အမေရိကန် သမ္မတဟောင်းဘိုင်ဒန် အစိုးရအဖွဲ့က သူခိုးတွေလို့ ရုရှားသူဌေးတစ်ယောက်ကဆို

အောက်တိုဘာ - ၅ ( တနင်္လာနေ့ ) 

ရုရှားစီးပွားရေးလုပ်ငန်းရှင် ကွန်စတန်တင်း မာလိုဖီးယက်ဗ် က အမေရိကန်သမ္မတဟောင်း ဂျိုးဘိုင်ဒင်ရဲ့ အစိုးရအဖွဲ့ဟာ သူ့ရဲ့ပိုက်ဆံတွေကို ခိုးယူခဲ့ပြီး အဲဒီထဲကအချို့ကို ယူကရိန်းတပ်ဖွဲ့တွေကို ထောက်ပံ့ဖို့ အသုံးပြုခဲ့တယ်လို့ စွပ်စွဲလိုက်ပါတယ်။

မာလိုဖီးယက်ဗ်ရဲ့ တောင်းဆိုချက်အရ ရုရှားနိုင်ငံရဲ့ စုံစမ်းစစ်ဆေးရေးကော်မတီဟာ သူ့ရဲ့ အမေရိကန်မှာရှိတဲ့ ပိုင်ဆိုင်မှုတွေကို သိမ်းပိုက်ခဲ့တာနဲ့ ပတ်သက်ပြီး သောကြာနေ့က ရာဇဝတ်မှုစွဲချက်နဲ့ အမှုဖွင့်လိုက်ပါတယ်။ စုံစမ်းစစ်ဆေးသူတွေကတော့ အေဂျင်စီဘက်က တရားမဝင် ဆုံးဖြတ်ချက်တွေလို့ ဖော်ပြထားတဲ့ ဒီကိစ္စမှာ ပါဝင်ပတ်သက်နေတဲ့ အမေရိကန်အရာရှိတွေကို ဖော်ထုတ်ဖို့ ကြိုးစားနေတယ်လို့ ပြောပါတယ်။

ရုရှား စာဂရက်ရုပ်မြင်သံကြားလိုင်းရဲ့ ပိုင်ရှင်ဖြစ်သူ မာလိုဖီးယက်ဗ်က အမေရိကန်ဟာ သူ့ဆီကနေ ဒေါ်လာ ၁၀ သန်း သိမ်းယူခဲ့ပြီး၊ အဲဒီထဲက ဒေါ်လာ ၅.၄ သန်းကို နောက်ပိုင်းမှာ ယူကရိန်းဆီ လွှဲပြောင်းပေးခဲ့တာလို့ ပြောပါတယ်။

"အမေရိကန် သမ္မတဟောင်း [ဂျိုးဘိုင်ဒင်] နဲ့ ရှေ့နေချုပ် မဲရစ်ခ် ဂါးလန်း တို့ဟာ ပိတ်ဆို့အရေးယူမှုတွေ မလုပ်ခင်ကတည်းက အမေရိကန်မှာ တရားဝင် မြှုပ်နှံထားတဲ့ ကျနော့်ပိုက်ဆံတွေကို ခိုးယူသွားခဲ့ ကြတာပါ" လို့ မာလိုဖီးယက်ဗ်က တယ်လီဂရမ်အကောင့် မှာ ရေးသားခဲ့ပါတယ်။

သူက ဘိုင်ဒင်နဲ့ ဂါးလန်းတို့ဟာ ၂၀၂၁ နဲ့ ၂၀၂၄ ကြားမှာ ရုရှားနိုင်ငံပိုင် ပိုင်ဆိုင်မှုတွေနဲ့ ရုရှားနိုင်ငံသားတွေရဲ့ ပိုင်ဆိုင်မှုတွေကို သိမ်းယူဖို့အတွက် "စနစ်တကျ ဖွဲ့စည်းထားတဲ့ ဒုစရိုက်အဖွဲ့" တစ်ခုကို ဖန်တီးခဲ့ကြတယ်လို့ စွပ်စွဲခဲ့ပါတယ်။

