သြစတြီးယားနိုင်ငံသည် အစိုးရနှင့် ပုဂ္ဂလိကကျောင်းများတွင် ဟီဂျာဘ် (hijab) နှင့် ဘူကာ (burka) အပါအဝင် ခေါင်းစည်းပုဝါများ ဝတ်ဆင်ခြင်းကို တားမြစ်သည့် ဥပဒေတစ်ရပ်ကို ပြဋ္ဌာန်း

နိုင်ငံတကာ သတင်းထူးများမှာ သြစတြီးယားနိုင်ငံသည် အသက် ၁၄ နှစ်အောက် မိန်းကလေးငယ်များအနေဖြင့် အစိုးရနှင့် ပုဂ္ဂလိကကျောင်းများတွင် ဟီဂျာဘ် (hijab) နှင့် ဘူကာ (burka) အပါအဝင် ခေါင်းစည်းပုဝါများ ဝတ်ဆင်ခြင်းကို တားမြစ်သည့် ဥပဒေတစ်ရပ်ကို ပြဋ္ဌာန်းလိုက်ပြီ ဖြစ်ကြောင်း ဖော်ပြလာကြသည်။

အဆိုပါ သတင်းသည် ၂၀၂၆ခုနှစ်၊ စက်တင်ဘာလ (၁၀) ရက်နေ့က သြစတြီးယားနိုင်ငံလွှတ်တော်တွင် ပြဋ္ဌာန်းလိုက်ခြင်းဖြစ်ပြီး ခရစ်ယာန်ဘာသာဝင်များက ထောက်ခံပြီး အစ္စလာမ်ဘာသာဝင်များက ဝေဖန်ပြစ်တင်မှုများ ပြုလုပ်လျက်ရှိသည်။

ÖVP၊ SPÖ နှင့် Neos ပါတီများပါဝင်သည့် ရှေးရိုးစွဲဝါဒီ ဦးဆောင်သော ညွန့်ပေါင်းအစိုးရက အတည်ပြုခဲ့သည့် ဤအစီအမံကို ကျား/မ တန်းတူညီမျှမှုဆိုင်ရာ ကတိကဝတ်တစ်ခုအဖြစ်နှင့် မိန်းကလေးငယ်များအား "ဖိနှိပ်ချုပ်ချယ်မှု" မှ ကာကွယ်ပေးခြင်းတစ်ခုအဖြစ် အစိုးရက ဖော်ပြထားသည်။ သို့သော် ဝေဖန်သူများကမူ ၎င်းသည် မွတ်စလင်ဆန့်ကျင်ရေး စိတ်ဓာတ်များကို လှုံ့ဆော်ပေးနိုင်ပြီး ဖွဲ့စည်းပုံအခြေခံဥပဒေနှင့် မညီညွတ်နိုင်ကြောင်း သတိပေးပြောကြားထားသည်။

ဤဥပဒေအရ တားမြစ်ချက်ကို ချိုးဖောက်သည့် ကျောင်းသား/သူများသည် ဦးစွာ ကျောင်းအာဏာပိုင်များနှင့် ၎င်းတို့၏ အုပ်ထိန်းသူများကြား ဆွေးနွေးမှုများ ပြုလုပ်ရမည်ဖြစ်သည်။ ထပ်ခါတလဲလဲ ချိုးဖောက်မှုများ ရှိလာပါက ကလေးနှင့် လူငယ်စောင့်ရှောက်ရေးဌာနသို့ အကြောင်းကြားသွားမည်ဖြစ်ပြီး မိသားစုများအနေဖြင့် ယူရို ၈၀၀ (အမေရိကန်ဒေါ်လာ ၇၆၀) အထိ ငွေဒဏ်ပေးဆောင်ရနိုင်ခြေ ရှိသည်။

