MNP ၊ ဧပြီ ၁၁
စစ်ကိုင်းတိုင်းဒေသကြီး၊ ကသာခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတွင် မြန်မာ့ရိုးရာ အတာသင်္ကြန်ပွဲတော်အကြောင်း စိတ်ကူးပုံဖော်ရေးဆွဲခြင်း ပန်းချီပြိုင်ပွဲကို ယနေ့နံနက်(၉)နာရီအချိန်က လူထုအခြေပြုဗဟိုဌာန(Community Centre)ခန်းမ၌ ကျင်းပပြုလုပ်ခဲ့သည်။
အဆိုပါ ပြိုင်ပွဲသည် နွေရာသီအခြေခံပန်းချီသင်တန်းသို့ တက်ရောက်နေကြသည့် ကျောင်းသား/ကျောင်းသူလူငယ်များ၏ သင်ကြားလေ့လာမှတ်သားမှုစနစ်ကို ဆန်းစစ်သည့်ပြိုင်ပွဲဖြစ်ကြောင်း၊ သင်တန်းသား/သင်တန်းသူများ၏ ပန်းချီပညာရပ်ရှုထောင့်နှင့် လေ့လာမှတ်သားမှုတို့ကို အကဲဖြတ်ရန်အတွက် ပြိုင်ပွဲပြုလုပ်ပေးရခြင်းဖြစ်ကြောင်း ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်စောကလျာက ရှင်းလင်းပြောကြားသည်။
ထို့နောက် သင်တန်းဆရာ/ဆရာမများက မြန်မာ့ရိုးရာအတာသင်္ကြန်ပွဲတော်အကြောင်း စိတ်ကူးပုံဖော်ပန်းချီရေးဆွဲရန်အတွက် ယှဉ်ပြိုင်ရမည့် သင်္ကြန်ပွဲတော်အကြောင်းအရင်း၊ အချက်အလက်များကို ပြည့်စုံစွာရေးဆွဲစေခဲ့သည်။ သင်္ကြန်ပွဲတော်အား စိတ်ကူးဖြင့်ပုံဖော်ရေးဆွဲရာတွင် ရေဆေးပန်းချီကိုအဓိကထား ယှဉ်ပြိုင်ရေးဆွဲကြရမည်ဖြစ်ကြောင်း ပန်းချီဆရာကြီး ဦးကျော်ဆွေက ပြောကြားခဲ့သည်။
ယခုနွေရာသီအခြေခံပန်းချီသင်တန်း တတိယပတ်၌ မြန်မာ့ရိုးရာအတာသင်္ကြန်ပွဲတော်အကြောင်း စိတ်ကူးပုံဖော်ရေးဆွဲခြင်းပြိုင်ပွဲတွင် မူလတန်းအဆင့် ကျောင်းသား/ကျောင်းသူစုစုပေါင်း(၆၇)ဦး၊ အထက်တန်း၊ အလယ်တန်းအဆင့် ကျောင်းသား/ကျောင်းသူစုစုပေါင်း(၃၂)ဦး ဝင်ရောက်ယှဉ်ပြိုင်ခဲ့ကြပြီးဆုရရှိသည့် ကျောင်းသား/ ကျောင်းသူလေးများကို ဧပြီလ ၁၂ ရက်နေ့ သင်တန်းဆင်းပွဲတွင် ပထမ၊ ဒုတိယ၊ တတိယဆုများ အသီးသီးချီးမြှင့်သွားမည်ဖြစ်ကြောင်း ဦးစီးအရာရှိ ဒေါ်စောကလျာထံမှ သိရသည်။
ကျော်စွာ
https://t.me/MyanmarNationalPost
No comments:
Post a Comment