MNP - အောက်တိုဘာ ၁၈
ပဲခူးတိုင်းဒေသကြီး၊ တောင်ငူခရိုင်၊ ဖြူးမြို့နယ်အတွင်း နွေစပါးမိုးစပါးများ လုပ်အားအင်အား သက်သာစေသောနည်းစနစ်ဖြင့် အထွက်နှုန်းကောင်းစေရန် မျိုးကောင်းမျိုးသန့်စပါးများ စိုက်ပျိုးစေခြင်းကို ဆောင်ရွက်နေလျက်ရှိရာ ယမန်နေ့မွန်းလွဲပိုင်းက ချင်းခင်ကျေးရွာအုပ်စု၊ ချင်းခင်ကျေးရွာ၊ တောင်သူ ဦးမြင့်ဝင်း၏ စပါးအစေ့ချကိရိယာဖြင့် စိုက်ပျိုးခဲ့သည့် မျိုးကောင်းမျိုးသန့်စိုက်ခင်း(၅)ဧက စံပြစိုက်ကွက်အား တောင်သူများအထွက်နှုန်းသိရှိစေရေးအတွက်ရည်ရွယ်ကာ စံကွက်ရိတ်သိမ်းခဲ့ရာ တစ်ဧကတွင် အစို(၁၁၁)တင်း ထွက်ရှိကြောင်းသိရသည်။
အဆိုပါ စံကွက်ရိတ်သိမ်းသည့် စိုက်ကွက်သည် မိုးစပါး- ဆောင်းပဲဒီစိမ်း- နွေစပါး(၃)သီးစား စိုက်ပျိုးသည့် စံကွက်ဖြစ်ပြီး ဇွန်လ(၂၀)ရက်နေ့က မျိုးကောင်းမျိုးသန့် စပ်မျိုးစပါးအား မျိုးစေ့တိုက်ရိုက်ချကိရိယာ(Drum Seeder)ဖြင့် ကျေးရွာဒေသခံတောင်သူများ အသိပညာပေး စိုက်ပျိုးပြသပေးခဲ့သည့် စိုက်ကွက်ဖြစ်ကြောင်းနှင့် စံကွက်ရိတ်သိမ်းရာတွင် (၆၅)ပေ ပတ်လည်အကွက်အား စပါးရိတ်စက်ဖြင့် ရိတ်သိမ်းသရုပ်ပြခဲ့ကြောင်းသိရသည်။ စံကွက်ရိတ်သိမ်းရာသို့ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးစောမင်းသူနှင့်အဖွဲ့ဝင်များ၊ ဌာနဆိုင်ရာများ၊ ကျေးရွာဒေသခံတောင်သူများ တက်ရောက်အားပေး လေ့လာခဲ့ကြောင်းသိရသည်။
သတင်း - နေမျိုးလွင်
မြန်မာနေရှင်နယ်ပို့စ်
No comments:
Post a Comment