ယူအေအီးနိုင်ငံတွင် အခက်အခဲကြုံတွေ့နေရသည့် မြန်မာနိုင်ငံသူတစ်ဦးအား နိုင်ငံတော်အစိုးရက အမိနိုင်ငံသို့ ပြန်လည်ခေါ်ဆောင်

ရန်ကုန်၊ ဇွန် ၁၄

နိုင်ငံတော်အစိုးရအနေဖြင့် ပြည်ပတွင် ရောက်ရှိနေသည့် အမိနိုင်ငံသားများ အခက်အခဲကြုံတွေ့နေရပါက နိုင်ငံသားများအပေါ် အလေးအနက်တန်ဖိုးထားသည့်အနေဖြင့် မည်သို့သောအခြေအနေနှင့် တွေ့ကြုံရသည့်တိုင် မြန်မာကောင်စစ်ဝန်ချုပ်ရုံး၊ မြန်မာသံရုံးနှင့် သက်ဆိုင်ရာနိုင်ငံသံရုံးများချိတ်ဆက်၍ အမိနိုင်ငံသားများ မြန်မာနိုင်ငံသို့ အမြန်ဆုံးအေးချမ်းလုံခြုံစွာ ပြန်လည်ရောက်ရှိနိုင်ရေး ဆောင်ရွက်ပေးလျက်ရှိသည်။

ထိုသို့ ဆောင်ရွက်ပေးလျက်ရှိရာ ယူအေးအီးနိုင်ငံတွင် အခက်အခဲကြုံတွေ့နေရသည့် မြန်မာနိုင်ငံသူ မသက်သက်လင်းအား အမိနိုင်ငံသို့ အမြန်ဆုံးပြန်လည်ပို့ဆောင်နိုင်ရန် မြန်မာကောင်စစ်ဝန်ချုပ်ရုံးအနေဖြင့် ယူအေအီးနိုင်ငံ၊ ပြည်ထဲရေးဝန်ကြီးဌာန၊ သက်ဆိုင်ရာပြည်နယ်ရဲတပ်ဖွဲ့နှင့် လူ့စွမ်းအားအရင်းအမြစ်နှင့် နိုင်ငံသားအကျိုးစီးပွားမြှင့်တင်ရေး ဝန်ကြီးဌာနတို့မှ အာဏာပိုင်များနှင့်ညှိနှိုင်း၍ ပြန်လည်ခေါ်ဆောင်နိုင်ခဲ့ရာ မြန်မာနိုင်ငံသူ မသက်သက်လင်းသည် ဇွန်လ ၁၂ ရက်က ဆော်ဒီအာရေဗျနိုင်ငံ ဒူဘိုင်းမြို့မှ ဒေသစံတော်ချိန် မွန်းလွဲ ၂ နာရီတွင် လေကြောင်းခရီးစဉ်ဖြင့် ထွက်ခွာခဲ့ပြီး ရန်ကုန်မြို့သို့ ၁၂-၆-၂၀၂၄ ရက်နေ့ည ၁၀ နာရီ ၁၅ မိနစ်တွင် ပြန်လည်ရောက်ရှိခဲ့သည်။

