MNP - မေ ၂
ရှမ်းပြည်နယ်(အရှေ့ပိုင်း)၊ ကျိုင်းတုံခရိုင်၊ ကျိုင်းတုံမြို့၊ အသက်(၄၀)နှစ်နှင့်အထက် ရပ်ကွက်နေ ပြည်သူများအား ယနေ့ နံနက်က သတ်မှတ်ဆေးထိုးစုရပ် နေရာအသီးအသီးတွင် တာဝန်ရှိသူများက ကိုဗစ်-၁၉ ရောဂါကာကွယ်ဆေး Booster Dose ထပ်ဆောင်းကာကွယ် ဆေးစတင်ထိုး နှံဆောင်ရွက်ပေးကြောင်း သိရသည်။
ကာကွယ်ဆေးထိုးနှံပေးရာတွင် မြို့နယ်အုပ်ချုပ်ရေးမှူး ဦးလှိုင်းမောင်မောင် ကြီးကြပ်၍ ရပ်ကွက်အုပ်ချုပ်ရေးမှူးများ၊ ကျန်းမာရေးဝန်ထမ်းများနှင့် တာဝန်ရှိသူများက မြို့နယ်အတွင်း ရပ်ကွက်များမှ အသက်(၄၀)နှစ်အထက် ကိုဗစ်-၁၉ ရောဂါကာကွယ်ဆေး Covid Shield နှင့် Sino pharm နှစ်ကြိမ် ထိုးနှံပြီးစီးပြီး သတ်မှတ်ရက်ပြည့်သူများအား မြို့ပေါ်ရပ်ကွက်များနှင့် ကျေးရွာများရှိ ဆေးထိုးစုရပ်နေရာ အသီးအသီးတွင် ကိုဗစ်-၁၉ ရောဂါကာကွယ်ဆေး Booster Dose ထပ်ဆောင်းကာကွယ်ဆေးများ စနစ်တကျထိုးနှံဆောင်ရွက် ပေးလျက်ရှိကြောင်း သိရသည်။
ကိုဗစ်-၁၉ ရောဂါကာကွယ် ဆေး Booster Dose ထိုးနှံပေးခြင်းကို ကျိုင်းတုံမြို့ပေါ် အမှတ် (၁)နှင့်(၂) နေရပ်ကွက်နေပြည်သူများအား နောင်တုံဟိုက်ပါမားကတ် စုရပ်နေရာတွင်လည်း ကောင်း၊ အမှတ်(၃)၊ (၄)၊ (၅) ရပ်ကွက်နေပြည်သူများကို ပါလျှံဘုန်းကြီးကျောင်း စုရပ်နေရာ တွင်လည်းကောင်း တာဝန်ရှိသူများက ထိုးနှံဆောင်ရွက်ပေးကြောင်း ကျိုင်းတုံ မြို့နယ်ကိုဗစ်-၁၉ ရောဂါကာကွယ်ထိန်းချုပ် ကုသရေးကော်မတီထံမှ သိရသည်။
သတင်း - အောင်ဇင်မြင့်
မြန်မာနေရှင်နယ်ပို့စ်
No comments:
Post a Comment