လစ်ဘရယ်ဝါဒီ Neos ပါတီ၏ လွှတ်တော်ခေါင်းဆောင် Yannick Shetty က ဤအစီအမံသည် မည်သည့်ဘာသာတရားကိုမျှ ပစ်မှတ်ထားခြင်းမဟုတ်ဘဲ မိန်းကလေးငယ်များ၏ လွတ်လပ်ခွင့်ကို ကာကွယ်စောင့်ရှောက်ရန် ရည်ရွယ်ကြောင်းနှင့် ၎င်းသည် ကလေးငယ်ပေါင်း ၁၂,၀၀၀ ခန့်အပေါ် သက်ရောက်မှုရှိမည်ဖြစ်ကြောင်း ပြောကြားခဲ့သည်။

အလားတူ ၂၀၁၇ ကလည်း သြစတြီးယားနိုင်ငံတွင် အများပြည်သူသွားလာရာနေရာများ၌ မျက်နှာတစ်ခုလုံးကို ဖုံးအုပ်ထားသည့် မွတ်စလင်အမျိုးသမီးများ၏ မျက်နှာဖုံးဝတ်စုံများကို တားမြစ်သည့် ဥပဒေတစ်ရပ် ပြဋ္ဌာန်းခဲ့ကြောင်း နိုင်ငံတကာသတင်းများတွင် တွေ့မြင်ရသည်။

ဆံပင်စတင်ပေါက်ရောက်ရာနေရာမှ မေးစေ့အထိ မျက်နှာကို မြင်သာစေရမည်ဟု ပြဋ္ဌာန်းထားသော ဤဥပဒေသည် သြစတြီးယားနိုင်ငံ၏ တန်ဖိုးများကို ကာကွယ်စောင့်ရှောက်ရန် ရည်ရွယ်ကြောင်း အစိုးရက ပြောကြားသည်။

အစွန်းရောက် လက်ယာယိမ်း Freedom Party (လွတ်လပ်ရေးပါတီ) အနေဖြင့် အားကောင်းလာနိုင်ခြေရှိသည့် အထွေထွေရွေးကောက်ပွဲ မကျင်းပမီကာလတွင် ဤဥပဒေ ကို ပြဋ္ဌာန်းခဲ့ခြင်းဖြစ်သည်။

သြစတြီးယားနိုင်ငံရှိ မွတ်စလင်များအနက် အလွန်နည်းပါးသော အရေအတွက်သာလျှင် မျက်နှာတစ်ခုလုံးကို ဖုံးအုပ်သည့် ဝတ်စုံများကို ဝတ်ဆင်ကြသည်ဟု ဆိုကာ မွတ်စလင်အဖွဲ့အစည်းများက ဤဥပဒေကို ကန့်ကွက်ခဲ့ကြသည်။

သြစတြီးယားနိုင်ငံတွင် အမျိုးသမီး ၁၅၀ ခန့်သည် ဘူကာဝတ်စုံအပြည့်ကို ဝတ်ဆင်လေ့ရှိသည်ဟု ခန့်မှန်းရသော်လည်း၊ ဤစည်းမျဉ်းများကြောင့် ပင်လယ်ကွေ့ဒေသမှ လာရောက်လည်ပတ်သူများ လျော့နည်းသွားနိုင်သည်ဟု ခရီးသွားလုပ်ငန်း တာဝန်ရှိသူများက စိုးရိမ်ပူပန်မှု ထုတ်ဖော်ပြောကြားထားသည်။

အစ္စလာမ့်မျက်နှာဖုံးဝတ်စုံ - ဥရောပတစ်ဝန်း ဆွေးနွေးငြင်းခုံမှုများ

ဟီဂျာ့ဘ် (hijab)၊ နီကာ့ဘ် (niqab) နှင့် ဘူကာ (burka) တို့အကြား ကွာခြားချက်များမှာ အဘယ်နည်း။

ပြင်သစ်နှင့် ဘယ်လ်ဂျီယံနိုင်ငံတို့သည် ၂၀၁၁ ခုနှစ်တွင် ဘူကာဝတ်စုံ တားမြစ်ချက်ကို ပြဋ္ဌာန်းခဲ့ပြီး နယ်သာလန်နိုင်ငံတွင်လည်း အလားတူ အစီအမံတစ်ခုကို လွှတ်တော်၌ ဆွေးနွေးဆောင်ရွက်ခဲ့သည်။

