လယ်ယာမြေကို အခြားနည်းသုံးစွဲထားမှုများ ဖြေရှင်းဆောင်ရွက်မည့်နည်းလမ်းနှင့် နောင်ထပ်မံမဖြစ်ပွားစေရေးအတွက် ဆောင်ရွက်မည့်နည်းလမ်းများ လုပ်ထုံးလုပ်နည်းစံနှုန်း ရေးဆွဲပြုစုရေးဦးစီးကော်မတီ၏ ပထမအကြိမ်လုပ်ငန်းညှိနှိုင်းအစည်းအဝေးကျင်းပ

MNP ၊ ဩဂုတ် ၂၅

လယ်ယာမြေကို အခြားနည်းသုံးစွဲထားမှုများဖြေရှင်းဆောင်ရွက်မည့်နည်းလမ်းနှင့် နောင်ထပ်မံမဖြစ်ပွား စေရေးအတွက် ဆောင်ရွက်မည့်နည်းလမ်းများ လုပ်ထုံးလုပ်နည်းစံနှုန်း (Standard Operating Procedure–SOP) ရေးဆွဲပြုစုရေးဦးစီးကော်မတီ၏ ပထမအကြိမ် ညှိနှိုင်းအစည်းအဝေးကို ယမန်နေ့က စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီးရုံး အစည်းအဝေးခန်းမ၌ကျင်းပရာ ဦးစီးကော်မတီဥက္ကဋ္ဌ ပြည်ထောင်စုဝန်ကြီးဦးမင်းနောင်နှင့် ကော်မတီဝင်များတက်ရောက်ကြပြီး တိုင်းဒေသကြီး၊ ပြည်နယ်လုပ်ငန်းကော်မတီများမှ တာဝန်ရှိသူများက အွန်လိုင်းဖြင့် တက်ရောက်ကြသည်။

ဦးစီးကော်မတီဥက္ကဋ္ဌ ပြည်ထောင်စုဝန်ကြီး ဦးမင်းနောင်က နိုင်ငံတော်၏ စားရေရိက္ခာဖူလုံရေးနှင့် လယ်ယာမြေများ မလျော့ပါးစေရေးအတွက် ၁၉၅၃ ခုနှစ် လယ်ယာမြေနိုင်ငံပိုင် ပြုလုပ်ရေးအက်ဥပဒေအပါအဝင် ခေတ်အဆက်ဆက်အတည်ပြု ပြဋ္ဌာန်းခဲ့သည့် လယ်ယာမြေဥပဒေစည်းကမ်းချက်များတွင် “လယ်ယာမြေကို ခွင့်ပြုမိန့်မရရှိဘဲ အခြားနည်းသုံးစွဲခြင်း မပြုရ” “လယ်ယာမြေကို ရာသီသီးနှံအမျိုးအစားမှ အခြားသီးနှံအမျိုးအစားသို့ ခွင့်ပြုချက်မရှိဘဲ ပြောင်းလဲစိုက်ပျိုးခြင်းမပြုရ” ဆိုသည့် အချက်များကို အတိအလင်းပြဋ္ဌာန်းထားရှိကြောင်း၊ ဥပဒေနှင့်အညီ ခွင့်ပြုချက်မရှိဘဲ လယ်ယာမြေကို အခြားနည်းသုံးစွဲထားမှုများ ဖြေရှင်းဆောင်ရွက်ရန် လိုအပ်လာမှုနှင့် နောင်ထပ်မံမဖြစ်ပွားစေရေးအတွက် ဆောင်ရွက်မည့်နည်းလမ်းများ လုပ်ထုံးလုပ်နည်း စံနှုန်းရေးဆွဲပြုစုရန် ဆောင်ရွက်သွားမည်ဖြစ်ကြောင်း။

လယ်ယာမြေကို အခြားနည်းသုံးစွဲထားမှုများ ဖြေရှင်းဆောင်ရွက်မည့်နည်းလမ်းနှင့် နောင်ထပ်မံ မဖြစ်ပွားစေရေးအတွက် ဆောင်ရွက်မည့်နည်းလမ်းများ လုပ်ထုံးလုပ်နည်းစံနှုန်း (Standard Operating Procedure –SOP) ရေးဆွဲပြုစုရာတွင် ပြီးပြည့်စုံမှု အနေအထားရရှိနိုင်စေရန် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဦးဆောင်သည့် ပြည်ထောင်စုအဆင့် လုပ်ငန်းကော်မတီနှင့် နေပြည်တော်ကောင်စီဥက္ကဋ္ဌ၊ တိုင်းဒေသကြီး၊ ပြည်နယ်ဝန်ကြီးချုပ်များ ဦးဆောင်သည့် နေပြည်တော်၊ တိုင်းဒေသကြီး၊ ပြည်နယ်လုပ်ငန်း ကော်မတီများအနေဖြင့် သတ်မှတ်ထားသော လုပ်ငန်းတာဝန်များနှင့်အညီ လက်ရှိမြေပြင်တွင် ဖြစ်ပေါ်နေသော ဥပဒေမဲ့ကျူးလွန်လုပ်ဆောင်မှုများကို စနစ်တကျလေ့လာဆန်းစစ်ပြီး ပြည်သူများနစ်နာမှုမရှိစေရေး ဖော်ထုတ်အကြံပြုရန်နှင့် ပြည်ထောင်စုအဆင့် လုပ်ငန်းကော်မတီအနေဖြင့် ဥပဒေလုပ်ထုံးလုပ်နည်းများနှင့်အညီ ထိန်းကျောင်းပေါင်းစပ်ကာ ဦးစီးကော်မတီသို့ တင်ပြပေးရန်၊ လုပ်ငန်းတာဝန်များ အကောင်အထည်ဖော် ဆောင်ရွက်မည့် လုပ်ငန်းအချိန်လျာထားချက်ဘောင်အတွင်း ပြီးစီးအောင်လုပ်ဆောင်နိုင်ရေး ကြိုးပမ်းကြရန် ပြောကြားသည်။

