ပြည်ထောင်စုဝန်ကြီး ဦးအောင်သန်းဦး ရန်ကုန်တိုင်းဒေသကြီး၊ သာကေတမြို့နယ်ရှိ ကမ်းလွန်ရေနံ အခြေစိုက်စခန်း၏ လုပ်ငန်းဆောင်ရွက်မှုကို ကြည့်ရှုစစ်ဆေး

MNP ၊ ဧပြီ ၂၆

လျှပ်စစ်နှင့် စွမ်းအင်ဝန်ကြီးဌာန ပြည်ထောင်စုဝန်ကြီး ဦးအောင်သန်းဦးသည် ယနေ့၊ မွန်းလွဲပိုင်းတွင် ရန်ကုန်တိုင်းဒေသကြီး၊ သာကေတမြို့နယ်ရှိ မြန်မာ့ရေနံနှင့်သဘာဝ ဓာတ်ငွေ့လုပ်ငန်း၊ ကမ်းလွန်ရေနံ အခြေစိုက်စခန်း၏ လုပ်ငန်းဆောင်ရွက်မှုကို သွားရောက်ကြည့်ရှု စစ်ဆေးသည်။

ရှေးဦးစွာ ပြည်ထောင်စုဝန်ကြီးနှင့်အဖွဲ့သည် သာကေတမြို့နယ်ရှိ မြန်မာ့ရေနံနှင့် သဘာဝ ဓာတ်ငွေ့လုပ်ငန်း၊ ကမ်းလွန်ရေနံအခြေစိုက်စခန်း(သာကေတ)သို့ ရောက်ရှိပြီး ကမ်းလွန်အခြေစိုက် စခန်းအတွင်းရှိ ဆိပ်ခံ တံတားများ အဆင့်မြှင့်တင်တည်ဆောက်ပြီးစီးမှု၊ စီမံကိန်းလုပ်ငန်းနေရာများ၊ ရေလုံသင်္ဘောကျင်း (Dry Dock)၊ ပစ္စည်းစီမံဌာနပိုက်စင်၊ ဂိုဒေါင်များနှင့် လုပ်ငန်းကျွမ်းကျင်မှု သင်တန်းဖွင့်လှစ်မည့် အစီအမံများနှင့် သင်တန်းခန်းမတို့ကို လှည့်လည်ကြည့်ရှုစစ်ဆေးရာ  မြန်မာ့ရေနံနှင့်သဘာဝဓာတ်ငွေ့လုပ်ငန်း ဦးဆောင် ညွှန်ကြားရေးမှူး ဦးအောင်မင်းနှင့်  စခန်းတာဝန်ခံ အထွေထွေမန်နေဂျာ ဦးတင်ထွန်းနိုင်တို့က လိုက်လံရှင်းလင်း တင်ပြကြသည်။

