ကျောက်ဖြူမြို့တွင် မြန်မာ့ရိုးရာ နှစ်သစ်ကူး မဟာသင်္ကြန်ပွဲတော် အတက်နေ့ကို အေးချမ်းပျော်ရွှင်စွာ ရေပက်ကစားသူများ၊ ရေကစားသူများစည်ကားလျက်ရှိ

MNP - ဧပြီ   ၁၆

ရခိုင်ပြည်နယ်၊ ကျောက်ဖြူခရိုင်၊ ကျောက်ဖြူမြို့တွင် မြန်မာ့ရိုးရာ နှစ်သစ်ကူးမဟာသင်္ကြန် အတက်နေ့ ဧပြီလ ၁၆ ရက်နေ့တွင် နံနက်ပိုင်းမှစတင်၍  ရေပက်ကစားသူများ၊ ရေပက်ခံကားများ၊ ရေပက်ခံ ထွက်သူများဖြင့် အထူးစည်ကားလျက်ရှိသည်။

ကျောက်ဖြူမြို့တွင် မဟာသင်္ကြန်နှစ်သစ်ကူးကာလ သင်္ကြန်အတက်နေ့၌ ဗဟိုမဏ္ဍပ်တွင် ခေတ်ပေါ်တေးဂီတများနှင့်အတူ ရခိုင်အဆိုတော် တေးသံရှင်များ၊ ယိမ်းအကအဖွဲ့များမှ ကပြဖျော်ဖြေ တင်ဆက်ခြင်း၊ သင်္ကြန်ချစ်သူများနှင့် ရေကစားကြသူများကို စတုဒိသာများဖြင့် ဧည့်ခံကျွေးမွေးခြင်းများအပြင် ရပ်ကွက်အသီးသီးတွင်လည်း မဏ္ဍပ်ကြီးများဆောက်လုပ်၍ နေအိမ် ရှေ့များတွင် ရခိုင်ရိုးရာ ဓနိလက်များဖြင့် မဏ္ဍပ်ငယ်များဆောက်လုပ်ပြီး မိသားစုများ၊ အသင်းအဖွဲ့များ၊ မိတ်ဆွေသူငယ်ချင်းများစုပေါင်း၍ ရေပက်ခံထွက်သူများအား ရေပက်ကစားကြကာ အေးချမ်း ပျော်ရွှင်စွာ စည်ကားလျက်ရှိသည်။

အဆိုပါ မြန်မာ့ရိုးရာနှစ်သစ်ကူးမဟာသင်္ကြန်ဗဟိုမဏ္ဍပ်၌ ရခိုင်အဆိုတော် တေးသံရှင်များ၊ ယိမ်းအက အဖွဲ့များအား ကျောက်ဖြူခရိုင်စီမံအုပ်ချုပ်ရေးအဖွဲ့ဥက္ကဋ္ဌနှင့်အဖွဲ့ဝင်များ၊ မြို့နယ်စီမံ အုပ်ချုပ်ရေး အဖွဲ့ဥက္ကဋ္ဌနှင့်အဖွဲ့ဝင်များ၊ ခရိုင်/မြို့နယ်ဌာနဆိုင်ရာများက ကြည့်ရှုအားပေးလျက်ရှိသည်။  မြို့ပေါ် ရပ်ကွက်များ၍ ရေပက်ခံမဏ္ဍပ် ၄၀ ကျော်ခန့်ရှိပြီး မြို့ပေါ်ရပ်ကွက်နေပြည်သူများအပြင် အခြားနီးစပ်ရာမြို့နယ်နှင့် ပြည်ပမှဧည့်သည်များပါ ကားများ၊ ဆိုင်ကယ်များဖြင့် လာရောက်ကာ ရေပက်ခံထွက်ပြီး အေးချမ်းစွာဖြင့်ရေကစားလျက်ရှိကြောင်းသိရှိရသည်။

သတင်း - တင်ထွန်းဦး၊ ဖြိုးဝေလင်း 

မြန်မာနေရှင်နယ်ပို့စ်