MNP ၊ စက်တင်ဘာ ၁၂
ရခိုင်ပြည်နယ် စစ်တွေခရိုင် ပေါက်တောမြို့နယ်အတွင်း မိုးစပါးအထွက်နှုန်း တိုးတက်စေရန် ပြည်တွင်းမှထုတ်လုပ်သော ယူးရီးယားဓာတ်မြေဩဇာ (MPE)များကို ရခိုင်ပြည်နယ် အစိုးရအဖွဲ့၏ အစီအစဉ်ဖြင့် ဒေသခံတောင်သူများသို့ ဈေးနှုန်းချိုသာစွာ ဖြန့်ဖြူးခြင်းကို ယနေ့ နံနက်ပိုင်းက မြို့နယ်စိုက်ပျိုးရေးဦးစီးဌာနရုံးရှိ အစည်းအဝေးခန်းမ၌ ကျင်းပသည်။
ရှေးဦးစွာ ပေါက်တောမြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးကျန်အေး က အဖွင့်အမှာစကားပြောကြားပြီး မြို့နယ်စိုက်ပျိုးရေးဦးစီးဌာနမှ မြို့နယ်ဦးစီးမှူး ဦးအောင်သန်းဌေး က ယခုရရှိသော ယူးရီးယားမြေဩဇာများကို စနစ်တကျရောစပ်သုံးစွဲရန်၊ ယူးရီးယားမြေဩဇာများကို အချိန်ကိုက်အချိုးကျ သုံးစွဲနိုင်ရန်မှာကြားပြီး သဘာဝမြေဩပြုလုပ်သုံးစွဲနည်းများကိုလည်း လက်တွေ့ပြသသည်။ အဆိုပါ အခမ်းအနားသို့ မြို့နယ်စီမံအုပ်ချုပ်ရေးအဖွဲ့ ဥက္ကဋ္ဌ ဦးကျန်အေး၊ ဓာတ်မြေဩဇာသယ်ယူသို့လှောင်ဖြန့်ဖြူးရေးကော်မတီ အဖွဲ့ဝင် ဌာနဆိုင်ရာတာဝန်ရှိသူများ၊ ရပ်ကျေးအုပ်စု အုပ်ချုပ်ရေးမှူးများ နှင့် ဒေသခံတောင်သူများ တက်ရောက်ကြသည်။
ပေါက်တောမြို့နယ်အတွင်းရှိ ယူးရီးယားဓာတ်မြေဩဇာ (MPE) ၄၉၃ အိတ်ကို ကျေးရွာအုပ်စု ၁၈ အုပ်စုသို့ ပထမအကြိမ်အဖြစ် ဖြန့်ဖြူးချမည်ဖြစ်ကြောင်း မြို့နယ်စိုက်ပျိုးရေးဦးစီးဌာနမှ မြို့နယ်ဦးစီးမှူး ဦးအောင်သန်းဌေး ထံမှသိရှိရသည်။
ဝင်းမင်းစိုး
https://t.me/MyanmarNationalPost
No comments:
Post a Comment