ဂျာမနီနိုင်ငံတွင် "ဥပဒေအရ ဖြစ်နိုင်ခြေရှိသည့် နေရာတိုင်း၌" မျက်နှာတစ်ခုလုံးကို ဖုံးအုပ်သည့် ဝတ်စုံကို တားမြစ်သင့်သည်ဟု ဂျာမန်ဝန်ကြီးချုပ် အင်ဂျလာ မာကယ်က ပြောကြားထားသည်။ ယူကေ (ဗြိတိန်) နိုင်ငံတွင်မူ နီကာ့ဘ် သို့မဟုတ် ဘူကာဝတ်စုံများကို တားမြစ်ထားခြင်း မရှိပါ။

နီကာ့ဘ်ဆိုသည်မှာ မျက်လုံးဝန်းကျင်နေရာကို ပွင့်လင်းမြင်သာစေပြီး မျက်နှာကို ဖုံးအုပ်ထားသည့် ဝတ်စုံတစ်မျိုး ဖြစ်သည်။ သို့သော် မျက်လုံးနေရာအတွက် သီးခြားဖုံးအုပ်သည့် အပိုင်းနှင့် တွဲဖက်ဝတ်ဆင်နိုင်ပါသည်။ ၎င်းကို ခေါင်းစည်းပုဝါနှင့် တွဲဖက်ဝတ်ဆင်လေ့ရှိသည်။

ဘူရ်ကာ (Burka) သည် အစ္စလာမ်ဘာသာဝင် အမျိုးသမီးများ ဝတ်ဆင်ကြသော ခန္ဓာကိုယ်နှင့် မျက်နှာကို ဖုံးအုပ်သည့် အဝတ်အစားများအနက် ကိုယ်ခန္ဓာကို အလုံခြုံဆုံးနှင့် အများဆုံး ဖုံးအုပ်ထားသည့် ပုံစံမျိုး ဖြစ်သည်။ ၎င်းသည် မျက်နှာနှင့် ခန္ဓာကိုယ်တစ်ခုလုံးကို ဖုံးအုပ်ထားသော အဝတ်အစားတစ်စုံတည်းဖြစ်ပြီး၊ အပြင်ဘက်ကို မြင်နိုင်ရန်အတွက် မျက်လုံးနေရာတွင် ဇာကွက်ပါသော အကာတစ်ခုသာ ပါရှိလေ့ရှိသည်။

အစ္စလာမ်ဘာသာဝင်အမျိုးသမီးများ ဝတ်ဆင်လေ့ရှိသော ဘူရ်ကာ (burqa) ဝတ်စုံကို ဝတ်ဆင်ကာ အသွင်ပြောင်းလဲ၍ လှုပ်ရှားသည့် အကြမ်းဖက်သမားများကို တားဆီးရန်အတွက် ဆီနီဂေါနိုင်ငံတွင် ယင်းဝတ်စုံကို ပိတ်ပင်ရေးကိစ္စ ဆွေးနွေးခဲ့ကြသည်။

အနောက်အာဖရိကတွင် Boko Haram (ဘိုကိုဟာရမ်) အကြမ်းဖက်အဖွဲ့၏ လှုပ်ရှားမှုများ အားကောင်းလာခြင်းကြောင့်၊ ဆီနီဂေါနိုင်ငံသည် ကွန်ဂိုသမ္မတနိုင်ငံ၊ ချဒ်နှင့် ကင်မရွန်းနိုင်ငံတို့နည်းတူ အစ္စလာမ်ဘာသာဝင်အမျိုးသမီးအချို့ ဝတ်ဆင်လေ့ရှိသော ရိုးရာဝတ်စုံ (ဘူရ်ကာ) ကို တားမြစ်ပိတ်ပင်ရေးကိစ္စကို စဉ်းစားသုံးသပ်ခဲ့ကြခြင်းဖြစ်သည်။

အနောက်အာဖရိကနိုင်ငံဖြစ်သော ဆီနီဂေါတွင် အစ္စလာမ်အစွန်းရောက်ဝါဒနှင့် ပတ်သက်သည့် စိုးရိမ်ပူပန်မှုများ မြင့်တက်လာချိန်၌ ဘူရ်ကာဝတ်စုံကို နိုင်ငံတစ်ဝန်းလုံးတွင် ပိတ်ပင်ရန် စဉ်းစားခဲ့ရခြင်း ဖြစ်သည်။

