အီဘိုလာက တဖြည်းဖြည်း နဲ့ လူအသက်တွေ နှုတ်ယူနေတာ များလာနေ

ဇွန် - ၂၃ ( အင်္ဂါနေ့ ) 

ဒီမိုကရက်တစ် ကွန်ဂိုသမ္မတနိုင်ငံ တွင် ဖြစ်ပွားနေတဲ့ အီဘိုလာ ရောဂါကူးစက်ပျံ့နှံ့မှုအတွင်း အတည်ပြုလူနာဦးရေသည် ၁,၀၀၀ ကျော်လွန်သွားပြီဖြစ်ကြောင်း ထိုနိုင်ငံရဲ့ ကျန်းမာရေးဝန်ကြီးဌာနက တနင်္ဂနွေနေ့တွင် သတင်းထုတ်ပြန်ခဲ့ပါတယ်။ 

ရောဂါ စတင်ကူးစက်ပျံ့နှံ့ချိန်မှစ၍ စုစုပေါင်း လူဦးရေ ၁,၀၀၃ ဦးတွင် ဗိုင်းရပ်စ်ပိုး ရှိနေကြောင်း စစ်ဆေးတွေ့ရှိခဲ့ရတယ်လို့ တာဝန်ရှိသူများက ပြောကြားခဲ့ပြီး အနည်းဆုံး လူနာ ၂၅၄ ဦး သေဆုံးခဲ့ပြီး ရောဂါကြောင့် သေဆုံးမှုနှုန်းမှာ ၂၅.၃ ရာခိုင်နှုန်းသို့ ရောက်ရှိလာခဲ့တယ်လို့ ဆိုပါတယ်။ 

ယင်းမတိုင်မီ တစ်ရက်အလိုကမူ အာဏာပိုင်များက အတည်ပြုလူနာ ၉၅၆ ဦးနဲ့ သေဆုံးသူ ၂၄၇ ဦးသာ ရှိကြောင်း ထုတ်ပြန်ထားခဲ့ပါတယ်။ 

လူနာပေါင်း ရာနှင့်ချီ၍ ဆေးဘက်ဆိုင်ရာ စောင့်ကြပ်ကြည့်ရှုမှုအောက်တွင် ရှိနေဆဲဖြစ်ပါတယ်။ လက်ရှိတွင် လူဦးရေ ၃၆၅ ဦးသည် အထူးကုသရေးဌာနများ၌ ကုသမှုခံယူနေရ သို့မဟုတ် စောင့်ကြည့်စစ်ဆေးခံနေရပြီး၊ ရောဂါသက်သာပျောက်ကင်းသွားတဲ့ လူနာ ၁၀၀ ဦးမှာမူ ဆေးရုံမှ ဆင်းခွင့်ရရှိသွားပြီဖြစ်ကြောင်း ကျန်းမာရေးတာဝန်ရှိသူများက ပြောကြားခဲ့ပါတယ်။ 

ယခုအကျပ်အတည်းကာလအတွင်း ဆေးဘက်ဆိုင်ရာ ဝန်ထမ်းများသည်လည်း ကြီးမားသော ပေးဆပ်မှုများနဲ့ ရင်ဆိုင်ခဲ့ရပါတယ်။ ကမ္ဘာ့ကျန်းမာရေးအဖွဲ့ (WHO) ရဲ့ အရေးပေါ်ဆိုင်ရာ ညွှန်ကြားရေးမှူး မာရီ ရိုစလင်း ဘီလီဇဲလ် ရဲ့ ပြောကြားချက်အရ ရောဂါစတင်ကူးစက်ပျံ့နှံ့ချိန်မှစ၍ ကျန်းမာရေးဝန်ထမ်း ၇၅ ဦး ပိုးကူးစက်ခံခဲ့ရပြီး ၎င်းတို့အနက် ၁၇ ဦး သေဆုံးခဲ့ကြောင်း သိရပါတယ်။

သောကြာနေ့က ပြုလုပ်ခဲ့တဲ့ သတင်းစာရှင်းလင်းပွဲတစ်ခုတွင် ဘီလီဇဲလ်က လက်ရှိအခြေအနေသည် အလွန်အတက်အကျမြန်ဆန်နေဆဲဖြစ်ပြီး လျင်မြန်သောနှုန်းဖြင့် ဆက်လက်ဖြစ်ပေါ် ပြောင်းလဲနေဆဲဖြစ်ကြောင်း သတိပေးပြောကြားထားပါတယ်။ 

REF: RT

#MNP #News