သင်္ဃန်းကျွန်းမြို့နယ်၌ မီးဘေးကြိုတင်ကာကွယ်‌‌ရေး လက်တွေ့သရုပ်ပြ မီးငြှိမ်းသတ်ရေး ဇာတ်တိုက်လေ့ကျင့်

 

ရန်ကုန်,  ဒီဇင်ဘာ  ၁၅

သင်္ဃန်းကျွန်းမြို့နယ်၊ ငမိုးရိပ်ရပ်ကွက်၊ စံပြငမိုးရိပ်ဈေးတွင် မီးဘေးကြိုတင်ကာကွယ်‌‌ရေးအတွက် လက်တွေ့သရုပ်ပြ မီးငြှိမ်းသတ်ရေး ဇာတ်တိုက်လေ့ကျင့်ခြင်းကို ယနေ့ နံနက် ၁၀ နာရီက ဆောင်ရွက်ခဲ့ကြောင်း သိရသည်။

အဆိုပါ ဇာတ်တိုက်လေ့ကျင့်မှုအား မြို့နယ်စီမံအုပ်ချုပ်ရေးအဖွဲ့၏ စီစဉ်ကြီးကြပ်မှုဖြင့် သင်္ဃန်းကျွန်းမြို့နယ် မီးသတ်စခန်းမှ ဒုမီးသတ်ဦးစီးမှူး ဦးဝေဖြိုးခိုင်ဦးဆောင်သည့် သန္ဓေမီးသတ်တပ်ဖွဲ့ဝင်များက မီးဘေး၊ သဘာဝဘေးအန္တရာယ် ကြိုတင်ကာကွယ်ရေးအတွက် ဆောင်ရန်/ရှောင်ရန်အချက်များ၊ မီးသတ်ဆေးဘူး ထိန်းသိမ်းထားသိုနည်းများကို အသိပညာပေး ရှင်းလင်းပြောကြားပြီး ဈေးရှေ့တွင် မီးငြှိမ်းသတ်ခြင်းနှင့်ပတ်သက်၍ အရေးပေါ်မီးလောင်မှုဖြစ်ပေါ်လာပါက မီးသတ်ဆေးဘူးဖြင့် မီးငြှိမ်းသတ်နည်း၊ ဂစ်မီးအသုံးပြုသူများအနေဖြင့် မီးလောင်မှုဖြစ်ပေါ်လာပါက အရေးပေါ်မီးငြှိမ်းသတ်နည်း၊ မီးသတ်ဆေးဘူးမရရှိနိုင်သည့်အခါ ရေစိုအဝတ်ဖြင့် အောက်ဆီဂျင်ဖြတ်တောက်၍ မီးငြှိမ်းသတ်နည်းများ လက်တွေ့သရုပ်ပြသခြင်း၊ တက်ရောက်လာကြသည့် ဈေးသူ/ ဈေးသား၊ ဈေးတာဝန်ခံများမှ ကိုယ်တိုင်ပါဝင်ပြီး လက်တွေ့မီးငြှိမ်းသတ်ခြင်းများ ဆောင်ရွက်ခဲ့သည်။

အဆိုပါအခမ်းအနားသို့ သင်္ဃန်းကျွန်းခရိုင် စည်ပင်သာယာဈေးများရုံးမှ ဌာနစုမှူးဦးခင်မောင်သိန်း၊ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးလှမျိုး၊ မြို့နယ်အတွင်းရှိဈေးတာဝန်ခံများ၊ ဝန်ထမ်းများနှင့် ဈေးသူ/ဈေးသားများ စုစုပေါင်း (၇၀)ဦးခန့် တက်ရောက်ခဲ့ကြောင်း သိရသည်။

သူရိန်

https://t.me/MyanmarNationalPost