MNP - ဇူလိုင် ၁၂
မန္တလေးတိုင်းဒေသကြီး၊ ညောင်ဦးခရိုင် ကျောက်ပန်းတောင်းမြို့တွင် ဝါဆိုဦးအလှူအရုဏ်ဆွမ်းလောင်း လှူကြရန်အတွက်၊ ယမန်နေ့နံနက်(၆)နာရီမှစတင်၍ ရပ်ကွက်အသီးသီးရှိ ဓမ္မာရုံများတွင် ဆွမ်း/ဆွမ်းဟင်းလောင်းလှူကြသူများ၊ ဘုန်းတော်ကြီးကျောင်းနှင့်စာသင်တိုက်အသီးသီးမှ ရဟန်း/သာမဏေများဖြင့် စည်ကားသိုက်မြိုက်လျက်ရှိကြောင်း သိရသည်။
ကျောက်ပန်းတောင်းမြို့နယ်တွင် ရပ်ကွက်/ကျေးရွာအသီးသီးရှိ ဓမ္မာရုံများတွင် ဝါတွင်းပတ်ဆွမ်းလောင်းလှူခြင်းများကို အပတ်စဉ်ဆောင်ရွက်လေ့ရှိရာ၊ ယခုဝါဆိုဦး ပထမပတ်တွင် မြို့ပေါ်ရပ်ကွက်များဖြစ်သည့် စံပြရပ်ကွက်၊ အောင်မင်္ဂလာရပ်ကွက်၊ မြို့မကွက်သစ်ရပ်ကွက်၊ ဘူတာရပ်ကွက်၊ ဈေးကွက်သစ်ရပ်ကွက်၊ လွတ်လပ်ရေးရပ်ကွက်၊ သာယာအေးရပ်ကွက်၊ ပြည် တော်သာရပ်ကွက်၊သီရိမင်္ဂလာရပ်ကွက် အစရှိသည့် ရပ်ကွက်အသီးသီးမှ ဆွမ်းလောင်းဓမ္မာရုံများတွင် နံနက်(၄)နာရီမှစတင်၍ ဆွမ်းချက်ရန်နှိုးဆော်သည့် တေးသံသာများ၊ တရားဓမ္မသံများဖြင့် စိတ်ကြည်နူးချမ်းမြေ့ဘွယ်ကြားနေရပြီး နံနက် ၅ နာရီခန့်မှ စတင်၍ မြို့ပေါ်လမ်းမများနှင့် ရပ်ကွက်ဓမ္မာရုံများတွင်ဘုန်းတော်ကြီးကျောင်းနှင့် စာသင်တိုက် အသီးသီး မှရဟန်း/သာမ ဏေများဖြင့် ပျားပန်းခတ်မျှစည်ကားလျှက်ရှိကြောင်းသိရသည်။ အဆိုပါ ဝါတွင်းပတ် ဆွမ်း/ဆွမ်းဟင်းလောင်းလှူခြင်းများကို ရပ်ကွက်အလိုက်ဓမ္မာရုံများတွင် ကျင်းပခြင်းဖြစ်ပြီး၊ တစ်ရပ်ကွက် နှင့်တစ်ရပ်ကွက်အချိန်မတိုက်ပဲ သွားလာမှုအစဉ်ပြေစေရန် ဆွမ်းလောင်းချိန်ကို ညှိနှိုင်းဆောင်ရွက်ကြခြင်းဖြစ်ပြီး၊ ဆွမ်းခံကြွရောက်တော်မူကြသည့် ရဟန်း/သာမဏေများအနေဖြင့်လည်း ရပ်ကွက်အသီးသီးသို့ အချိန်မီသွားလာ၍ ဆွမ်းခံကြွရောက်တော်မူနိုင်ကြရန် စီစဉ်ထားကြခြင်းဖြစ်ကြောင်း စံပြရပ် ကွက် မဟာဗောဓိဓမ္မာရုံ အကျိုးတော်ဆောင် တစ်ဦးကပြောပါသည်။ ၁၃၈၂ ခုနှစ်နှင့် ၁၃၈၃ ခုနှစ်များက ကိုဗစ်-၁၉ရောဂါ ကန့်သတ်ချက်များကြောင့် ဝါတွင်းကာလ ဆွမ်းလောင်းလှူခြင်းများကို ဆောင်ရွက်နိုင်ခဲ့ခြင်းမရှိပဲ ယမန်နှစ်က လပြည့်/ လကွယ်ရက်များတွင် ကိုဗစ်-၁၉ ကန့်သတ်ချက်များဖြင့် ဆောင်ရွက်နိုင်ခဲ့ပြီး၊ ယခုနှစ်တွင် အပတ်စဉ်ဆောင်ရွက်သွားမည်ဖြစ်ကြောင်းလည်းသိရသည်။
သတင်း - နေအောင်
မြန်မာနေရှင်နယ်ပို့စ်
No comments:
Post a Comment