တာမွေ၊ မေ ၂၆
ရန်ကုန်တိုင်းဒေသကြီး သင်္ဃန်းကျွန်းခရိုင် တာမွေမြို့နယ် ကျိုက္ကဆံလမ်းရှိ မူးယစ်ဆေးစွဲသူများပြန်လည် ထူထောင်ရေးအသင်း(မြန်မာ)ဗဟို၏ စီစဉ်မှုဖြင့် ယနေ့နံနက်ပိုင်းအချိန်က အဆိုပါအသင်းရုံး မေတ္တာစံအိမ်ခန်းမ၌ မူးယစ်ဆေးဖြတ်ပြီးသူများအား စိတ်ပိုင်းဆိုင်ရာပြုပြင်ပြောင်းလဲခြင်းနှင့် ပတ်သက်၍ အသိပညာပေးဆွေးနွေးပွဲကို စည်ကားသိုက်မြိုက်စွာ ကျင်းပပြုလုပ်ခဲ့သည်။
အဆိုပါ ဆွေးနွေးပွဲတွင် မူးယစ်ဆေးစွဲသူများပြန်လည်ထူထောင်ရေးအသင်း(မြန်မာ)ဗဟို ဥက္ကဋ္ဌ ဦးစံရှိန်က ပွဲကျင်းပပြုလုပ်ရခြင်းနှင့် ပတ်သက်၍ ရှင်းလင်းပြောကြားခဲ့ပြီး တိုင်းဒေသကြီး သစ်တောနှင့်စွမ်းအင်ဝန်ကြီး (ငြိမ်း) (ပထမအကြိမ်-ရန်ကုန်တိုင်းဒေသကြီးအစိုးရအဖွဲ့) ဒေါက်တာကျော်စိုးက မူးယစ်ဆေးဖြတ်ပြီးသူများအား စိတ်ပိုင်း ဆိုင်ရာပြုပြင်ပြောင်းလဲခြင်းနှင့် ပတ်သက်၍ အကျယ်တဝင့် အသိပညာပေး ရှင်းလင်းဆွေးနွေးခဲ့သည်။ ထို့နောက် ဆွေးနွေးပွဲသို့ တက်ရောက်လာကြသည့် မူးယစ်ဆေးဖြတ် သင်တန်းသားများက စိတ်ပိုင်းဆိုင်ရာ ပြုပြင်ပြောင်းလဲ ရာတွင် လိုက်နာကျင့်ကြံနေထိုင်ရမည့် အပြုအမူများနှင့် ပတ်သက်၍ သိရှိလိုသည်များကို မေးမြန်းခဲ့ကြရာ တိုင်း ဒေသကြီး သစ်တောနှင့်စွမ်းအင်ဝန်ကြီး (ငြိမ်း) ဒေါက်တာကျော်စိုးက ပြန်လည်ရှင်းလင်းဖြေကြားပေးခဲ့သည်။
မူးယစ်ဆေးစွဲသူများ ပြန်လည်ထူထောင်ရေးအသင်း(မြန်မာ)ဗဟိုသည် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန လက်အောက်ရှိ ပြန်လည်ထူထောင်ရေးဦးစီးဌာနမှ လေ့ကျင့်မွေးထုတ်ထား သော စေတနာ့ဝန်ထမ်းမူးယစ်ကြီးကြပ်ရေးမှူးများနှင့် ဖွဲ့စည်းထားသည့် အသင်းအဖွဲ့တစ်ခုဖြစ်ပြီး အဆိုပါအသင်း အနေဖြင့် မေတ္တာစံအိမ်မှ မူးယစ်ဆေးဖြတ် သင်တန်းသားများအား ရုပ်ပိုင်း ၊ စိတ်ပိုင်းဆိုင်ရာများ ဖွံဖြိုးတိုးတက်မှု ရရှိစေရန်အတွက် ရည်ရွယ်၍ အသိပညာရှင် ၊ အတတ်ပညာရှင် ၊ ဌာနဆိုင်ရာများနှင့် သက်ဆိုင်ရာအဖွဲ့အစည်းများနှင့် ပူးပေါင်း၍ အသိပညာပေးဆွေးနွေးဟောပြောပွဲများကို စဉ်ဆတ်မပြတ် ဆောင်ရွက်ပေးလျက်ရှိကြောင်း သတင်းရရှိပါ သည်။
နိုင်လင်းအောင်
https://t.me/MyanmarNationalPost
No comments:
Post a Comment