ဆက်လက်၍ ဦးစီးကော်မတီ တွဲဖက်အတွင်းရေးမှူး လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန ညွှန်ကြားရေးမှူးချုပ်က ၂၀၁၂ ခုနှစ် လယ်ယာ မြေဥပဒေမတိုင်မီကာလက ကျူးလွန်မှုကိစ္စရပ်များ၊ ၂၀၁၂ ခုနှစ် လယ်ယာမြေဥပဒေ ကျင့်သုံးသည့် နောက်ပိုင်းကာလ ကျူးလွန်မှုကိစ္စရပ်များ၊ နောက်နောင် မဖြစ်ပွားစေရေးကိစ္စရပ်များကို ဆွေးနွေးတင်ပြပြီး တက်ရောက်လာသည့် ဦးစီးကော်မတီဝင်များက သက်ဆိုင်ရာကဏ္ဍအလိုက် ဆွေးနွေးကြသည်။

တည်ဆဲလယ်ယာမြေဥပဒေနှင့် လယ်ယာမြေနည်းဥပဒေများကို မျက်ကွယ်ပြုပြီး လယ်မြေများကို ဥပဒေနှင့်အညီ ခွင့်ပြုချက်မရှိဘဲ မြို့မြေ၊ ရွာမြေကဲ့သို့ အခိုင်အမာ နေအိမ်ဆောက်လုပ်ခြင်း၊ အဆောက်အအုံများ ဆောက်လုပ်ခြင်း၊ စက်ရုံအလုပ်ရုံများ ဆောက်လုပ်ခြင်းစသည့် ဥပဒေမဲ့လုပ်ဆောင်နေမှုများကို ဖြေရှင်းရန်နည်းလမ်းများနှင့် ထပ်မံမဖြစ်ပွားစေရေးအတွက် နိုင်ငံတော်စီမံအုပ်ချုပ်ရေးကောင်စီက ၂၀၂၃ ခုနှစ် ဩဂုတ်လ (၁၀)ရက်တွင် အမိန့်ကြော်ငြာစာအမှတ် ၁၄၇/၂၀၂၃ ထုတ်ပြန်၍ “လယ်ယာမြေကို အခြားနည်းသုံးစွဲထားမှုများ ဖြေရှင်းဆောင်ရွက်မည့်နည်းလမ်းနှင့် နောင်ထပ်မံမဖြစ်ပွားစေရေး ဆောင်ရွက်မည့် နည်းလမ်းများ လုပ်ထုံးလုပ်နည်းစံနှုန်း (Standard Operating Procedure –SOP) ရေးဆွဲပြုစုရေးဦးစီးကော်မတီ” ကို လည်းကောင်း၊ အဖွဲ့ဝင် ၁၇ ဦး ပါရှိသည့် ပြည်ထောင်စုအဆင့် လုပ်ငန်းကော်မတီနှင့် အဖွဲ့ဝင် ၁၈ ဦးပါ နေပြည်တော်၊ တိုင်းဒေသကြီး၊ ပြည်နယ်လုပ်ငန်းကော်မတီကိုလည်းကောင်း ဖွဲ့စည်းထားကြောင်း၊ ဦးစီးကော်မတီအနေဖြင့် စိုက်ပျိုးမြေများ မလျော့ပါးစေရေးနှင့် တိုးပွားလာသော ပြည်သူလူထုအတွက် နေထိုင်နိုင်ရန် မြေနေရာလုံလောက်ရေး၊ တိုးတက်ဖွံ့ဖြိုးလာသော စက်ရုံအလုပ်ရုံများအတွက် မြေနေရာအသုံးပြုနိုင်ရေးတို့ကို အခြေခံ၍အဆိုပါလိုအပ်ချက်များကို အကောင်းဆုံး ဖြည့်ဆည်းပေးနိုင်မည့် (Standard Operating Procedure – SOP) ပေါ်ထွက်လာစေရန် ကြိုးပမ်းဆောင်ရွက်သွားမည်ဖြစ်ကြောင်း သိရသည်။

#MyanmarNationalPost