MNP - စက်တင်ဘာ ၂၂
ရှမ်းပြည်နယ် (မြောက်ပိုင်း)၊ ကျောက်မဲခရိုင်၊ နမ္မတူမြို့နယ်တွင် မြို့နယ်စီမံအုပ်ချုပ်ရေးအဖွဲ့၏ ဦးဆောင်မှုဖြင့် ဌာနဆိုင်ရာများ ပူးပေါင်း၍ ကိုဗစ်-၁၉ ရောဂါ ကာကွယ်ထိန်းချုပ်ရေး လုပ်ငန်းညှိနှိုင်း အစည်းအဝေးကို ယမန်နေ့နံနက် (၁၀)နာရီ (၅၀)မိနစ်အချိန်က နမ္မတူမြို့နယ်၊ မြို့နယ်အထွေထွေအုပ်ချုပ်ရေးဦးစီးဌာန အစည်းအဝေးခန်းမ၌ ဆောင်ရွက်ခဲ့ကြောင်း သိရသည်။
လုပ်ငန်းညှိနှိုင်းအစည်းအဝေးတွင် နမ္မတူမြို့နယ် ကိုဗစ်-၁၉ ရောဂါကာကွယ် ထိန်းချုပ်ရေးကော်မတီ ဥက္ကဋ္ဌ မြို့နယ်အုပ်ချုပ်ရေးမှူး ဦးဝင်းမင်းထွန်းက အမှာစကားပြောကြား ရာတွင် မြန်မာနိုင်ငံအတွင်း ကိုဗစ်ပိုးတွေ့ရှိမှုအခြေအနေများ၊ ရှမ်းပြည်နယ်အတွင်း ကိုဗစ်ပိုးတွေ့မှု အခြေအနေများ၊ မြို့နယ်အတွင်း ကိုဗစ်ပိုးတွေ့ရှိမှု အခြေအနေများအားလည်းကောင်း၊ မြို့နယ်အတွင်း ကိုဗစ်ကာကွယ်ထိန်းချုပ်ရေးအတွက် ယာဉ်လိုင်းများ၊ မြို့မဈေးနှင့် မြို့နယ်အတွင်းရှိ ဈေးဆိုင်များ၊ ရပ်ကွက်ကျေးရွာများတွင် ကိုဗစ်-၁၉ ရောဂါ ကာကွယ်ထိန်းချုပ်နိုင်ရေးအတွက် အသိပညာပေး ကြိုတင်ပြင်ဆင်ထားမှု အခြေအနေများ၊ စောင့်ကြည့်စခန်း ပြင်ဆင်ထားရှိမှုအခြေအနေများ၊ မြို့နယ်ပြည်သူ့ဆေးရုံတွင် (Isolation Ward) ကြိုတင်ပြင်ဆင်ထားရှိမှု အခြေအနေများ၊ မြို့အဝင်တွင် ကျန်းမာရေးစစ်ဆေးရေးဂိတ် ထားရှိသင့်/မသင့် အခြေအနေများအား ဆွေးနွေးပြောကြားခဲ့သည်။
အဆိုပါ လုပ်ငန်းညှိနှိုင်းအစည်းအဝေးသို့ မြို့နယ်စီမံအုပ်ချုပ်ရေးအဖွဲ့ အတွင်းရေးမှူးများ၊ အဖွဲ့ဝင်များ၊ ဌာနဆိုင်ရာ အကြီးအကဲများ၊ မြို့နယ်ကြက်ခြေနီသူနာပြုတပ်ဖွဲ့၊ လူမှုကူညီရေးအသင်းနှင့် အရပ်ဘက်ဆိုင်ရာအဖွဲ့အစည်းများ တက်ရောက်ခဲ့ပြီး ကိုဗစ်-၁၉ ရောဂါ ကာကွယ်ထိန်းချုပ်ရေးအတွက် သက်ဆိုင်ရာကဏ္ဍများအလိုက် ပူးပေါင်းဆောင်ရွက်မည့် အစီအစဉ်များအား ရှင်းလင်းဆွေးနွေးခဲ့ရာ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးဝင်းမင်းထွန်းက ပေါင်းစပ်ညှိနှိုင်းဆောင်ရွက် ပေးခဲ့ကြောင်း သိရသည်။
သတင်း - လူမော်
မြန်မာနေရှင်နယ်ပို့စ်
No comments:
Post a Comment