စာဖတ်ရှိန်မြှင့်တင်ရေး လူငယ်စကားဝိုင်းကို ​ကြံခင်းမြို့၊ အခြေခံပညာဦးစီးဌာနနှင့် စက်မှု၊ စိုက်ပျိုး၊မွေးမြူရေးအထက်တန်းကျောင်း(ချင်း​​မြောင်)၌ ကျင်းပပြုလုပ်

ကြံခင်း၊ ဇူလိုင်  ၂၃

ဧရာဝတီတိုင်းဒေသကြီး၊ ​မြန်အောင်ခရိုင်၊ ကြံခင်းမြို့၊ ကလို့ကွင်းအုပ်စု၊ ချင်းမြောင်၌ ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် အခြေခံပညာဦးစီးဌာန၊ စက်မှု၊ စိုက်ပျိုး၊ မွေးမြူရေးအထက်တန်းကျောင်း(ချင်း​​မြောင်) ကျောင်းတို့  ပူးပေါင်းကျင်းပ​သော စာဖတ်ရှိန်မြှင့်တင်ရေး လူငယ်စကားဝိုင်းကို ယနေ့ နံနက်ပိုင်းက အဆိုပါ​ကျောင်းရှိ ပညာတန်ဆောင်ခန်းမ၌ ကျင်းပပြုလုပ်သည်။

ရှေ့ဦးစွာ အခမ်းအနားကို သဲဖြူကျေးရွာအုပ်ချုပ်ရေးမှူး ဦးနေဝင်းနှင့် အ.ထ.က(ချင်းမြောင်) ကျောင်းအုပ် ဆရာမကြီး ​‌ဒေါ်အေးအေးမင်းတို့က အဖွင့်အမှာစကား ပြောကြားပြီး၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန ဦးစီးအရာရှိ ဒေါ်ခင်မိုး​​မြင့်က သားငယ်သမီးငယ်များအား လူတော်လူကောင်း များဖြစ်ပေါ်လာစေရန်၊ အပြောစွမ်းရည် မြင့်မားလာစေရန်၊ ဆွေးနွေးပြောဆိုတတ်သည့်အလေ့အကျင့် ကောင်းများရရှိလာစေရန်၊ စာဖတ်ရှိန်မြှင့်မားလာစေရန် နှင့် ​ကျောင်းသား၊ ကျောင်းသူများ ဗလငါးတန်ပြည့်စုံလာစေရန် စသည့်ရည်ရွယ်ချက်များစွာဖြင့်  လူငယ်စကားဝိုင်းများ ကျင်းပရခြင်း​ဖြစ်ကြောင်း ရှင်းလင်းပြောကြားသည်။

ဆက်လက်၍ လူငယ်စကားဝိုင်းကိုကျင်းပရာ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ဦးစီးအရာရှိ ဒေါ်ခင်မိုး​​မြင့်က ဦးဆောင်ဆွေးနွေးသူ Moderator  အဖြစ်ဆောင်ရွက်ကာ ဒုတိယနှစ်(စက်မှု)မှ ကျောင်းသား မောင်ကောင်းခိုင်ခန့်က  " ကျောင်းသားတို့ရဲ့ စက်မှုပညာ" ခေါင်းစဉ်ဖြင့်လည်းကောင်း၊ ပထမနှစ် (မွေးမြူရေး)မှ မဟန်ဆုယဉ်က " မွေးမြူရေးနှင့် ကျောင်းသားလူငယ်" ခေါင်းစဉ်ဖြင့်လည်းကောင်း၊ Grade-6  ​ကျောင်းသား မောင်ဇွဲဝဿန်ဦးက "ကျောင်းသားလူငယ်နှင့် ပညာရေးအခွင့်အလမ်း" ခေါင်းစဉ်ဖြင့်လည်းကောင်း၊ ဒုတိယနှစ် (စိုက်ပျိုး​ရေး)မှ မသိမ့်နဒီထွန်း က "သင်ယူစရာ စိုက်ပျိုးပညာ" ခေါင်းစဉ်ဖြင့်လည်းကောင်း အသီးသီး ဆွေးနွေးခဲ့ကြ​ကာ ဆွေးနွေးချက္များအပေါ် ကျောင်းအုပ်ဆရာမကြီးက သုံးသပ်ဆွေးနွေးပြောကြားခဲ့သည်။ ယင်းနောက် အခမ်းအနား သို့တက်ရောက်လာကြသော ကျောင်းသား၊ ကျောင်းသူများက သိရှိလိုသည်များကိုမေးမြန်းခဲ့ကြရာ ကဏ္ဍအလိုက် ဆွေးနွေးကြသူများက ပြန်လည်ဖြေကြားကြပြီး အမှတ်တရ စုပေါင်းမှတ်တမ်းတင် ဓာတ်ပုံရိုက်ကူး ကြသည်။

ယင်းနောက် ကြံခင်းမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာနက ခင်းကျင်းပြသထားသည့် သုတ ရသစာအုပ်စာစောင်ပြပွဲ၊ ကလေးအလုပ်သမားပပျောက်ရေးအသိပညာပေးနံရံကပ်စာစောင်နှင့် မူးယစ်ဆေးဝါးအသိ ပညာပေး နံရံကပ်စာစောင်များကို ကျောင်းသား၊ ကျောင်းသူများက စိတ်ပါဝင်စားစွာဖြင့် လေ့လာကြည့်ရှုခဲ့ကြကြောင်း သိရသည်။

ဖြိုးဝေလင်း

Join - https://t.me/MyanmarNationalPost