ပွင့်ဖြူမြို့နယ်၌ ဒေသခံပြည်သူများ ကိုဗစ်-၁၉ရောဂါ ကင်းဝေးစေရန် ကာကွယ်ဆေး ဆက်လက် ထိုးနှံပေးလျက်ရှိ

MNP - ဖေဖော်ဝါရီ    ၁၃

မကွေးတိုင်းဒေသကြီး၊ ပွင့်ဖြူမြို့နယ်အတွင်းရှိ ဒေသခံပြည်သူများ ကိုဗစ်-၁၉ရောဂါ အန္တရာယ်ကင်းဝေးစေရေးအတွက် ကာကွယ်ဆေး ထိုးနှံပေးခြင်း လုပ်ငန်းကို ဆေးထိုးစုရပ်(၄)နေရာတွင် ကျန်းမာရေး ဝန်ထမ်းများက သတ်မှတ်စည်းကမ်း ချက်များနှင့် အညီ စနစ်တကျ ဆက်လက်ထိုးနှံ ဆောင်ရွက်ပေးလျက်ရှိရာ ယမန်နေ့ နံနက်ပိုင်းက သတ်မှတ် ဆေးထိုးစုရပ်များအလိုက် ကာကွယ်ဆေးလာရောက် ထိုးနှံလျက် ရှိကြောင်း ပွင့်ဖြူမြို့နယ် အထွေထွေအုပ်ချုပ်ရေး ဦးစီးဌာနရုံးမှ သိရသည်။

ဒေသခံပြည်သူများအား ကိုဗစ်-၁၉ရောဂါ ကင်းဝေးစေရေးအတွက် ဆေးထိုးစုရပ် (၄)နေရာခွဲ၍  ကာကွယ်ဆေး ထိုးနှံပေးရာတွင် မြို့နယ်စီမံ အုပ်ချုပ်ရေးအဖွဲ့၏ ဦးဆောင်မှုဖြင့် မြို့နယ်အထွေထွေ အုပ်ချုပ်ရေး ဦးစီးဌာနရုံး ဗိုလ်ဥတ္တမခန်းမ၊ လယ်ကိုင်းကျေးရွာရှိ နိဗ္ဗာန်(တ)ကျောင်း၊ ကုန်းဇောင်းကျေးရွာတိုက်နယ်ဆေးရုံ၊ မဲဇလီကျေးရွာ ကျေးလက်ကျန်းမာ ရေးဌာနတို့တွင် ထိုးနှံဆောင်ရွက်ပေးနေကြောင်း သိရသည်။

ကာကွယ်ဆေး လာရောက်ထိုးနှံကြသူများ အဆင်ပြေစွာ ထိုးနှံနိုင်ရေးအတွက် မြို့နယ်အထွေထွေ အုပ်ချုပ်ရေး ဦးစီးဌာနမှ ဝန်ထမ်းများ၊ စေတနာ့ဝန်ထမ်း (Volunteer)အဖွဲ့ဝင်များက လိုအပ်သည်များကို ပူးပေါင်းကူညီဆောင်ရွက် ပေးကြကြောင်းသိရကာ ယမန်နေ့ ဆေးထိုးစုရပ် (၄)နေရာတွင် ကာကွယ်ဆေး လာရောက်ထိုးနှံမှုအနေဖြင့် ပထမအကြိမ် ကာကွယ်ဆေး လာရောက်ထိုးနှံသူ ၁၆၉ ဦး၊ ဒုတိယအကြိမ် ကာကွယ်ဆေး လာရောက်ထိုးနှံသူဦးရေ  ၃၀၄ ဦး ရှိကြောင်း သိရသည်။

ပွင့်ဖြူမြို့နယ်၌ ဒေသခံပြည်သူများ ကိုဗစ်-၁၉ရောဂါ ကင်းဝေးစေရန်နှင့် ရောဂါကူးစက် ပြန့်ပွားမှု လျော့နည်းပပျောက်စေရေးအတွက် ကာကွယ်ဆေး ထိုးနှံရန်ကျန်ရှိသူများ ကိုလည်း သတ်မှတ်ဆေးထိုးစုရပ်များတွင် မဖြစ်မနေ ကာကွယ်ဆေး သွားရောက် ထိုးနှံကြရန် သက်ဆိုင်ရာ ရပ်ကွက်/ကျေးရွာ အုပ်ချုပ်ရေးမှူးများနှင့် ဌာနဆိုင်ရာများ ပူးပေါင်းအဖွဲ့က အသံချဲ့စက်ဖြင့် အသိပေးနှိုးဆော်ခြင်းများ အရှိန်အဟုန်မြှင့် ဆောင်ရွက်ပေး လျက်ရှိကြောင်း ပွင့်ဖြူမြို့နယ် စီမံအုပ်ချုပ်ရေး အဖွဲ့ဥက္ကဋ္ဌ ဦးအောင်မြတ်ခိုင်ထံမှ သိရသည်။

သတင်း - ရဲဝင်း

မြန်မာနေရှင်နယ်ပိုစ့်