မြန်မာနိုင်ငံသူ မသက်သက်လင်းသည် အာရပ်စော်ဘွားများ ပြည်ထောင်စု၊ အဘူဒါဘီမြို့တွင် အလုပ်လုပ်ကိုင်စဉ် ကျန်းမာရေးအခြေအနေကြောင့် မြန်မာနိုင်ငံသို့ ပြန်လိုကြောင်း အေဂျင်စီရုံးသို့ ပြောကြားရာ အိမ်ရှင်က နိုင်ငံကူးလက်မှတ်ကုန်ကျစရိတ်၊ လေယာဉ်လက်မှတ်ခ၊ ယူအေအီးနိုင်ငံသို့ ရောက်ရှိချိန်သွားလာစရိတ်၊ အလုပ်မရမီစားသောက်စရိတ်များ ပါဝင်သည့် ယူအေအီးဒါဟမ်း ၂၃၀၀၀ (အမေရိကန်ဒေါ်လာ ၆၅၀၀)အကုန်အကျခံပြီး အေဂျင်စီရုံး၌ ပေးချေခေါ်ယူခဲ့ရခြင်းဖြစ်၍ ထိုငွေကို အိမ်ရှင်ထံပေးချေပြီးမှသာ ပြန်ခွင့်ပြုနိုင်မည်ဖြစ်ကြောင်း၊ မြန်မာနိုင်ငံမှပို့ဆောင်ခဲ့သော မြန်မာအေးဂျင့်ကို အသိပေးရာတွင်လည်း ဆောင်ရွက်ပေးနိုင်မှုမရှိခဲ့ကြောင်းသိရပြီး မြန်မာကောင်စစ်ဝန်ချုပ်ရုံးမှ အဆိုပါကိစ္စနှင့်စပ်လျဉ်း၍ ယူအေအီးနိုင်ငံခြားရေးဝန်ကြီးဌာနနှင့် ညှိုနှိုင်းဆောင်ရွက်ခဲ့ပြီး အသွား/ အပြန် လေယာဉ်လက်မှတ်ခ မြန်မာငွေ ကျပ် ၃၃ သိန်း ကျခံစေ၍ မြန်မာနိုင်ငံသို့ ပြန်လည်ထွက်ခွာခွင့်ရရှိခဲ့ရာ ယမန်နေ့ညပိုင်းက ရန်ကုန်မြို့သို့ ပြန်လည်ရောက်ရှိခဲ့ခြင်းဖြစ်သည်။

ဆော်ဒီအာရေဗျနိုင်ငံ၊ အဘူဒါဘီမြို့တွင် အခက်အခဲကြုံတွေ့ခဲ့ရမှုနှင့် စပ်လျဉ်း၍ မသက်သက်လင်းက “ကျွန်မက ဧရာဝတီတိုင်းဒေသကြီး ပုသိမ်ချောင်းမြို့နယ် လက်ပံကျေးရွာမှာ နေပါတယ်။ ဒူဘိုင်းကို ၂၀၂၃ ခုနှစ်၊ ဇွန်လမှာ သွားရောက်ခဲ့ပါတယ်။ မြန်မာနိုင်ငံမှာ ပုဂ္ဂလိကဆေးရုံမှာ အလုပ်လုပ်ရင်းဝင်ငွေအဆင်မပြေတာနဲ့ သူငယ်ချင်းတစ်ယောက်ရဲ့အကူအညီနဲ့ ဒူဘိုင်းမြို့ကို သွားပြီး အလုပ်လုပ်ခဲ့ပါတယ်။ အိမ်ရှင်နဲ့အဆင်ပြေပေမယ့် အိပ်ချိန်မလုံလောက်ပါဘူး။ ည ၂ နာရီခွဲမှာအိပ်ရပြီး မနက် ၅ နာရီထရပါတယ်။ လုပ်ခလစာရပေမယ့် အိပ်ရေးမဝတဲ့ဒဏ်ကြောင့် အလုပ်လုပ်ရတာအဆင်မပြေကြောင်းနဲ့ နှစ်ပတ်မှာတစ်ကြိမ် ဖုန်းသုံးခွင့်ရချိန်မှာ အိမ်ကိုလှမ်းပြီး ပြောတော့ လူကုန်တားအဖွဲ့ကို အိမ်မှမိဘများက အကူအညီတောင်းခံခဲ့ပါတယ်။ ဒူဘိုင်းမြို့က မြန်မာကောင်စစ်ဝန်ချုပ်ရုံးက အကူအညီပေးခဲ့တဲ့အတွက် မြန်မာပြည်ကို ပြန်လာခွင့်ရခဲ့တာပါ။ ယဉ်ကျေးမှု၊ ဘာသာစကားနဲ့ စားသောက်မှုပုံစံမတူတဲ့အတွက်လည်း အခက်အခဲများစွာရှိခဲ့ပါတယ်။ အဲဒီကိုသွားမယ်လို့ ပြင်ဆင်နေသူတွေရှိရင်လည်း မသွားစေလိုပါဘူး။ ရောက်ရှိနေသူတွေ အဆင်ပြေရဲ့လားလို့လည်း မြန်မာပြည်က မိဘဆွေမျိုးများက လှမ်းပြီးမေးမြန်းသင့်ပါတယ်။ အဲဒီကိုသွားမယ်ဆိုရင် ငွေတစ်ခုတည်းနဲ့ မက်လုံးပေးတာကို မယုံကြည်ဘဲ လေ့လာစုံစမ်းပြီးမှ သွားသင့်ပါတယ်။ အခက်အခဲတွေအများကြီး စောင့်ကြိုနေလို့ပါ။ အခုလိုမြန်မာနိုင်ငံသားတစ်ဦး ဒုက္ခရောက်နေချိန်မှာ အစစအရာရာကူညီဖြေရှင်းပေးပြီး လေဆိပ်ကနေ အမိနိုင်ငံကိုပြန်ရောက်တဲ့အထိ အကူအညီပေးခဲ့တဲ့ ဝန်ထမ်းအားလုံးကို ကျေးဇူးတင်ပါတယ်။ အထူးသဖြင့် မြန်မာကောင်စစ်ဝန်ရုံးချုပ်က လူကြီးမင်းများအားလုံးကို အထူးပဲကျေးဇူးတင်ပါတယ်”ဟု ပြောကြားသည်။

