ရခိုင်ပြည်နယ်၊ ကျောက်ဖြူခရိုင်၊ ကျောက်ဖြူမြို့၌ လူမှုဝန်ထမ်းဦးစီးဌာနမှ ဖွင့်လှစ်သည့် လူမှု သဟဇာတနှင့် လူမှုပေါင်းစည်းရေးဆိုင်ရာ(ဆင့်ပွား)သင်တန်းကို ယနေ့ နံနက်ပိုင်းက ဂုံးချွိန်ကျေးရွာ အုပ်စုရှိ အေးမြသာယာကျေးရွာခန်းမတွင် ကျင်းပပြုလုပ်ရာ ခရိုင်စီမံအုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ဝင် များ၊ ပြည်နယ်လူမှုဝန်ထမ်းရုံးမှ ညွှန်ကြားရေးမှူး၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌနှင့် အဖွဲ့ဝင်များ၊ လူမှုဝန်ထမ်းဦးစီးဌာနမှ ခရိုင်/မြို့နယ်ရုံးဝန်ထမ်းများ၊ ရပ်/ကျေးအုပ်ချုပ်ရေးမှူးများနှင့် သင်တန်းသား၊ သင်တန်းသူများ တက်ရောက်ကြသည်။
ရှေးဦးစွာ ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးရဲလင်းမောင် က လူမှုသဟဇာတဖြစ်ရေးသည် မြန်မာနိုင်ငံတွင် အလွန်အရေးပါပြီး လိုအပ်သည့် ကိစ္စတစ်ခုဖြစ်ပါကြောင်း၊ မတူကွဲပြားခြင်းဆိုသည်မှာ လူတစ်ဦးနှင့်တစ်ဦး၊ ကျား၊ မ၊ အသက်အရွယ်၊ မိသားစုအသိုင်းအဝိုင်း၊ လူမျိုး၊ ဘာသာ စသည်ဖြင့် မတူ ညီမှုများစွာရှိသည့်အတွက် အဆိုပါ မတူညီမှုများကို ယိုးမယ်ဖွဲ့ကာ ပူပေါင်းဆောင်ရွက်မှုမရှိပါက လူမှုပဋိပက္ခများမှာ အမြဲဖြစ်ပေါ်နေမည်ဖြစ်ပြီး လူမှုသဟဇာတဖြစ်နိုင်ရန်ခက်ခဲမည် ဖြစ်ပါကြောင်း၊ ပြဿနာများကိုဖြေရှင်းရာတွင် ပြည်ထောင်စုစိတ်ဓာတ်ဖြင့် ဆောင်ရွက်ပါက အချင်းချင်းသဟဇာတ ဖြစ်ပြီး အောင်မြင်မှုများရရှိမည် ဖြစ်ပါကြောင်း၊ သင်တန်းသား/သူများအနေဖြင့် ယခုသင်တန်းမှရရှိ သော အသိပညာ၊ ဗဟုသုတများကို မိမိတို့ရပ်ရွာဒေသတွင် ကိုယ်တိုင် လက်တွေ့ကျင့်သုံးသလို ထပ်ဆင့် အသိပညာပေးကာ ဒေသဖွံ့ဖြိုးတိုးတက်ရေး လုပ်ငန်းစဉ်များ၌ ပိုမိုမြှင့်တင်ဖော်ဆောင်နိုင်သူများ ဖြစ်ကြ စေလိုကြောင်း တိုက်တွန်းပြောကြားသည်။ ထို့နောက် ရခိုင်ပြည်နယ်လူမှုဝန်ထမ်းရုံးမှ ညွှန်ကြားရေးမှူး ဦးမြင့်ဇော် က သင်တန်းဖွင့်လှစ်ရခြင်းနှင့်ပတ်သက်၍ အကျယ်တဝင့် ရှင်းလင်းပြောကြားခဲ့သည်။
၎င်းနောက် လူမှုသဟဇာတနှင့် လူမှုပေါင်းစည်းရေးဆိုင်ရာ(ဆင့်ပွား)သင်တန်းအား လူမှုဝန်ထမ်း ဦးစီးဌာနမှ နည်းပြဆရာ(၂)ဦးတို့မှ ဆက်လက်ပြသရာ မတူညီသောကျေးရွာနှစ်ခုမှ ရပ်ရွာလူထု (၃၀)ဦး တက်ရောက်ကြပြီး သင်တန်းကာလမှာ အောက်တိုဘာ(၁၆)ရက်နေ့မှ(၁၈)ရက်နေ့အထိ သုံးရက်တာ ကြာမြင့်မည်ဖြစ်ကြောင်း သိရှိရသည်။
တင်ထွန်းဦး၊ ဖြိုးဝေလင်း
https://t.me/MyanmarNationalPost
No comments:
Post a Comment