မိုင်းဖြတ်မြို့နယ်၌ ​အောင်ဇမ္ဗူဆုတောင်းပြည့်စေတီတော် ရွှေထီးတော်တင်လှူပွဲ မင်္ဂလာအခမ်းအနား စည်ကားသိုက်မြိုက်စွာ ကျင်းပ

မိုင်းဖြတ် , ဒီဇင်ဘာ ၁၅

ရှမ်းပြည်နယ်(အ​ရှေ့ပိုင်း)၊ တာချီလိတ်ခရိုင်၊ မိုင်းဖြတ်မြို့နယ်တွင် အဂ္ဂမဟာသဒ္ဓမ္မဇောတိကဓဇ ဘဒ္ဒန္တနန္ဒောဘာသအမှူးပြု၍ အလှူရှင်များမှ စုပေါင်းတည်ထားကိုးကွယ်တော်မူသည့် အောင်ဇမ္ဗူဆုတောင်းပြည့်စေတီတော်မြတ်ကြီး ရွှေထီးတော်တင်လှူပွဲ မင်္ဂလာအခမ်းအနားကို ယနေ့နံနက်ပိုင်းက ထေရဝါဒဗုဒ္ဓသာသနာပြု(ဗဟို) ကျောင်းတိုက်အတွင်း စည်ကားသိုက်မြိုက်စွာ ဆင်ယင်ကျင်းပခဲ့သည်။

ရှေးဦးစွာ န​မောတဿသုံးကြိမ်ရွတ်ဆို ဘုရားကန်​တော့၍ အခမ်းအနားကိုဖွင့်လှစ်ခဲ့သည်။ ထို့​နောက် ဘဒ္ဒန္တသုနန္ဒ အရှင်သူမြတ်က သမ္မာ​ဒေဝနတ်​ဗြဟ္မာများကိုဖိတ်ကြား၍ အကျိုးတော်ဆောင်ဆရာတော် ဘဒ္ဒန္တဣန္ဒေါဘာသထံမှ ပရိသတ်များက (၉)ပါးသီလ ခံယူဆောက်တည်ခဲ့ကြသည်။ ယင်း​နောက် သံဃာတော်အရှင်သူမြတ်တို့ထံ ရတနာစိန်ဖူးတော်၊ ငှက်မြတ်နားတော်၊ ရွှေထီးတော်ဘုံအဆင့်များနှင့် နဝကမ္မဝတ္ထုငွေများကို ဗိုလ်မှူးကြီး သန့်လွင်စိုးနှင့် စစ်ဘက်ဆိုင်ရာတာဝန်ရှိသူများ၊ မြို့နယ်စီမံအုပ်ချုပ်​ရေးအဖွဲ့ဥက္ကဋ္ဌ ဦးလှမျိုးနှင့် ဌာနဆိုင်ရာများ၊ အလှူရှင်များက ဆက်ကပ်လှူဒါန်းခဲ့ပြီး ဇွဲမစိုးရိမ်ကျောင်းတိုက်ဆရာတော် ဘဒ္ဒန္တပညာဓိကသိရီထံမှ အနုမောဓနာတရားနာယူ၍ ရေစက်သွန်းချအမျှပေးဝေခြင်းနှင့် အဂ္ဂမဟာသဒ္ဓမ္မဇောတိကဓဇ ဘဒ္ဒန္တနန္ဒောဘာသက အလှူရှင်များအား ဂုဏ်ပြုမှတ်တမ်းလွှာများ ပေးအပ်ခဲ့သည်။

ဆက်လက်၍ ဆရာ​တော်ကြီးများ၊ ဘုရားဒါယကာ၊ ဒါယိကာမများက ရတနာစိန်ဖူးတော်၊ ငှက်မြတ်နား​တော်နှင့် ​ရွှေထီး​တော်ဘုံအဆင့်များကိုပင့်​ဆောင်၍ ​စေတီတော်မြတ်ကြီးအား လက်ယာရစ်သုံးကြိမ် လှည့်လှည်ပူ​ဇော်ခဲ့သည်။

ထို့​နောက် ရတနာစိန်ဖူးတော်၊ ငှက်မြတ်နားတော်နှင့် ရွှေထီးတော်ဘုံအဆင့်များကို မင်္ဂလာရထားပျံဖြင့် အဆင့်ဆင့်တင်လှူပူဇော်၍ အ​မွှေးနံ့သာရည်များပက်ဖြန်းကာ ရတနာရွှေမိုး၊ ငွေမိုးရွာသွန်းခဲ့ပြီး စေတီတော်မြတ်ကြီးအား ဗုဒ္ဓဘိသေက ဘုရားအနေကဇာတင်လှူပူဇော်ခြင်း၊ နတ်ဗြဟ္မာများအား ပြန်လည်ပို့ဆောင်ခြင်းနှင့် ​စေတီ​တော်မြတ်ကြီး၏  ပုရဝုဏ်အတွင်း ဆွမ်းဆန်စိမ်း​လောင်းလှူပွဲကို စည်းကားသိုက်မြိုက်စွာကျင်းပခဲ့သည်။

ယင်း​နောက် အခမ်းအနားများအပြီးတွင် သံဃာ​တော်အရှင်သူမြတ်များအား ​နေ့ဆွမ်းဆက်ကပ်ခြင်း၊ ဧည့်ပရိတ်သတ်များအား ဧည့်ခံ​ကျွေး​မွေးခြင်းအစီစဥ်များကို ဆောင်ရွက်ခဲ့​ကြောင်း သိရသည်။

သန်းထွန်း​အေး 

https://t.me/MyanmarNationalPost