ဒီအာကွန်ဂိုမှာ အီဘိုလာရောဂါဖြစ်တာ ထောင်ကျော်သွားပြီ

ဇူလိုင် - ၁ ( ဗုဒ္ဓဟူးနေ့ ) 

ကွန်ဂိုဒီမိုကရက်တစ်သမ္မတနိုင်ငံ မှာ အတည်ပြုပြီးတဲ့ အီဘိုလာလူနာဦးရေဟာ ၁,၃၀၇ ယောက်အထိ ရှိလာပြီလို့ မနေ့တုန်းက အဲဒီနိုင်ငံရဲ့ ပြန်ကြားရေးနဲ့ မီဒီယာဝန်ကြီးဌာနက ထုတ်ပြန်လိုက်ပါတယ်။ ဇွန်လ ၂၈ ရက်နေ့အထိ ထွက်ထားတဲ့ စာရင်းဇယားတွေအရ ဆိုရင်တော့ ဒီရောဂါကြောင့် လူပေါင်း ၃၇၇ ယောက် သေဆုံးခဲ့ပြီးဖြစ်လို့ သေဆုံးမှုနှုန်းက ၂၈.၈ ရာခိုင်နှုန်း ရှိနေတာပါ။ တစ်ချိန်တည်းမှာပဲ ပြန်ကောင်းလာတဲ့သူ ၁၈၀ ရှိပြီး ကျန်တဲ့ ၆၁၅ ယောက်ကတော့ သီးသန့်ခွဲထားတာ ဒါမှမဟုတ် ဆေးရုံတက်ပြီး ကုသမှုခံယူနေရဆဲ ဖြစ်ပါတယ်။

ဒီရောဂါဆိုးဟာ ဒီအာကွန်ဂို နယ်စပ်ကိုကျော်ပြီး ဘေးပတ်ဝန်းကျင်အထိပါ ပျံ့နှံ့နေပါပြီ။ ယူဂန်ဒါကျန်းမာရေး အာဏာပိုင်တွေရဲ့ နောက်ဆုံးထုတ်ပြန်ချက်အရ ယူဂန်ဒါနိုင်ငံမှာလည်း အီဘိုလာကူးစက်ခံရသူ ၂၀ ဦး ရှိနေပြီဖြစ်ပြီး အဲဒီထဲက ၂ ဦး သေဆုံးကာ ၁၅ ဦးကတော့ ပြန်လည်သက်သာလာပြီလို့ သိရပါတယ်။

ဒီကပ်ရောဂါက ကွန်ဂိုဒီမိုကရက်တစ်သမ္မတနိုင်ငံ (DR Congo) ရဲ့ အရှေ့ဘက်ပိုင်းမှာပဲ ဆက်ပြီး အဓိက ဖြစ်ပွားနေတာပါ။ အီတူရီ  ပြည်နယ်ကတော့ ရောဂါအဆိုးဆုံးဗဟိုချက် ဖြစ်နေပြီး ထိခိုက်ခံရတဲ့ ကျန်းမာရေးဇုန် ၂၃ ခုအထိ ရှိနေပါတယ်။ ဘေးနားက မြောက်ကီဗူး ပြည်နယ်မှာဆိုရင်လည်း ကျန်းမာရေးဇုန် ၁၁ ခုမှာ စောင့်ကြည့်မှုတွေကို တိုးမြှင့်လုပ်ဆောင်နေပါတယ်။

တောင်ကီဗူးပြည်နယ်မှာတော့ အတည်ပြုလူနာ ၃ ဦးနဲ့ သေဆုံးသူ ၁ ဦးရှိခဲ့ပေမဲ့ မေလ ၂၆ ရက်နေ့ကတည်းက စပြီး နောက်ထပ်အသစ်ကူးစက်တာမျိုး မတွေ့ရတော့ဘူးလို့ အာဏာပိုင်တွေက ပြောပါတယ်။ ဒါပေမဲ့ လက်ရှိအချိန်ထိတော့ တက်တက်ကြွကြွနဲ့ ဆက်ပြီး စောင့်ကြည့်စစ်ဆေးနေတုန်းပါပဲ။

ကျန်းမာရေးတာဝန်ရှိသူတွေရဲ့ ပြောပြချက်အရ ရောဂါဖြစ်ပွားနေတဲ့ ပြည်နယ် ၃ ခုမှာ ရောဂါသည်နဲ့ ထိတွေ့ခဲ့သူတွေကို လိုက်လံရှာဖွေတဲ့လုပ်ငန်း (Contact Tracing) ဟာ ၈၁.၃ ရာခိုင်နှုန်းအထိ လုပ်ဆောင်နိုင်ခဲ့ပြီလို့ သိရပါတယ်။ 

ဒါ့အပြင် အီဘိုလာဗိုင်းရပ်စ် ပျံ့နှံ့မှုကို ထိန်းချုပ်နိုင်ဖို့အတွက် အစိုးရဟာ မြို့တော် ကင်ရှာဆာ အပါအဝင် တီရှိုပို ၊ အော့အူအဲလီ  နဲ့ ဘာအူအဲလီပြည်နယ်တွေမှာ လူစုလူဝေးလုပ်တာ မှန်သမျှကို အကုန်ပိတ်ပင်လိုက်ပါတယ်။ ဒီအမိန့်ညွှန်ကြားချက်ကို ပြည်ထဲရေးဝန်ကြီး ဂျက်ကမန်း ရှာဘာနီ က ပြီးခဲ့တဲ့ စနေနေ့တုန်းက ပြည်နယ်အုပ်ချုပ်ရေးမှူးတွေဆီ ပေးပို့ခဲ့တာဖြစ်ပြီး လူစုလူဝေး အမြောက်အမြား ဖြစ်စေနိုင်တဲ့ နိုင်ငံရေး လူထုအစည်းအဝေးတွေ၊ လမ်းလျှောက်ဆန္ဒပြပွဲတွေနဲ့ အခြားလူစုလူဝေးပွဲတွေ အားလုံးကို ယာယီရပ်ဆိုင်းထားဖို့ ပါဝင်ပါတယ်။

REF: RT

#MNP #News