ဗန်းမော်မြို့တွင် (၇၆)နှစ်မြောက် ပြည်ထောင်စုနေ့အထိမ်းအမှတ်အကြို လူငယ်ရေးရာ အသိပညာပေး ဟောပြောပွဲ၊ နံရံကပ်စာစောင်နှင့် စာအုပ်စာစောင်ပြပွဲဆောင်ရွက်

MNP   -  ဖေဖော်ဝါရီ ၉

ကချင်ပြည်နယ်၊ ဗန်းမော်ခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန (Community Centre) ခန်းမ၌ (၇၆)နှစ်မြောက် ပြည်ထောင်စုနေ့ အထိမ်းအမှတ်အကြို လူငယ်ရေးရာ အသိပညာပေးဟောပြောပွဲ၊ နံရံကပ်စာစောင်နှင့် စာအုပ်စာစောင်ပြပွဲ အခမ်းအနားကို ယမန်နေ့ နံနက် ၁၀ နာရီခန့်က ကျင်းပခဲ့ကြောင်း သိရသည်။

အဆိုပါ အခမ်းအနားတွင် ရှေးဦးစွာ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ လက်ထောက်ညွှန်ကြားရေးမှူး ဦးအောင်ကျော်ထွန်းက ပြည်ထောင်စုနေ့ ဖြစ်ပေါ်လာပုံသမိုင်းကြောင်းများ၊ ကျောင်းသား၊ ကျောင်းသူ၊ လူငယ်လူရွယ် များ သိသင့်သိထိုက်သည့် လူငယ်ရေးရာ အသိပညာပေးများနှင့် သိမှတ်ဖွယ်ရာဗဟုသုတများကို ဟောပြောခဲ့ပြီး ခရိုင် စားသုံးသူရေးရာဦးစီးဌာနမှ ဒုတိယဦးစီးမှူး ဒေါ်ဆန္ဒမွန်က စားသုံးသူကာကွယ်ရေးဆိုင်ရာ အသိပညာပေးများ ဟောပြောခဲ့သည်။

ဆက်လက်၍ အခမ်းအနားသို့ တက်ရောက်လာကြသည့် အမှတ်(၃)အခြေခံပညာ မူလတန်းလွန် ကျောင်းမှ ကျောင်းသား၊ ကျောင်းသူများအား ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဝန်ထမ်းများက (၇၆)နှစ်မြောက် ပြည်ထောင်စု နေ့အထိမ်းအမှတ် သတင်းစကားလက်ကမ်းစာစောင်များ ဖြန့်ဝေပေးခြင်း၊ ခရိုင်စားသုံးသူရေးရာဦးစီးဌာနမှ ဝန်ထမ်းများ က စားသုံးသူအခွင့်အရေးနှင့် သက်ဆိုင်သည့်  အသိပညာပေး လက်ကမ်းစာစောင်များ ဖြန့်ဝေးပေးခဲ့သည်။

ထို့နောက် အခမ်းအနားသို့ တက်ရောက်လာကြသည့် ကျောင်းသား၊ ကျောင်းသူများက ခရိုင် ပြန်ကြားရေးနှင့် ပြည်သူ့ဆက်ဆံရေးဦးစီးဌာနက ခင်းကျင်းပြသထားသည့် စာအုပ်စာစောင်များနှင့် ပြည်ထောင်စုနေ့ အထိမ်းအမှတ် ဆိုင်ရာ နံရံကပ်စာစောင်များ၊ ကျန်းမာရေးဆိုင်ရာ နံရံကပ်စာစောင် များ၊ လူကုန်ကူးမှုတားဆီးကာကွယ်ရေးဆိုင်ရာ အသိပညာပေးစာစောင်များ၊ မူးယစ်ဆေးဝါးဆိုင်ရာ အသိပညာပေးနံရံကပ်စာစောင်များနှင့် အခြားဗဟုသုတရဖွယ် နံရံကပ်စာစောင်များကို စိတ်ဝင် စားစွာ လေ့လာကြည့်ရှုခဲ့ကြောင်း သိရသည်။

 https://t.me/MyanmarNationalPost