ICC ကနေ ထွက်တဲ့ နိုင်ငံတွေက ထွက်ကုန်ကြပြီ

ဇွန် - ၂၅ ( ကြာသပတေးနေ့ ) 

နိုက်ဂျာနိုင်ငံဟာ “ကိုလိုနီနယ်ချဲ့ဝါဒသစ်” ဆန်ဆန် ဘက်လိုက်မှုတွေ ရှိနေတယ်လို့ စွပ်စွဲပြီး နိုင်ငံတကာ ရာဇဝတ်တရားရုံး (ICC) ကနေ နှုတ်ထွက်ဖို့ ဆုံးဖြတ်ခဲ့ပြီးနောက် လအနည်းငယ်အကြာမှာတော့ အခုအခါ ICC ကနေ နှုတ်ထွက်မယ့် လုပ်ငန်းစဉ်တွေကို တရားဝင် စတင်လိုက်ပြီ ဖြစ်ပါတယ်။

အနောက်အာဖရိကနိုင်ငံတစ်ခုဖြစ်တဲ့ နိုက်ဂျာဟာ ICC ကို တည်ထောင်ခဲ့တဲ့ ရောမစာချုပ် ကနေ နှုတ်ထွက်ဖို့အတွက် ကုလသမဂ္ဂ  ထံကို ပြီးခဲ့တဲ့ တနင်္လာနေ့က စာပေးပို့ တင်ပြခဲ့တယ်လို့ သိရပါတယ်။

အေပီ  သတင်းဌာနရဲ့ ဖော်ပြချက်အရ အဲဒီစာထဲမှာ “ဒီတရားရုံးဟာ ငြိမ်းချမ်းရေးနဲ့ တရားမျှတမှုကို မြတ်နိုးကြတဲ့ ပြည်သူတွေကြားမှာ ကြီးမားတဲ့ မျှော်လင့်ချက်တွေကို ဖြစ်ပေါ်စေခဲ့ပေမဲ့လည်း၊ လက်ရှိမှာတော့ တရားရုံးကို လွဲမှားစွာ အသုံးချတာနဲ့ ကိုယ်ကျိုးရှာ အမြတ်ထုတ်တာတွေ လုပ်ဆောင်ခံနေရပါတယ်” လို့ ရေးသားထားပါတယ်။

ဒီလုပ်ရပ်အပေါ် တုံ့ပြန်တဲ့အနေနဲ့ ICC က “အဆိုးရွားဆုံးသော နိုင်ငံတကာရာဇဝတ်မှုတွေအတွက် ပြစ်ဒဏ်ကနေ ကင်းလွတ်ခွင့်ရနေတာတွေကို အဆုံးသတ်ဖို့ စုပေါင်းကြိုးပမ်းမှုကနေ ခွဲထွက်မယ့် ဘယ်လိုဆုံးဖြတ်ချက်မျိုးကို မဆို စိတ်မကောင်းဖြစ်ရပါတယ်” လို့ ပြောကြားခဲ့ပါတယ်။

ဒီနှုတ်ထွက်မှုဟာ ၁၂ လအကြာမှာ အတည်ဖြစ်မှာဖြစ်လို့ နိုက်ဂျာဟာ ICC ကနေ နှုတ်ထွက်တဲ့ တတိယမြောက်နိုင်ငံ ဖြစ်လာမှာပါ။ ပြီးခဲ့တဲ့ ၂၀၁၇ ခုနှစ် အောက်တိုဘာလတုန်းက ဘရွန်ဒီနိုင်ငံဟာ ဒီတရားရုံးက အာဖရိကတိုက်သားတွေကိုပဲ ရည်ရွယ်ချက်ရှိရှိ ပစ်မှတ်ထား အရေးယူနေတယ်လို့ စွပ်စွဲပြီး ရောမစာချုပ်ကနေ နှုတ်ထွက်ခဲ့ပါတယ်။ အဲဒီနောက် ၂၀၁၈ ခုနှစ်မှာတော့ ဖိလစ်ပိုင်နိုင်ငံက ထပ်မံနှုတ်ထွက်ခဲ့ပြီး၊ အဲဒီအချိန်က ဖိလစ်ပိုင်သမ္မတ ရိုဒရီဂို ဒူတာတေးက ICC ဟာ သူ့နိုင်ငံအပေါ် အရေးယူဖို့ “နိုင်ငံရေးလက်နက်” တစ်ခုလို အသုံးချခံနေရတယ်လို့ ပြောကြားခဲ့ပါတယ်။

နိုက်ဂျာနိုင်ငံအနေနဲ့ နှုတ်ထွက်ဖို့ ရည်ရွယ်ချက်ရှိကြောင်းကို ပြီးခဲ့တဲ့ စက်တင်ဘာလတုန်းက ပထမဆုံးအကြိမ် လူသိရှင်ကြား ထုတ်ဖော်ခဲ့တာပါ။ အဲဒီတုန်းက နိုက်ဂျာအပြင် ဘာကီးနားဖားဆိုနဲ့ မာလီနိုင်ငံတို့ ပါဝင်တဲ့ ဆာဟဲလ်ဒေသနိုင်ငံများ မဟာမိတ်အဖွဲ့ (AES) ကနေ ပူးတွဲကြေညာချက်တစ်ခု ထုတ်ပြန်ခဲ့ပြီး၊ ICC ဟာ “ရွေးချယ်ပြီးမှ တရားမျှတမှုတွေကို ဖော်ဆောင်တတ်တဲ့ ကမ္ဘာ့ပြဇာတ်တစ်ခု” အဖြစ် ပေါ်လွင်နေတယ်လို့ ဝေဖန်ပြောကြားခဲ့ပါတယ်။

REF: RT

#MNP #News