ရှင်းလင်းတင်ပြချက်များအပေါ် ပြည်ထောင်စုဝန်ကြီးက  ကမ်းလွန်ရေနံအခြေစိုက်စခန်း (သာကေတ)သည် ရေနံနှင့် သဘာဝဓာတ်ငွေ့ ရှာဖွေတူးဖော်ထုတ်လုပ်ရေးအတွက် အရေးပါသော အခန်းကဏ္ဍမှ ပါဝင်ပံ့ပိုးပေး နေသောဌာနတစ်ခုဖြစ်ပါကြောင်း၊ ရေနံလုပ်ငန်းသုံးပစ္စည်းများ ထိန်းသိမ်းသိုလှောင်ရာတွင် သတ်မှတ်စံချိန်စံ ညွှန်းများနှင့်အညီ ဆောင်ရွက်ရန်ဖြစ်ကြောင်း၊ ယာဉ်နှင့် ယန္တရားအရံပစ္စည်းများအား စနစ်တကျ စာရင်းဇယားဖြင့် ထိန်းသိမ်းခြင်း၊ ဖြန့်ဝေခြင်းနှင့် ဝယ်ယူဖြည့်တင်းခြင်းတို့ကို အချိန်နှင့်တစ်ပြေးညီ ပြုစု ထားရန်ဖြစ်ကြောင်း၊ လိုအပ်သောရေနံမြေများကို အချိန်မီ ဖြန့်ဝေပေးနိုင်ရေး၊ စတိုလက်ကျန် ပစ္စည်းစာရင်းများ ဖြန့်ဝေထားရန် လိုအပ်ကြောင်း၊ စက်ပစ္စည်းများ ပြုပြင်ထိန်းသိမ်းခြင်းအတွက် ကျွမ်းကျင် ဝန်ထမ်းများ ပြန်လည်စုစည်းကာဝန်ထမ်းများကို သင်တန်းများဖွင့်လှစ်ပို့ချရန်ဖြစ်ကြောင်း၊ လုပ်ငန်းသုံးနှင့် ဝန်ထမ်း အိမ်ရာများအတွက် လိုအပ်သော ရေသန့်အလုံအလောက်ရရှိရေးအတွက် ဖြည့်ဆည်း ဆောင်ရွက် ပေးရန်ဖြစ်ကြောင်း၊ ကမ်းလွန်ရေနံ အခြေစိုက်စခန်း(သာကေတ)ဝန်းအတွင်းနှင့် ဝန်ထမ်းအိမ်ရာများတွင် သန့်ရှင်းသာယာလှပရေး၊ မီးဘေးအန္တရာယ်နှင့် လုံခြုံရေးသတိပြု ဆောင်ရွက်ရန်ဖြစ်ကြောင်း၊ မိမိတို့ အသုံးပြုလိုသော လက်ကျန်ပစ္စည်းများကို စနစ်တကျ ထိန်းသိမ်းရန်နှင့် မလိုအပ်သောပစ္စည်းများ စာရင်း ရှင်းလင်းပယ်ဖျက်ရေး လုပ်ထုံးလုပ်နည်းနှင့်အညီ ဆက်လက်ဆောင်ရွက်ရန်ဖြစ်ကြောင်း၊ ဆိပ်ခံတံတားများ၏ ကြံ့ခိုင်ရေး ပုံမှန်စစ်ဆေးပြီး ပြုပြင်ထိန်းသိမ်းထားရှိရန်တို့ကို မှာကြားသည်။

ကမ်းလွန်ရေနံ အခြေစိုက်စခန်း(သာကေတ)သည် ကုန်းတွင်းနှင့် ကမ်းလွန်ရေနံ ရှာဖွေတူးဖော် ထုတ်လုပ်ခြင်း များ အောင်မြင်စွာပြုလုပ်နိုင်စေရန် အထောက်အကူပြု လုပ်ငန်းများ ဆောင်ရွက်ပေး လျက်ရှိပြီး၊ ကုန်တွင်းနှင့် ကမ်းလွန်ရေနံရှာဖွေတူးဖော်ထုတ် လုပ်သည့် ပြည်တွင်း/ ပြည်ပမှဝယ်ယူထားသော လုပ်ငန်းသုံးပစ္စည်းများ လက်ခံသိုလှောင်၍ လိုအပ်သည့်နေရာဒေသများသို့ ထောက်ပံ့ပို့ဆောင် ဖြန့်ဖြူးပေးခြင်းလုပ်ငန်းများကို ဆောင်ရွက်ပေးနေသော Offshore Supply Base တစ်ခုဖြစ်သည်။

ထို့အပြင် ရန်ကုန်တိုင်း ဒေသကြီးအတွင်းရှိ သဘာဝဓာတ်ငွေ့ထိန်း/ဖြန့်စခန်းများ၊ အသုံးချ သုတေသန၊ ပိုက်လိုင်းအခြေစိုက်စခန်းများ၊ အောက်မြန်မာပြည် ရေနံမြေအစမ်းတွင်း ဒေသများတွင် တည်ဆောက်ပြုပြင် ထိန်းသိမ်းခြင်းလုပ်ငန်းများ၊ လုပ်ငန်းသုံးပစ္စည်းများ၊ စက်ယန္တရားများ ထောက်ပံ့ပို့ဆောင်ပေးခြင်း လုပ်ငန်းများနှင့် လုပ်ငန်းပိုင်သင်္ဘောများ လွန်းတင်ပြုပြင်ခြင်း လုပ်ငန်းများကို ထောက်ပံ့ကူညီဆောင်ရွက် လျက်ရှိကြောင်း  သိရသည်။

https://t.me/MyanmarNationalPost