ယူအေအီးနိုင်ငံတွင် အခက်အခဲများ ကြုံတွေ့နေရသည့် မြန်မာနိုင်ငံသားများ အမိနိုင်ငံသို့ ပြန်လည်ထွက်ခွာနိုင်ရန် မြန်မာကောင်စစ်ဝန်ချုပ်ရုံးက ကူညီဆောင်ရွက်ပေးလျက်ရှိပြီး ထိုနိုင်ငံတွင် အလုပ်လုပ်ကိုင်စဉ် အလုပ်ရှင်နှင့်အဆင် မပြေမှုဖြစ်ပေါ်ပါက မြန်မာပွဲစားများက တာဝန်ယူဖြေရှင်းပေးမှုမရှိသည့်အပြင် ဒူဘိုင်းအေဂျင်စီရုံးနှင့် အလုပ်ရှင်တို့က နိုင်ငံကူးလက်မှတ်များကို သိမ်းဆည်းထားခြင်း၊ ပွဲစားများက အေဂျင်စီရုံးအဆင့်ဆင့်ထံ လက်လွှဲအသုံးချမှုတို့ကို ကြုံတွေ့နေရကြောင်း သိရသည်။

နိုင်ငံတော်အစိုးရအနေဖြင့် ပြည်ပ၌ အလုပ်လုပ်ကိုင်စဉ် အခက်အခဲကြုံတွေ့ရသည့် မြန်မာနိုင်ငံသားများကို မြန်မာသံရုံးနှင့် ကောင်စစ်ဝန်ချုပ်ရုံးတို့၏ ညှိနှိုင်းကူညီဆောင်ရွက်မှုဖြင့် အမိနိုင်ငံသို့ ပြန်လည်ခေါ်ဆောင်နိုင်ခဲ့ကြပြီး ယခုလိုအမိနိုင်ငံသားများ အတိဒုက္ခကြုံတွေ့နေရစဉ် ကူညီကယ်တင်ပေးမှုအား အလုပ်သမားနှင့်မိဘဆွေမျိုးများက နိုင်ငံတော်အစိုးရနှင့် မြန်မာသံရုံးကောင်စစ်ဝန်ချုပ်ရုံးတို့အား လှိုက်လှိုက်လှဲလှဲအထူးကျေးဇူးတင်လျက်ရှိကြောင်း သတင်းရရှိသည်။

ဓာတ်ပုံ - ကနူး/ရဲထွဋ်

Join - https://t.me/MyanmarNationalPost