MNP ၊ အောက်တိုဘာ ၁၂
မန္တလေးတိုင်းဒေသကြီး၊ ပြင်ဦးလွင်မြို့တွင် ၂၀၂၃-၂၀၂၄ ပညာသင်နှစ် ကျောင်းသား/ ကျောင်းသူများနှင့် ဆရာ/ဆရာမများအား ကျန်းမာရေးဟောပြောပွဲနှင့် ကျန်းမာရေးစစ်ဆေးခြင်းကို ယမန်နေ့နံနက် (၈)နာရီက အမှတ်(၁) အခြေခံပညာအထက်တန်းကျောင်းရှိ ဧရာဝတီခန်းမဆောင်၌ ကျင်းပပြုလုပ်ရာ တာဝန်ရှိသူများ၊ ဆရာ၊ ဆရာမများနှင့် ကျောင်းသား/ ကျောင်းသူများတက်ရောက်ကြသည်။
ရှေးဦးစွာ ကလေးကုသမှုပါရဂူ ဗိုလ်ကြီးဒေါ်လဲ့လဲ့ဘိုနီမှ သွေးလွန်တုပ်ကွေးရောဂါအကြောင်း အသိပညာပေး အသေးစိတ် ရှင်းလင်းပြောကြားခဲ့ပြီး အမှတ်(၁)၊ တပ်မတော်စစ်ဆေးရုံ ကုတင်(၇၀၀)ဆံ့ ဆေးရုံမှ ဗိုလ်မှူးချုပ် မျိုးသန့်၏ ကြီးကြပ်မှုဖြင့် ဒုတိယဗိုလ်မှူးကြီးမင်းနေဇာဝှိုက်(ခွဲစိတ်ကုသမှုပါရဂူ) ဦးစီး၍ ပါရဂူ(၈) ဦး၊ ဆေးမှူး(၁)ဦး၊ သူနာပြု/ကျွမ်းကျင်သူအရာရှိ (၁၁) ဦး၊ အခြားအဆင့်သူနာပြု(၆)ဦးနှင့် အခြားအဆင့်အထွေထွေ(၅)ဦး၊ စုစုပေါင်း(၃၁) ဦးတို့ဖြင့် ပြင်ဦးလွင်မြို့၊ အ.ထ.က(၁)ရှိ ဆရာ(၃)ဦး၊ ဆရာမ(၂၁)ဦး၊ ကျောင်းသား(၁၄၉)ဦး၊ ကျောင်းသူ(၂၀၉) ဦးတို့အား ကျန်းမာရေးစစ်ဆေးခြင်းများ ဆောင်ရွက်ခဲ့ကြသည်။
အဆိုပါ ဆရာ၊ဆရာမများနှင့် ကျောင်းသား/ကျောင်းသူများအား ကျန်းမာရေးစစ်ဆေးခြင်းလုပ်ငန်းများ ဆောင်ရွက်ရာတွင် ဖျားနာရောဂါ၊ ခွဲစိတ်ရောဂါ၊ အရိုးရောဂါ၊ ကလေးရောဂါ၊ မျက်စိကုသမှုရောဂါ၊ နား၊ နှာခေါင်း၊ လည်ချောင်းရောဂါ၊ သွားရောဂါနှင့် သားဖွား/မီးယပ်ရောဂါ စသည့်ရောဂါများကို စနစ်တကျစစ်ဆေးခဲ့ရာ ဆေးကုသမှုခံယူသည့် ဆရာ/ဆရာမ၊ ကျောင်းသား/ကျောင်းသူ(၃၈၂)ဦးအနက် ECG စက်ဖြင့် နှလုံးသွေးကြောရောဂါ စမ်းသပ်စစ်ဆေးသူ(၁၄)ဦး၊ တီဗွီဓာတ်မှန်ရိုက်စစ်ဆေးသူ(၂၁)ဦး၊ သွေးဖောက်၍ ဆီးချို/သွေးချိုစစ်ဆေးသူ (၇)ဦး၊ သွေးအုပ်စုစစ်ဆေးသူ(၁၈)ဦးနှင့် အားဆေးသွင်းသူ (၈)ဦးတို့ဖြစ်ကြောင်း သိရသည်။
https://t.me/MyanmarNationalPost
No comments:
Post a Comment