MNP ၊ အောက်တိုဘာ ၁၁
ရခိုင်ပြည်နယ်၊ သံတွဲခရိုင်၊ ဂွမြို့နယ်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ အားကစားနှင့် ကာယပညာ ဦးစီးဌာန၊ မြို့နယ်ရဲတပ်ဖွဲ့၊ အခွန်ဦးစီးဌာနနှင့်အခြေခံပညာဦးစီးဌာန တို့ ပူးပေါင်းကျင်းပသော လူငယ်ရေးရာ အသိပညာပေး ဟောပြောပွဲနှင့် လူငယ်စကားဝိုင်းဆွေးနွေးပွဲကို ယမန်နေ့ မွန်းလွဲ ၁နာရီခွဲက ရွှေရချိုင်ကျေးရွာအခြေခံပညာအလယ်တန်းကျောင်း(ခွဲ) ခန်းမ၌ ကျင်းပပြုလုပ်ခဲ့သည်။
အခမ်းအနားကို အစီအစဥ်(၂)ပိုင်းခွဲ ၍ ကျင်းပပြုလုပ်ခဲ့သည်။ ပထမပိုင်းအစီအစဥ် အနေဖြင့် ရှေးဦးစွာ မြို့နယ် ရဲတပ်ဖွဲ့မှ မြို့မစခန်းမှူးဒုရဲမှူးဝင်းအောင်က မူးယစ်ဆေးဝါးတားဆီးကာကွယ်ရေးနှင့် ယာဥ်စည်းကမ်း လမ်းစည်းကမ်းအသိပညာပေးခြင်း၊ အခွန်ဦးစီးဌာနမှ ဦးစီးအရာရှိ ဦးဇော်နိုင်က အခွန်(၆)မျိုးအကြောင်း အသိပညာပေးခြင်း၊၊ အားကစားနှင့်ကာယပညာဦးစီးဌာနမှ ဒုတိယဦးစီးမှူး ဦးဇော်ဝင်းက လူငယ်နှင့်အားကစားကဏ္ဍ အကြောင်း အသိပညာပေးခြင်း၊ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိ ဒေါ်ရွှေရည်ဝင်းကျော်က လူငယ်နှင့် စာဖတ်ခြင်း၏ အကျိုးကျေးဇူး အကြောင်း အသိပညာပေး ဟောပြောခဲ့ကြသည်။
ဆက်လက်၍ ဒုတိယပိုင်း အစီအစဥ်အနေဖြင့်လူငယ်စကားဝိုင်း ဆွေးနွေးပွဲကို ကျင်းပခဲ့ရာ မြို့နယ် ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဒုတိယဦးစီးမှူး ဦးခိုင်မိုးမင်းက ဦးဆောင်ဆွေးနွေးသူအဖြစ် ဆောင်ရွက်ပြီး ရွှေရချိုင် အခြေခံပညာအလယ်တန်းကျောင်း(ခွဲ)မှ Grade-8ကျောင်းသား မောင်လှိုင်မင်းဦးက လူငယ်နှင့်ပတ်ဝန်းကျင်ပျက်စီးစေမှုအား ထိန်းသိမ်းကာကွယ်ခြင်း၊ Grade-9မှ ကျောင်းသူများဖြစ်သော မအိပိုပိုထက်က လူငယ်နှင့်ကျန်းမာဖွံ့ဖြိုးတိုးတက်ရေး၊ မဧကရီကျော် က စာပေမှ ရရှိသည့် မြန်မာစကားပုံအကြောင်း၊ မစန္ဒီမိုးမြင့်က စာဖတ်ခြင်းဖြင့်ကျန်းမာရေးမှ ရရှိသည့် အသိပညာ စသည့် ခေါင်းစဥ်များဖြင့် အသီးသီးဆွေးနွေးခဲ့ကြကြောင်းသိရသည်။ ထို့နောက် ရွှေရချိုင် အ.လ.က(ခွဲ) ကျောင်းမှ ကျောင်းအုပ်ဆရာမကြီး ဒေါ်ဝေမာထွန်းက လူငယ်စကားဝိုင်းအား ပူးပေါင်းဆောင်ရွက်ရသည့်အတွက် ကျေးဇူးတင်စကား ပြောကြားခဲ့သည်။
ထို့နောက် မြို့နယ်ပြန်ကြားရေးနှင့်ပြည်သူ့ဆက်ဆံရေးဦးစီးဌာနက ကလေးအလုပ်သမား ပပျောက်ရေး အသိပညာပေး နံရံကပ်စာစောင် အား ခင်းကျင်းပြသထားရာ တက်ရောက်လာကြသည့် ဆရာ/ဆရာမများ၊ ကျောင်းသားကျောင်းသူများကစိတ်ပါဝင်စားစွာလေ့လာကြည့်ရှု့ခဲ့ကြကြောင်းသိရသည်။
ရွှေရည်ဝင်းကျော်
https://t.me/MyanmarNationalPost
No comments:
Post a Comment