MNP - ဇန်နဝါရီ ၂၀
မော်လမြိုင်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အခြေခံပညာဦးစီးဌာနနှင့် လူငယ်ရေးရာကော်မတီတို့ပူးပေါင်း၍ ကျောင်းသား၊ ကျောင်းသူများ အသိပညာ ဗဟုသုတ တိုးပွားစေရန်နှင့် ဉာဏ်ရည်ဉာဏ်သွေးများ ဖွံ့ဖြိုးတိုးတက်မြင့်မားလာစေရန်၊ ဝိုင်းဖွဲ့ဦးဆောင် ဆွေးနွေးသည့် အလေ့အထများရရှိစေရန်၊ အဖွဲ့အစည်းစိတ်ဓါတ်ဖြင့် ပူးပေါင်းပါဝင် ဆောင်ရွက်နိုင်စေရန်၊ စဉ်းစားတွေးခေါ်နိုင်မှုစွမ်းရည်များ ရင့်သန်လာစေရန်၊ အကောင်းအဆိုး အမှားအမှန်ကို ကိုယ်ပိုင်ဉာဏ်ဖြင့် ချင့်ချိန်၍ဆုံးဖြတ်ချက်များ ချမှတ်နိုင်စေရန်၊ လူအများရှေ့မှောက်တွင် ပြောရဲ၊ ဆိုရဲသည့်သတ္တိရှိစေပြီး နုတ်မှုစွမ်းရည်များ တိုးတက်စေရန်ရည်ရွယ်၍ လူငယ်စကားဝိုင်းဆွေးနွေးပွဲကို ယနေ့နံနက်ပိုင်းက မော်လမြိုင် အ.ထ.က(၉)ကျောင်း (ကျောင်းခန်းမ) ၌ ကျင်းပခဲ့သည်။
အခမ်းအနားတွင် အ.ထ.က(၉)ကျောင်းမှ အထက်တန်းပြ ဆရာမဒေါ်ထိုက်ထိုက်ကျော်မှ အဖွင့်အမှာစကားပြောကြားပြီး လူငယ်စကားဝိုင်းဆွေးနွေးပွဲကို ဆက်လက်ကျင်းပရာ မော်လမြိုင်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ လက်ထောက် ညွှန်ကြားရေးမှူး ဒေါ်မြင့်မြတ်သီတာက ညှိနှိုင်းရေးမှူးအဖြစ်ဆောင်ရွက်၍ အ.ထ.က(၉)မှ အထက်တန်းပြဆရာမ ဒေါ်မိုးမိုးလှိုင်နှင့် လူငယ်ရေးရာကော်မတီမှ လက်ထောက်ညွှန်မှူး ဒေါ်သီသီစိုးတို့က ဦးဆောင်ဖြည့်စွက်ဆွေးနွေးပြီး အ.ထ.က(၉) Grade-10 နှင့် Grade-11 မှ ကျောင်းသား၊ ကျောင်းသူများဖြစ်ကြသော မောင်ခန့်ထူးစံက လူငယ်နှင့်ကျန်းမာရေး၊ မကျော့စွမ်းညိုက လူငယ်နှင့်ပညာရေး၊ မောင်အောင်မွန်က လူငယ်နှင့်အားကစား၊ မခိုင်ရတီဇော်က လူငယ်နှင့်ဝတ်စားဆင်ယင်မှု၊ မရှုမငြိမ်းက လူငယ်နှင့်နည်းပညာ စသည့် ခေါင်းစဉ်များဖြင့် ဝိုင်းဖွဲ့ဆွေးနွေးခဲ့ကြသည်။
ထို့နောက် ဆွေးနွေးမှုနှင့်ပတ်သက်၍ သိရှိလိုသည့်မေးခွန်းများကို ကျောင်းသား ကျောင်းသူများ ကမေးမြန်းရာ ဦးဆောင်ဆွေးနွေးသူများက ပြန်လည်ဖြေကြားခဲ့ပြီး ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနက ခင်းကျင်းပြသထားသော နံရံကပ်စာစောင်များကို ကျောင်းသား၊ ကျောင်းသူများက စိတ်ပါဝင်စားစွာ လေ့လာကြည့်ရှုခဲ့ကြောင်း သိရသည်။
စည်သူ
https://t.me/MyanmarNationalPost
No comments:
Post a Comment