မြောက်ဥက္ကလာပ၊ ဇူလိုင် ၂၈
ရန်ကုန်တိုင်းဒေသကြီး၊ မရမ်းကုန်းခရိုင် ၊ မြောက်ဥက္ကလာပမြို့နယ်၌ မြို့နယ်ပြည်သူ့ကျန်းမာရေးဦးစီးဌာနမှ အခြေခံပညာကျောင်းများ နှင့် ကိုယ်ပိုင်ကျောင်းများရှိ မူလတန်းအရွယ်ကျောင်းသား၊ ကျောင်းသူများတွင် သွားနှင့်ခံတွင်းရောဂါများကင်းဝေးစေရေး ၊ မျက်စိကျန်းမာ ရေး နှင့် ကျန်းမာရေး အသိပညာပေးခြင်း ယမန်နေ့ နံနက်ပိုင်းက ကျောင်းကျန်းမာရေးလုပ်ငန်းများ ဆက်လက်ကွင်းဆင်းဆောင်ရွက်ခဲ့ကြရာ တိုင်းဒေသကြီးလွှတ်တော်ကိုယ်စားလှယ် ဒေါ်ဝင်းဝင်းအောင် ၊ မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီအဖွဲ့၀င် ဦးမျိုးဝင်းလတ် ၊ မြို့နယ်ပညာရေးမှူး တို့က လာရောက်ကြည့်ရှုအား ပေးပြီးမြို့နယ်ပြည်သူ့ကျန်းမာရေးဦးစီးဌာနမှူးက ကျောင်းကျန်းမာရေးလုပ်ငန်းများ ဆောင်ရွက်နေမှုများအား လိုက်လံပြသခဲ့သည်။
ထိုသို့ကွင်းဆင်း၍ ကျောင်းကျန်းမာရေးလုပ်ငန်းများဆောင်ရွက်ပေးရာတွင် မြို့နယ် ပြည်သူ့ကျန်းမာရေးဦးစီးဌာနမှ တာ၀န်ရှိသူများက အမှတ်(၁၀) အခြေခံပညာမူလတန်းကျောင်း နှင့် အမှတ်(၇) အခြေခံပညာအထက်တန်းကျောင်းရှိ ကျောင်းသား၊ ကျောင်းသူများအား သွားတစ်ချောင်း နှင့် သွားဖုံးသား ဖွဲ့စည်းတည်ဆောက်ထားပုံ ၊ သွားနှင့် ခံတွင်း ကျန်းမာရေးအတွက် ဆောင်ရန်၊ ရှောင်ရန် အချက်များအား အသိပညာ ပေး ဟော ပြောပြီး၊ သွားပိုးစားရောဂါဖြစ်ပွားလာပုံနှင့် နောက် ဆက်တွဲဖြစ်စဥ်များ စစ်မှန်သော သွားတိုက်နည်း များ ၊ မျက်စိကျန်းမာရေး နှင့် ဆောင်ရန် ၊ ရှောင်ရန် အချက်များ၊ ဘုရားပန်းအိုး ၊ ရေတွင်း ရေကန်များ အားပိုးလောက်လန်း စစ်ဆေးပေးခြင်း နှင့် ကျန်းမာရေးအသိပညာပေးဟောပြောခြင်း စသည့် လုပ်ငန်းများအား ကွင်းဆင်း ဆောင်ရွက် ပေးခဲ့ ကြောင်းသိရသည်။
သက်လွင်စိုး
#MNP #News
No comments:
Post a Comment