တောင်ငူခရိုင်၊ လူထုအခြေပြုဗဟိုဌာန(Community Centre)ခန်းမ၌ စာဖတ်ဝိုင်းကျင်းပ

တောင်ငူ မတ် ၂၂

ပြန်ကြားရေးနှင့်ပြည်သူ့ဆက်ဆံရေးဦးစီးဌာနနှင့် စာအုပ်စာစောင်ချစ်မြတ်နိုးသူများအသင်း(Book Club)တို့ပူးပေါင်း၍ ယမန်နေ့နံနက်ပိုင်းက တောင်ငူခရိုင်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန(Community Centre)ခန်းမတွင် စာရေးဆရာမောင်ခင်မင်(ဓနုဖြူ) ရေးသားထားသည့် အမွေခံတစ်ယောက် အမွေပေးသူတစ်ရာစာအုပ်ဖြင့် စာဖတ်ဝိုင်းကျင်းပသည်။

ရှေးဦးစွာ တောင်ငူခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လက်ထောက်ညွှန်ကြားရေးမှူး ဒေါ်ဆွေဆွေမိုးက စာဖတ်ဝိုင်းကျင်းပရခြင်း၏ ရည်ရွယ်ချက်အား ရှင်းလင်းဆွေးနွေးပြောကြားပြီး စာဖတ်ဝိုင်းကိုကျင်းပရာ စာအုပ်စာစောင်ချစ်မြတ်နိုးသူများအသင်း (Book Club) နာယက(၂) ဦးမြသိန်းက စာဖတ်ဝိုင်းအား ဦးဆောင်ဆွေးနွေးသည်။

ထို့နောက် (Book Club)ဥက္ကဋ္ဌ စာရေးဆရာမောင်ယဥ်ထွေး(တက္ကသိုလ်)က အမွေခံတစ်ယောက် အမွေပေးသူတစ်ရာခေါင်းစဥ်ပါ အကြောင်းအရာများ၊ အဖွဲ့ဝင်ပန်းချီဆရာဦးစိုးမြင့်လေးက ကံရာဇာငယ်၏ အလှူမဏ္ဍပ် ခေါင်းစဥ်ပါအကြောင်းအရာများ၊ (Women Club)အဖွဲ့ဝင် ဒေါ်ပွင့်ဖြူစင်သက်က မဖြေနိုင်လျှင် မအောင်ချင်နှင့်ခေါင်းစဥ်ပါ အကြောင်းအရာများ၊ လက်ထောက်ညွှန်ကြားရေးမှူး ဒေါ်ဆွေဆွေမိုးက ဝတ္တုမဖတ်တာရှက်စရာ ခေါင်းစဥ်ပါ အကြောင်းအရာများ၊ ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ ဦးစီးအရာရှိဒေါ်ခင်သူဇာဝင်းက သူတို့ပြောတဲ့မြန်မာအကြောင်း ခေါင်းစဥ်ပါအကြောင်းအရာများကို ဆွေးနွေးပြောကြားသည်။ ထို့နောက် စာဖတ်ဝိုင်းသို့ တက်ရောက်လာကြသူများက ၎င်းတို့၏ အတွေးအမြင်များကို ပြန်လည်ဆွေးနွေးခဲ့ကြရာ စာအုပ်စာစောင်ချစ်မြတ်နိုးသူများအသင်း (Book Club) နာယက(၂)ဦးမြသိန်းက  ဆွေးနွေးချက်များအပေါ် ပြန်လည်သုံးသပ်ဆွေးနွေးသည်။

တောင်ငူခရိုင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနအနေဖြင့် ပြည်သူများစာဖတ်ခြင်းဖြင့်အသိပညာဗဟုသုတရရှိစေရန်၊ စာပေချစ်မြတ်နိုးသူများအချင်းချင်း ရင်းနှီးကျွမ်းဝင်မှုရှိလာစေရန်ရည်ရွယ်၍ စာဖတ်ဝိုင်းများကို လစဥ်ကျင်းပ ဆောင်ရွက်လျက်ရှိကြောင်း သိရသည်။

ဇော်ကိုကို(တောင်ငူ)

https://t.me/MyanmarNationalPost