The Guardian သတင်းဌာန၏ ဖော်ပြချက်အရ ပြည်ထဲရေးဝန်ကြီး Abdoulaye Daouda က အစ္စလာမ်ဘာသာဝင် အများစုနေထိုင်ရာ ဤနိုင်ငံတွင် မျက်လုံးသာပေါ်နေစေပြီး ခန္ဓာကိုယ်တစ်ခုလုံးကို ဖုံးအုပ်ထားသည့် ဘူရ်ကာဝတ်စုံ ဝတ်ဆင်ခြင်းကို အမျိုးသမီးများအား တားမြစ်သည့် အမိန့်ကို အကောင်အထည်ဖော်သွားမည်ဟု ပြောကြားခဲ့သည်။

ဤလုပ်ဆောင်ချက်သည် နိုင်ငံတော်လုံခြုံရေးဆိုင်ရာ ကိစ္စရပ်တစ်ခုဖြစ်ပြီး အစွန်းရောက်သမားများက ၎င်းတို့၏ အထောက်အထားကို ဖုံးကွယ်ရန်အတွက် ယင်းဝတ်စုံကို အသုံးပြုခြင်းမှ တားဆီးနိုင်ရန် ရည်ရွယ်ထားကြောင်း Mr. Daouda က ပြောကြားခဲ့သည်။

"ဘူရ်ကာဝတ်စုံက ဘာသာရေးဆိုင်ရာ ကိစ္စရပ်တစ်ခု မဟုတ်ပါဘူး။ ခန္ဓာကိုယ်တစ်ခုလုံးကို ဖုံးအုပ်ထားတဲ့ ဝတ်စုံ (full veil) ကြောင့် လုံခြုံရေးဆိုင်ရာ ပြဿနာတွေ ဖြစ်ပေါ်လာတဲ့အခါ ဆီနီဂေါနိုင်ငံသားအားလုံးက ဒီကိစ္စမှာ သမ္မတကို ထောက်ခံခဲ့ပါတယ်။ ကျွန်တော်တို့အနေနဲ့ ဒီဝတ်စုံကို ပိတ်ပင်တဲ့လမ်းစဉ်ကို သေချာပေါက် လျှောက်လှမ်းသွားမှာဖြစ်ပြီး ဒီဆုံးဖြတ်ချက်ကို လက်တွေ့အကောင်အထည်ဖော်နိုင်ဖို့ ဆောင်ရွက်သွားမှာပါ" ဟု Daouda က ဆီနီဂေါနိုင်ငံ၏ RFM ရေဒီယိုဌာနတွင် ပြောကြားခဲ့သည်။

မကြာသေးမီနှစ်များအတွင်း ဆီနီဂေါနိုင်ငံသည် Boko Haram အဖွဲ့၏ အကြမ်းဖက်မှုများနှင့် ပတ်သက်၍ စိုးရိမ်ပူပန်မှုများ တိုးပွားလာခဲ့သည်။ အဆိုပါ အစ္စလာမ်အစွန်းရောက်အဖွဲ့သည် အနောက်အာဖရိကတွင် အခြေစိုက်ပြီး နိုင်ဂျီးရီးယားနှင့် ၎င်း၏ မြောက်ဘက်အိမ်နီးချင်းနိုင်ငံများတွင် ဆိုးရွားသော အကြမ်းဖက်မှုများကို ကျူးလွန်ခဲ့သည်။

လူဦးရေ၏ ၉၄ ရာခိုင်နှုန်းမှာ အစ္စလာမ်ဘာသာဝင်များဖြစ်သည့် ဤနိုင်ငံတွင် ဘူရ်ကာဝတ်စုံကို ပိတ်ပင်နိုင်ခြေရှိခြင်းက ဆွေးနွေးငြင်းခုံမှုများကို ဖြစ်ပေါ်စေခဲ့သည်။

