တောင်အာဖရိက က တရားမဝင်ရွှေ့ပြောင်းတွေကို နှင်ထုတ်နေ

ဇူလိုင် - ၁၀ ( သောကြာနေ့ ) 

တောင်အာဖရိကနိုင်ငံဟာ ဇင်ဘာဘွေနယ်စပ်အနီးက ယာယီစင်တာတစ်ခုမှာ ပြည်နှင်ဒဏ်ပေးဖို့နဲ့ မိမိသဘောဆန္ဒအလျောက် နေရပ်ပြန်မယ့် ရွှေ့ပြောင်းနေထိုင်သူ ၄၇,၀၀၀ ကနေ ၅၀,၀၀၀ ကြားအတွက် လုပ်ငန်းစဉ်တွေ ဆောင်ရွက်ပေးခဲ့ပြီးဖြစ်တယ်လို့ ပြည်နယ်အဆင့် ပြည်ထဲရေးဌာနက ပြောကြားလိုက်ပါတယ်။

အာဏာပိုင်တွေက ဘေ့ဘရစ်ဂျ်နယ်စပ်ဝင်ပေါက်ကနေတစ်ဆင့် ပြည်နှင်ဒဏ်ပေးတာတွေနဲ့ နေရပ်ပြန်လည် ပို့ဆောင်ရေးတွေကို လုပ်ဆောင်နေတာကြောင့် လင်ပိုပိုပြည်နယ်၊ မူဆီနာစင်တာကို နိုင်ငံခြားသား ရာနဲ့ချီပြီး ဆက်လက်ရောက်ရှိနေကြတယ်လို့ အရာရှိတွေက ဆိုပါတယ်။ ဒီလို ရွှေ့ပြောင်းနေထိုင်သူ အရေအတွက် မြင့်တက်လာတာဟာ ဒါဘန်နေရပ်ပြန်ပို့ရေးစင်တာကို ပိတ်သိမ်းလိုက်ပြီးနောက်ပိုင်းမှာ ဖြစ်လာတာဖြစ်သလို၊ တရားမဝင် ဝင်ရောက်နေထိုင်သူတွေ တောင်အာဖရိက ကနေ ထွက်ခွာသွားကြဖို့ ရွှေ့ပြောင်းနေထိုင်သူ ဆန့်ကျင်ရေးအဖွဲ့အစည်းတွေရဲ့ တောင်းဆိုမှုတွေ ပိုမိုကျယ်လောင်လာနေတဲ့ အချိန်နဲ့လည်း တိုက်ဆိုင်နေပါတယ်။

တရားမဝင် ရွှေ့ပြောင်းနေထိုင်မှုအပေါ် တင်းမာမှုတွေ ဆက်လက်မြင့်တက်နေတဲ့အတွက် အချို့သော နိုင်ငံခြားသားတွေဟာ ပြည်နှင်ဒဏ်ပေးခြင်း ခံခဲ့ရသလို၊ မိုဇမ်ဘစ်နဲ့ မာလာဝီ အပါအဝင် တခြားသောနိုင်ငံတွေကို မိမိသဘောဆန္ဒအလျောက် နေရပ်ပြန်သွားကြတာမျိုးတွေလည်း ရှိနေပါတယ်။ ကြာသပတေးနေ့က အဲဒီစင်တာမှာ ပြောကြားခဲ့ရာမှာတော့ လင်ပိုပိုပြည်နယ် ပြည်ထဲရေး တာဝန်ရှိသူ အဲလ်ဘတ် မတ်ဆောင်း က သူတို့ဌာနရဲ့ နေရပ်ပြန်ပို့ရေး အစီအစဉ်ရဲ့ ထိရောက်မှုတွေကို အာဏာပိုင်တွေအနေနဲ့ စတင်မြင်တွေ့နေရပြီလို့ ဆိုပါတယ်။

သူက ပြည်သူ့ရုပ်သံလွှင့်ဌာနကို ပြောကြားရာမှာ 'ကျနော်တို့ စစချင်းတုန်းက လူဦးရေအမြောက်အမြားနဲ့ စတင်ခဲ့ရတာကို ခင်ဗျားတို့လည်း သိကြမှာပါ၊ ဒါပေမဲ့ အခုတော့ အရေအတွက်တွေ လျော့ကျသွားပါပြီ။ မနေ့ကဆိုရင် လူပေါင်း ၁,၆၇၅ ဦးကို လုပ်ငန်းစဉ်တွေ ဆောင်ရွက်ပေးနိုင်ခဲ့ပြီး ရုံးပိတ်ချိန်မှာတော့ စင်တာမှာရှိတဲ့သူ အားလုံးကို ရွှေ့ပြောင်းပေးနိုင်ခဲ့ပါတယ်' လို့ ထည့်သွင်းပြောဆိုခဲ့ပါတယ်။

ဒါ့အပြင် 'ဒါပေမဲ့ ဒါဟာ အမြဲတမ်းပြောင်းလဲနေတဲ့ ပစ်မှတ်တစ်ခုလို ဖြစ်နေဆဲဆိုတာကိုတော့ ခင်ဗျားတို့ နားလည်ထားရပါမယ်။ ကျနော်တို့က လူတွေကို လုပ်ငန်းစဉ်တွေ ဆောင်ရွက်ပေးနေစဉ်အတွင်းမှာပဲ တခြားသူတွေကလည်း ဆက်လက်ပြီး ရှေ့ထွက်လာနေကြတာကြောင့်၊ သူတို့ဟာ ပြည်နယ်ကိုးခုရဲ့ ဘယ်နေရာမှာပဲရှိရှိ ဒီစင်တာကိုပဲ ခေါ်ဆောင်လာခံရမှာဖြစ်ပါတယ်' လို့လည်း သူက ဆက်ပြောပါတယ်။

မတ်ဆောင်းရဲ့ ပြောပြချက်အရ ကြာသပတေးနေ့မနက်ပိုင်းမှာ အဲဒီစင်တာမှာ လုပ်ငန်းစဉ်တွေ ဆောင်ရွက်ပေးဖို့ စောင့်ဆိုင်းနေတဲ့ ရွှေ့ပြောင်းနေထိုင်သူ အရေအတွက်ဟာ ၁,၅၀၀ ကနေ ၂,၀၀၀ ကြား ရှိနေခဲ့တယ်လို့ သိရပါတယ်။ ဒါ့အပြင် သူတို့ဌာနကနေ လုပ်ငန်းစဉ်တွေ ဆောင်ရွက်ပေးပြီးခဲ့ပေမယ့် ရွှေ့ပြောင်းနေထိုင်သူ အရေအတွက်ဟာလည်း ဆက်လက်ပြီး တိုးတက်များပြားလာနေတယ်လို့ သူက ဆိုပါတယ်။

REF: RT

#MNP #News