေဝင်းက ဆွေးနွေးပြီး ရှမ်းပြည်နယ်လွှတ်တော်ရုံး၊ ညွှန်ကြားရေးမှူး ဦးလှမျိုးက တတိယအကြိမ် ရှမ်းပြည်နယ်လွှတ်တော် ပထမပုံမှန်အစည်းအဝေးကျင်းနိုင်ရေးအတွက် လုပ်ငန်းကော်မတီများနှင့်စပ်လျဉ်း၍ ရှင်းလင်းဆွေးနွေးခဲ့သည်။
ဆက်လက်၍ တက်ရောက်လာသော လုပ်ငန်းကော်မတီအသီးသီးက လိုအပ်ချက်များ၊ အကြံပြုချက်များအား ဆွေးနွေးတင်ပြကြပြီး ပြည်နယ်စီးပွားရေးရာဝန်ကြီးက လိုအပ်သည်များ ပေါင်းစပ်ညှိနှိုင်း ဖြည့်ဆည်းဆောင်ရွက်ပေး၍ နိဂုံးချုပ်အမှာစကား ပြောကြားခဲ့ကြောင်း သိရသည်။
မင်းသန့်
https://t.me/MyanmarNationalPost
No comments:
Post a Comment