"ဆီနီဂေါမှာ ဒါကို ပြဋ္ဌာန်းလိုက်ရင် လူမှုရေးမတည်ငြိမ်မှုတွေ ဖြစ်ပေါ်လာနိုင်ပါတယ်။ ကြိုတင်ကာကွယ်ရေး အစီအမံတွေနဲ့ တစ်ဦးချင်းစီရဲ့ လွတ်လပ်ခွင့်ကို လေးစားလိုက်နာမှုကြားမှာ သိမ်မွေ့နက်နဲတဲ့ ခြားနားချက်တစ်ခု ရှိနေပါတယ်" ဟု ဒါကာမြို့အခြေစိုက် သုတေသီ Khadim Mbacke က The Guardian သို့ ပြောကြားခဲ့သည်။

၂၀၁၅ခုနှစ်၊ ဇူလိုင်လတွင် ကင်မရွန်းနိုင်ငံသည် ဘူကာ (burqa) ဝတ်ဆင်ထားသော အမျိုးသမီးများ သယ်ဆောင်လာသည့် ဗုံးများကြောင့် လူအနည်းဆုံး ၁၄ ဦး သေဆုံးခဲ့ရပြီးနောက်၊ အမျိုးသမီးများအား ဘူကာနှင့် မျက်နှာဖုံးအုပ်သည့် ပဝါများ ဝတ်ဆင်ခြင်းကို တားမြစ်ပိတ်ပင်ခဲ့သည်။

ထိုလအတွင်းမှာပင် နိုင်ငံ၏မြို့တော် N'Djamena ၌ လူပေါင်း ၃၃ ဦး သေဆုံးခဲ့ရသည့် အသေခံဗုံးခွဲတိုက်ခိုက်မှုများ ဖြစ်ပွားခဲ့ပြီးနောက် ချဒ်နိုင်ငံသည် ဘူရ်ကာ (burqa) ဝတ်စုံ ဝတ်ဆင်ခြင်းကို တားမြစ်ပိတ်ပင်ခဲ့သည်။

သို့သော် ဤတားမြစ်ချက်သည် နိုင်ငံအတွင်း အကြမ်းဖက်မှုအန္တရာယ်ကို လျှော့ချနိုင်မည့် အာမခံချက်ရှိသော ဖြေရှင်းနည်းလမ်းတစ်ခု မဟုတ်ခဲ့ပေ။

ချဒ်နိုင်ငံက တားမြစ်ချက်ထုတ်ပြန်ပြီး ရက်ပိုင်းအကြာမှာပင် ဘူရ်ကာဝတ်စုံဖြင့် ဟန်ဆောင်ထားသည့် အမျိုးသားတစ်ဦးသည် N'Djamena မြို့ရှိ ဈေးကြီးတစ်ခု၌ အသေခံ ဗုံးခွဲတိုက်ခိုက်ခဲ့ရာ လူ ၁၅ ဦး သေဆုံးပြီး ၈၀ ဦး ဒဏ်ရာရရှိခဲ့သည်။

Boko Haram အဖွဲ့အား ဆန့်ကျင်သည့် စစ်ဆင်ရေးများကို နိုင်ငံတွင်းရှိ ရဲတပ်ဖွဲ့က တိုးမြှင့်လုပ်ဆောင်ပြီး ရက်ပိုင်းအကြာတွင် ဆီနီဂေါ အရာရှိတစ်ဦး၏ ဤမှတ်ချက်စကား ထွက်ပေါ်လာခြင်း ဖြစ်သည်။ နိုင်ဂျီးရီးယား အခြေစိုက် သူပုန်အဖွဲ့နှင့် ဆက်နွှယ်မှုရှိသည်ဟု စွပ်စွဲခံထားရသော အစ္စလာမ်ဘာသာရေးခေါင်းဆောင် (Imam) လေးဦးကို ဖမ်းဆီးထားကြောင်း AP သတင်းဌာနက ဖော်ပြခဲ့သည်။

(နိုင်ငံတကာသတင်းများအား ကိုးကားဖော်ပြသည်)

နောင်တော်လေး (ဘိုကလေး)

#News #Myanmar