မြောင်းမြမြို့၊ အမှတ်(၆)အခြေခံပညာအထက်တန်းကျောင်းမှ အရိုင်းအစိုင်း ကျောင်းသူများကိစ္စ ဌာနဆိုင်ရာစစ်ဆေးရေးအဖွဲ့ဖြင့် စစ်ဆေးနေဟုဆို

နေပြည်တော်၊ ဇွန် ၁၉

မြောင်းမြမြို့၊ အမှတ်(၆)အခြေခံပညာအထက်တန်းကျောင်းမှ အရိုင်းအစိုင်း ကျောင်းသူများက အုပ်စုဖွဲ့၍ အနိုင်ကျင့်စော်ကားသောကိစ္စ ရုပ်သံနှင့် ပတ်သက်၍ မြောင်းမြခရိုင် ပညာရေးမှူး ဦးဌေးဝင်း ဥက္ကဋ္ဌအဖြစ်ဆောင်ရွက်သော ဌာနဆိုင်ရာစစ်ဆေးရေးအဖွဲ့ဖြင့် ဖြစ်စဉ်အား စစ်ဆေးဆောင်ရွက်လျက်ရှိပါကြောင်း ပညာရေးဝန်ကြီးဌာနမှ ဖြေကြားထားသည်။

ပညာရေးဝန်ကြီးဌာန၏ ဖြေကြားချက်တွင် "ဧရာဝတီတိုင်းဒေသကြီး၊ မြောင်းမြမြို့၊ အမှတ်(၆)အခြေခံပညာအထက်တန်းကျောင်း ၏ ၁၈-၆-၂၀၂၅ ရက်နေ့တွင် Social media ပေါ်တွင် ပျံ့နှံ့နေသော ကျောင်းသူများ ရန်ဖြစ်နေသည့် ဗီဒီယိုဖိုင်သည် ၂၀၂၄-၂ဝ၂၅ ပညာသင်နှစ် ၁၈-၁၁-၂၀၂၄ ရက်နေ့ ကျောင်းချိန်ပြင်ပတွင် ဖြစ်ပွားခဲ့သော ဗီဒီယိုဖိုင် ဖြစ်ကြောင်း၊ အဆိုပါကိစ္စနှင့်ပတ်သက်၍ ၁၉-၁၁-၂ဝ၂၄ ရက်နေ့တွင် ကျောင်းစည်းကမ်းထိန်းသိမ်းရေးအဖွဲ့မှ ရန်ဖြစ်သော ကျောင်းသူနှင့် အုပ်ထိန်းသူ မိဘများကိုခေါ်ယူတွေ့ဆုံပြီး မေးမြန်းစစ်ဆေးခြင်းများ ဆောင်ရွက်ခဲ့ပါကြောင်း၊ ဗီဒီယိုဖိုင်တွင် ပါရှိသော အရိုက်ခံရသည့် Grade-6 ကျောင်းသူအား ရိုက်နှက်ခဲ့သည့် Grade-7 နှင့် Grade-9 ကျောင်းသူ(၂)ဦးတို့အား သေချာစွာ စစ်ဆေးမေးမြန်းပြီး အရိုက်ခံရသည့်ကျောင်းသူမှာ နစ်နာသူဖြစ်၍ အရေးယူဆောင်ရွက်ခဲ့ခြင်း မရှိပါကြောင်း၊ ရိုက်နှက် ခဲ့သည့် Grade-7 နှင့် Grade-9 ကျောင်းသူ(၂)ဦးနှင့် ဖြစ်စဉ်အား ဗီဒီယိုရိုက်ပေးသော Grade-7 ကျောင်းသားတို့အား ကျောင်းစည်းကမ်းဖောက်ဖျက်ခြင်းကြောင့် ကျောင်းစည်းကမ်းထိန်းသိမ်းရေး အဖွဲ့က အုပ်ထိန်းသူမိဘများထံ ပြန်လည်အပ်နှံခဲ့ပါကြောင်းနှင့် နောက်နောင် ယခုကဲ့သို့ကိစ္စမျိုး ထပ်မံ မဖြစ်စေရန် အသိပေး၍ လက်မှတ်ရေးထိုးစေခဲ့ကြောင်း ဖြေကြားထားသည်။

ယခု ဖြစ်စဉ်သည် ၂၀၂၅-၂၀၂၆ ပညာသင်နှစ်တွင် ဖြစ်ပွားခဲ့ခြင်းမဟုတ်ဘဲ ယခုကဲ့သို့ ပြဿနာမျိုး ထပ်မံမဖြစ်ပွားစေရန် ကျောင်းစည်းကမ်းအတိုင်း ဆောင်ရွက်နေပါကြောင်းနှင့် စုံစမ်းဆဲ အမည်မသိ အကောင့်(Account)တစ်ခုက ယခင်နှစ် ဗီဒီယိုဖိုင်အား ၁၈-၆-၂ဝ၂၅ ရက်နေ့ တွင် Social media ပေါ်သို့ ထပ်မံတင်ပြခဲ့ခြင်းသာ ဖြစ်ကြောင်း၊ ဧရာဝတီတိုင်းဒေသကြီး၊ မြောင်းမြမြို့၊ အမှတ်(၆)အခြေခံပညာအထက်တန်း ကျောင်းမှ ကျောင်းသူများ ၁၈-၁၁-၂ဝ၂၄ရက်နေ့တွင် ရန်ဖြစ်သည့်ဗီဒီယိုဖိုင် Social media ပေါ်၌ ၁၈-၆-၂ဝ၂၅ ရက်နေ့တွင် ပျံ့နှံ့နေသည့်ကိစ္စနှင့်စပ်လျဉ်း၍ ၁၉-၆-၂၀၂၅ ရက်နေ့တွင် မြောင်းမြခရိုင် ပညာရေးမှူး ဦးဌေးဝင်း ဥက္ကဋ္ဌအဖြစ်ဆောင်ရွက်သော ဌာနဆိုင်ရာစစ်ဆေးရေးအဖွဲ့ဖြင့် ဖြစ်စဉ်အား စစ်ဆေးဆောင်ရွက်လျက်ရှိပါကြောင်း ဖြေကြားထားသည်။

ပညာရေးဝန်ကြီးဌာနမှ ပြန်လည်ဖြေကြားခြင်း မပြုမီ ပညာရေးဝန်ကြီးဌာန၏ ထုတ်ပြန်ချက်ဟု မမှန်မကန် ရေးသား၍ လူမှုကွန်ရက်ပေါ် ဖြန့်ဝေထားသည်စာမှာလည်း အများပြည်သူကြား ပျံ့နှံ့လျက်ရှိသည်။

https://t.me/MyanmarNationalPost