ဂျပန်မှာ အထက်လွှတ်တော်ရွေးကောက်ပွဲအတွက် မဲပေး

ဂျပန်နိုင်ငံတစ်ဝန်း ပြည်သူတွေဟာ အထက်လွှတ်တော်ရွေးကောက်ပွဲအတွက် မဲပေးနေကြပါတယ်။ အာဏာရညွန့်ပေါင်းအဖွဲ့အနေနဲ့ အရင်နှစ်က အောက်လွှတ်တော်မှာ အမတ်နေရာအများစုကို ဆုံးရှုံးခဲ့ပြီးနောက် အခုတစ်ကြိမ် ရွေးကောက်ပွဲမှာ အမတ်နေရာအများစုကို ထိန်းထားနိုင်မလားဆိုတဲ့အပေါ် အာရုံစိုက်မှုတွေ ရှိနေပါတယ်။

ဝေးလံခေါင်သီတဲ့ ကျွန်းလို နေရာတွေက လွဲရင် တနင်္ဂနွေနေ့ မနက် ၇ နာရီမှာ မဲပေးမှု စတင်ခဲ့ပြီး မဲရုံတွေကို ည ၈ နာရီအထိ ဖွင့်လှစ်ထားပါတယ်။ တစ်နိုင်ငံလုံးမှာ မဲရုံပေါင်း ၄၄,၀၀၀ ကျော် ရှိပါတယ်။

ကြိုတင်မဲပေးတဲ့ မဲဆန္ဒရှင် ၂၁ သန်းကျော် ရှိပါတယ်။ ဒါဟာ မဲပေးဖို့ စာရင်းသွင်းခဲ့သူအရေအတွက် စုစုပေါင်းရဲ့ ၂၀ ရာခိုင်နှုန်းကျော် ဖြစ်ပြီး ပြီးခဲ့တဲ့ ၃ နှစ်ကထက် ၅ သန်းကျော် ပိုများပါတယ်။

အထက်လွှတ်တော်မှာ အမတ်နေရာ ၂၄၈ ခု ရှိပြီး အဲဒီအထဲက ထက်ဝက်စာအတွက် ၃ နှစ် ၁ ကြိမ် ရွေးကောက်ပွဲပြုလုပ်ပါတယ်။

အခုတစ်ကြိမ်မှာ အမတ်နေရာပေါင်း ၁၂၅ ခုအတွက် ယှဉ်ပြိုင်ကြမှာ ဖြစ်ပြီး အဲဒီအထဲမှာ ၂၀၂၂ ခုနှစ်က ရွေးကောက်တင်မြှောက်ခံခဲ့ရတဲ့ လွှတ်တော်အမတ်တစ်ဦးရဲ့ လစ်ဟင်းသွားတဲ့ နေရာလည်း ပါဝင်ပါတယ်။

ကိုယ်စားလှယ်လောင်း ၅၀၀ ကျော်ဟာ ရွေးကောက်ပွဲမဲဆန္ဒနယ်တွေမှာ အမတ်နေရာတစ်ခု ရရှိဖို့ ဒါမှမဟုတ် အချိုးကျကိုယ်စားပြုစနစ်နဲ့ ယှဉ်ပြိုင်နေကြပါတယ်။

နေထိုင်မှု အသုံးစရိတ် မြင့်မားလာခြင်းနဲ့ ပတ်သက်ပြီး အချေအတင် ပြောဆိုမှုတွေ ရှိနေပါတယ်။ တခြား သိသာထင်ရှားတဲ့ အကြောင်းအရာတွေထဲမှာတော့ လူမှုဖူလုံရေး၊ လူဦးရေကျဆင်းမှုနဲ့ နိုင်ငံခြားရေးမူဝါဒဆိုင်ရာ ကိစ္စရပ်တွေ ပါဝင်ပါတယ်။

အာဏာရ Liberal Democratic Party နဲ့ သူ့ရဲ့ အငယ်တန်းညွန့်ပေါင်းမိတ်ဖက် Komeito ဟာ အခုတစ်ကြိမ်ရွေးကောက်ပွဲမှာ ခက်ခဲတဲ့ အခြေအနေနဲ့ ရင်ဆိုင်ရပါတယ်။ သူတို့ဟာ အရင်နှစ်က အောက်လွှတ်တော်မှာ အမတ်နေရာအများစုကို ဆုံးရှုံးခဲ့ပါတယ်။ အခုတစ်ကြိမ် အထက်လွှတ်တော်ရွေးကောက်ပွဲမှာ အမတ်နေရာအများစုကို ထိန်းထားဖို့အတွက် သူတို့ဟာ စုစုပေါင်း အမတ်နေရာ ၅၀ ရရှိဖို့ လိုပါတယ်။

Ref - NHK

https://t.me/MyanmarNationalPost