မြောက်ကိုရီးယားက ခရုဇ်ဒုံးကျည်နှင့် လေယာဉ်ပစ်ဒုံးကျည် ထိပ်ဖူး အမျိုးအစားသစ် စမ်းသပ်အောင်မြင်

မြောက်ကိုရီးယားသည် ခရုဇ်ဒုံးကျည်နှင့် လေယာဉ်ပစ်ဒုံးကျည် အမျိုးအစားသစ်အတွက် အလွန်ကြီးမားသော ထိပ်ဖူး ကို အောင်မြင်စွာ စမ်းသပ်နိုင်ခဲ့ကြောင်း နိုင်ငံပိုင် KCNA သတင်းဌာနက ဖော်ပြသည်။

Hwasal-1Ra-3 မဟာဗျူဟာမြောက် ခရုဇ်ဒုံးကျည်နှင့် Pyoltsi-1-2 လေယာဉ်ပစ်ဒုံးကျည်အတွက် ထိပ်ဖူးစမ်းသပ်မှုကို သောကြာနေ့တွင် ပင်လယ်ဝါ၌ ပြုလုပ်ခဲ့ကြောင်း အေဂျင်စီက စနေနေ့တွင် ပြောကြားခဲ့သည်။ “စမ်းသပ်မှုအရ  သက်ဆိုင်ရာ ရည်ရွယ်ချက်တွေကို အောင်မြင်အောင် ဆောင်ရွက်နိုင်ခဲ့တယ်” ဟု ၎င်းကဆိုသည်။

KCNA က “စမ်းသပ်မှုတွေဟာ အမျိုးသားကာကွယ်ရေးသုတေသနအဖွဲ့အစည်းတွေရဲ့ ပုံမှန်အလုပ်တွေရဲ့ အစိတ်အပိုင်းတွေဖြစ်ပြီး ကိုရီးယားကျွန်းဆွယ်ရဲ့  အခြေအနေနဲ့ ဘာမှမဆိုင်ပါဘူး” လို့ ဆိုပါတယ်။

သောကြာနေ့ ဒေသစံတော်ချိန် ညနေ (၃ ၃၀) ခန့်တွင် မြောက်ကိုရီးယားမှ ပစ်လွှတ်သော ခရုဇ်ဒုံးကျည်နှင့် လေယာဉ်ပစ် ဒုံးကျည်အများအပြားကို တွေ့ရှိခဲ့ကြောင်း တောင်ကိုရီးယားစစ်တပ်က ပြောကြားခဲ့သည်။ လက်နက်များ၏ အသေးစိတ် အချက်အလက်များကို ယခုအခါ ခွဲခြမ်းစိတ်ဖြာထားကြောင်း ၎င်းက ဆက်လက်ပြောသည်။

"ကျွန်တော်တို့ရဲ့ စစ်တပ်ဟာ မြောက်ကိုရီးယားရဲ့ ရန်စမှုတွေနဲ့ စစ်ရေးလှုပ်ရှားမှုတွေရဲ့ လက္ခဏာတွေကို အနီးကပ် စောင့်ကြည့်နေပြီး ခိုင်မာတဲ့ ပေါင်းစပ်ကာကွယ်ရေး အနေအထားကို ထိန်းသိမ်းထားပါတယ်" ဟု ဆိုးလ်၏ ပူးတွဲစစ်ဦးစီးချုပ်က ပြောကြားခဲ့သည်။

၎င်း၏ ပဲ့ထိန်းဒုံးကျည်နှင့် နျူကလီးယား အစီအစဉ်များအပေါ် နိုင်ငံတကာ ပိတ်ဆို့အရေးယူမှုအောက်တွင် ကျန်ရှိနေသည့် ပြုံယမ်းသည် နိုင်ငံ၏ခေါင်းဆောင် ကင်ဂျုံအန်း က တောင်နှင့် ပြန်လည်သင့်မြတ်ရေး ကြိုးပမ်းသည့် မူဝါဒကို ရပ်ဆိုင်းလိုက်ပြီဟု ကြေငြာခဲ့သည်။

Yonhap ၏အဆိုအရ ၂၀၂၄ ခုနှစ်တွင် မြောက်ကိုရီးယားမှ ဆဋ္ဌမအကြိမ်မြောက် ခရုဇ်ဒုံးကျည်ပစ်လွှတ်မှုမှာ သောကြာနေ့က ဖြစ်သည်။

မြောက်ကိုရီးယားမှ ထုတ်လုပ်သော ပဲ့ထိန်းဒုံးကျည်များသည် အမေရိကန်ပြည်မကြီးရှိ မည်သည့်နေရာတွင်မဆို ရောက်ရှိနိုင်ကြောင်း ပြီးခဲ့သည့်နှစ်တွင် ဂျပန်အာဏာပိုင်များက သတိပေးခဲ့သည်။ ဝါရှင်တန်၊ ဆိုးလ်နှင့် တိုကျိုတို့သည် ပြုံယမ်းကို ချုပ်ကိုင်ရန် ကြိုးပမ်းမှုဖြင့် 2023 ခုနှစ်တွင် စစ်ရေးလေ့ကျင့်မှုများ ပြုလုပ်ရန်၊ မြောက်ကိုရီးယား၏ ဒုံးကျည်ပစ်လွှတ်မှုဆိုင်ရာ အချက်အလက်များကို အချိန်နှင့်တပြေးညီ မျှဝေရန်နှင့် အကျပ်အတည်း ဆက်သွယ်ရေးအတွက် hotline ဖွင့်ရန် သဘောတူညီခဲ့ကြသည်။

ပြုံးယမ်း၏နျူကလီးယားနှင့် ဒုံးကျည်ခြိမ်းခြောက်မှုများကို ခံနိုင်ရည်ရှိစေရန်အတွက် နိုင်ငံသုံးနိုင်ငံသည် တောင်ကိုရီးယားနှင့် ဂျပန်ကြား နိုင်ငံတကာရေပိုင်နက်တွင် အမေရိကန်လေယာဉ်တင်သင်္ဘောတစ်စင်းပါဝင်သည့် စစ်ရေးလေ့ကျင့်မှုကို ပြီးခဲ့သည့်သီတင်းပတ်က ပြုလုပ်ခဲ့သည်။

ကျွန်းဆွယ်တွင် မသေချာမရေရာသော မတည်ငြိမ်မှုအခြေအနေကြောင့် “ယခုအချိန်သည် ယခင်ကထက် စစ်ပွဲအတွက် ပိုမိုသေချာစွာပြင်ဆင်ရမည့်အချိန်ဖြစ်သည်” ဟု ယခုလ အစောပိုင်းတွင် ကင်က ပြောကြားခဲ့သည်။ 

Ref - RT

#News