Home
MNP - ဇူလိုင် ၁၈
ဧရာဝတီတိုင်းဒေသကြီး၊ ကျောင်းကုန်းမြို့နယ် စက်မှုလယ်ယာဦးစီးဌာန အမှတ် (၉) စက်မှုလယ်ယာစခန်း၌ ၂၀၂၂-၂၀၂၃ ဘဏ္ဍာရေးနှစ် လယ်ယာသုံးစက်ကိရိယာ မောင်းနှင်ထိန်းသိမ်းမှု (အခြေခံ)သင်တန်း ဖွင့်လှစ်ပွဲကို ယနေ့မွန်းလွဲ ၁၂:၃၀ နာရီ အချိန်ခန့်က အဆိုပါ စက်မှုလယ်ယာဦး စီးဌာနရုံးခန်းမတွင် ကျင်းပခဲ့သည်။
အခမ်းအနားတွင် မြို့နယ်စက်မှုလယ်ယာဦးစီးမှူး ဦးမင်းဇော်က အဖွင့်အမှာစကား ပြောကြားပြီး၊ သင်တန်းမှုး ဦးစီးမှုး ဦးကျော်မျိုးဝင်းက သင်တန်းစည်းမျဉ်းစည်းကမ်းများကို ရှင်းလင်းပြောကြားခဲ့သည်။ ထို့နောက် ဒုတိယဦးစီးမှုး ဦးကျော်ကျော်မြင့်က သင်တန်း အချိန်ဇယားများ ပြောကြားခဲ့ပြီး၊ မြို့နယ်ဦးစီးမှုး ဦးမင်းဇော်က သင်တန်းအထောက်အကူပြု ပစ္စည်းများနှင့် သင်တန်းအတွက် ကိုဗစ်-၁၉ ရောဂါ ကာကွယ်ရေးသုံး ပစ္စည်းများ ပေးအပ်ခဲ့သည်။
ကျောင်းကုန်းမြို့နယ်၏ လယ်ယာစိုက်ပျိုးရေးကဏ္ဍတွင် ပိုမိုသုံးစွဲလာသည့် ထွန်စက်ကြီး၊ စပါးရိတ်သိမ်းခြွေလှေ့စက်၊ ကောက်စိုက်စက်နှင့် လက်တွန်းထွန်စက်များအား တောင်သူများ အနေဖြင့် စနစ်တကျ ကိုင်တွယ်မောင်းနှင် ထိန်းသိမ်းတတ်စေရန်၊ စက်ကိရိယာများအား စနစ်တကျကြံ့ခိုင်မှု ဆောင်ရွက်တတ်စေရန် ရည်ရွယ်၍ တောင်သူ သင်တန်းသား (၃၀)ဦးဖြင့်သင်တန်းကို (၁၂)ရက် ပို့ချသွားမည်ဖြစ်ပြီး၊ ကျန်းမာရေးဝန်ကြီးဌာန၏ ကိုဗစ်-၁၉ စည်းကမ်းချက်နှင့်အညီ သင်တန်းဖွင့်လှစ်ပေးခြင်း ဖြစ်ကြောင်း၊ သင်တန်းတက်ရောက်သင်ယူခြင်းဖြင့် တောင်သူပိုင်လယ်ယာသုံး စက်ကိရိယာ များအား မောင်းနှင်ရာတွင် ကျွမ်းကျင်၍ စနစ်ကျနမှုရှိခြင်း၊ အန္တရာယ် လျော့နည်းစေခြင်း၊ စက်များပျက်စီးမှု နည်းပါးစေခြင်းနှင့် စက်အပိုပစ္စည်း ဝယ်ယူသုံးစွဲစရိတ် လျော့ချနိုင်ခြင်း၊ လုပ်ငန်းခွင်တွင် စက်စွမ်းအားပြည့် ဆောင်ရွက်နိုင်ခြင်းစသည့် အကျိုးကျေးဇူးများ ရရှိမည် ဖြစ်ကြောင်း မြို့နယ်စက်မှုလယ်ယာဦးစီးမှူး ဦးမင်းဇော်က ပြောကြားခဲ့ကြောင်း သိရသည်။
သတင်း - ဝင်းကြိုင်
မြန်မာနေရှင်နယ်ပို့စ်
No comments:
Post a Comment