သာစည်မြို့၌ သံဃာတော် ၁၀၈ ပါးတို့အား ဆွမ်း၊ လှူဖွယ်ပစ္စည်းများနှင့် နဝကမ္မဝတ္ထုငွေများ လောင်းလှူ

သာစည်  ၊ မေ ၁၂

မန္တလေးတိုင်းဒေသကြီး သာစည်မြို့၌ တိုင်းဒေသကြီးအစိုးရအဖွဲ့၏ ဦးဆောင်လမ်းညွှန်မှုဖြင့် မြို့နယ်စီမံအုပ်ချုပ်ရေးအဖွဲ့က ကြီးမှူးကျင်းပသော သံဃာတော် ၁၀၈ ပါးတို့အား ဆွမ်း၊ ဆွမ်းဟင်း၊ လှူဖွယ်ပစ္စည်းများနှင့် နဝကမ္မဝတ္ထုငွေများ လောင်းလှူပူဇော်ပွဲကို ကဆုန်လပြည့် (ဗုဒ္ဓ) နေ့ ယမန်နေ့နံနက်က အမှတ် (၆) ရပ်ကွက် သာယာကုန်းကျောင်းတိုက်တွင် ကျင်းပပြုလုပ်ကြောင်း သိရသည်။

ရှေးဦးစွာ နံနက် ၅ နာရီခွဲတွင် ကြွရောက်လာသော သံဃာတော် ၁၀၈ ပါးတို့အား ကြာဆံဟင်းခါးဖြင့် အရုဏ် ဆွမ်း ဆပ်ကပ်သည်။ ဆက်လက်ပြီး နံနက် ၆ နာရီတွင် မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးမျိုးသက်ကျော် နှင့်အဖွဲ့ဝင်များကဦးဆောင်၍ မြို့နယ်အဆင့် ဌာနဆိုင်ရာအကြီးအကဲများနှင့် ဝန်ထမ်းများ၊ မြို့ပေါ်ရပ်ကွက် အုပ်ချုပ်ရေးမှူးများ၊ မြို့နယ်အမျိုးသမီးရေးရာအဖွဲ့ဝင်များ၊ မြို့နယ်မိခင်နှင့်ကလေးစောင့်ရှောက်ရေး အသင်းဝင်များနှင့် အလှူရှင်များက ဆွမ်း၊ ဆွမ်းဟင်း၊ လှူဖွယ်ပစ္စည်းများနှင့် နဝကမ္မဝတ္ထုငွေများ လောင်းလှူခဲ့ကြပြီး နိုင်ငံတော်ဗဟိုဝန်ဆောင် သာယာကုန်းကျောင်းတိုက်ဆရာတော်ဘဒ္ဒန္တပုညဓဇထံမှ အနုမောဒနာတရား နာယူကြပြီး လှူဒါန်းမှု အစုစုတို့အား ရေစက်ချအမျှဝေခဲ့ကြောင်း သိရသည်။

ထို့နောက် နံနက် ၈ နာရီခွဲတွင် အမှတ် (၄) ရပ်ကွက် ရတနာမာန်အောင်ဘုရားဝင်းအတွင်းရှိ ဗောဓိညောင်ပင်၌ မြို့နယ်အမျိုးသမီးရေးရာအဖွဲ့ဝင်များ၊ မြို့နယ်မိခင်နှင့်ကလေးစောင့်ရှောက်ရေးအသင်းဝင်များနှင့် အထွေထွေအုပ်ချုပ်ရေးဦးစီးဌာန ဝန်ထမ်းများ စုပေါင်း၍ ကဆုန်ညောင်ရေသွန်းလောင်းခဲ့ကြောင်း သိရသည်။

https://t.me/MyanmarNationalPost