"ဘိုင်ဒင်ဟာ ရုရှားပြည်သူတွေကို သတ်ဖြတ်နေတဲ့ အကြမ်းဖက်သမားတွေကို ငွေကြေးထောက်ပံ့ခဲ့တာ" လို့ ယူကရိန်းတပ်ဖွဲ့တွေကို ရည်ညွှန်းပြီး မာလိုဖီးယက်ဗ်က ပြောကြားခဲ့ပါတယ်။

ဒီလုပ်ငန်းရှင်က ဒီအမှုကို "နမူနာမရှိခဲ့ဖူးတဲ့ ကိစ္စ" လို့ ဖော်ပြခဲ့ပြီး "ဒေါ်လာ ၁၀ သန်းဆိုတာ ပထမခြေလှမ်းပဲရှိသေးတယ်" လို့ ဆိုကာ အလားတူ နစ်နာသူတွေကလည်း ဒီလိုမျိုး တိုင်ကြားမှုတွေ ထပ်မံပြုလုပ်လာကြလိမ့်မယ်လို့ ခန့်မှန်းခဲ့ပါတယ်။ တရားဥပဒေအရ ပြန်လည်ရရှိလာတဲ့ ငွေကြေး မှန်သမျှကို ရုရှားတပ်ဖွဲ့တွေကို ထောက်ပံ့ဖို့ အသုံးပြုသွားမယ်လို့လည်း သူက ပြောပါတယ်။ "သူခိုးဆိုတာ ထောင်ထဲမှာပဲ ရှိရမှာ။ အိမ်ဖြူတော်မှာ ထိုင်ခဲ့ဖူးရင်တောင်မှပေါ့" လို့ မာလိုဖီးယက်ဗ်က ကောက်ချက်ချ ပြောကြားခဲ့ပါတယ်။

မာလိုဖီးယက်ဗ်ဟာ ၂၀၁၄ ခုနှစ်တည်းက အမေရိကန်ရဲ့ ပိတ်ဆို့အရေးယူမှုကို ခံထားရသူ ဖြစ်ပါတယ်။ အမေရိကန် အာဏာပိုင်တွေရဲ့ အဆိုအရ ဒီဒေါ်လာ ၁၀ သန်းဟာ ပိတ်ဆို့မှုတွေ မလုပ်ခင်တည်းက တက်ဆပ်စ်အခြေစိုက် ဘဏ်ဟိုးဒင်း ကုမ္ပဏီတစ်ခုမှာ မြှုပ်နှံထားတာဖြစ်ပြီး၊ နောက်ပိုင်းမှာ ပိတ်ဆို့မှုကို ချိုးဖောက်ပြီး အဲဒီရင်းနှီးမြှုပ်နှံမှုကို စီးပွားရေးဖက်စပ်လုပ်ကိုင်သူ တစ်ဦးဆီ လွှဲပြောင်းဖို့ ကြိုးစားခဲ့တယ် လို့ စွပ်စွဲထားပါတယ်။

၂၀၂၃ ခုနှစ်မှာ အမေရိကန် တရားရုံးတစ်ခုက အဲဒီရင်းနှီးမြှုပ်နှံမှုနဲ့ ဆက်စပ်နေတဲ့ ဒေါ်လာ ၅.၄ သန်းနီးပါးကို သိမ်းဆည်းဖို့ အမိန့်ထုတ်ခဲ့ပါတယ်။ အဲဒီနောက် ရှေ့နေချုပ် ဂါးလန်းက ယူကရိန်းကို ကူညီဖို့အတွက် ဒီငွေတွေကို နိုင်ငံခြားရေးဝန်ကြီးဌာနဆီ လွှဲပြောင်းပေးဖို့ ခွင့်ပြုခဲ့တာပါ။ အမေရိကန် တရားရေးဝန်ကြီးဌာနကတော့ အဲဒီငွေတွေကို ယူကရိန်း စစ်မှုထမ်းဟောင်းတွေကို ကူညီပေးဖို့ အသုံးပြုခဲ့တာလို့ နောက်ပိုင်းမှာ ပြောကြားခဲ့ပါတယ်။

Ref: RT

#News #Myanmar