မြစ်သား ၊ ဩဂုတ် ၂၀
မန္တလေးတိုင်းဒေသကြီး၊ ကျောက်ဆည်ခရိုင်၊ မြစ်သားမြို့နယ်တွင် မြန်မာ့လယ်ယာဖွံ့ဖြိုးရေးဘဏ်ခွဲမှ ၂၀၂၅-၂၀၂၆ ခုနှစ်၊ မိုးစပါးစိုက်ဧက (၃၅၆) ဧကအတွက် လမ်းဂွကျေးရွာအုပ်စုရှိ တောင်သူလယ်သမားများအား ယနေ့နံနက် ၉ နာရီခွဲက အဆိုပါဘဏ်ခွဲ၌ စိုက်ပျိုးစရိတ်များ ဆက်လက်ထုတ်ချေးပေးခဲ့ကြောင်း သိရသည်။
ရှေ့ဦးစွာ စိုက်ပျိုးစရိတ်ချေးငွေများထုတ်ချေးရာတွင် မြစ်သားမြို့နယ် မြန်မာ့လယ်ယာဖွံ့ဖြိုးရေးဘဏ်ခွဲမှ မြို့နယ်မန်နေဂျာ ဒေါ်အေမီမီခန့်က ယခင်နှစ်ချေးငွေကြွေးကျန်အားလုံး ပြန်လည်ပေးဆပ်ပြီးသော တောင်သူများကိုသာ ထုတ်ချေးပေးသွားမည်ဖြစ်ကြောင်းပြောကြားခဲ့ပြီး ၂၀၂၅-၂၀၂၆ခုနှစ်၊ မိုးစပါးစိုက်ပျိုးဧက (၃၅၆) ဧကစိုက်ပျိုးနိုင်ရန်အတွက် လမ်းဂွကျေးရွာအုပ်စုရှိ တောင်သူလယ်သမား(၇၇)ဦး အတွက် စုစုပေါင်းချေးငွေကျပ် ၅၃၄၀၀၀၀၀/- ဆက်လက် ထုတ်ချေးပေးခဲ့ကြောင်း သိရသည်။
စိုက်ပျိုးစရိတ်ချေးငွေယူမည့် တောင်သူများအနေဖြင့် ပုံစံ (၇) အမည်ပေါက်ရှိရမည်ဖြစ်ပြီး၊ ကျေးရွာအလိုက် ဖွဲ့စည်းပေးထားသည့် မိုးစပါးချေးငွေစိစစ်ရေးအဖွဲ့၏ ထောက်ခံချက်၊ အိမ်ထောင်စုစာရင်းနှင့် မှတ်ပုံတင်တို့ပါရှိမှသာ ချေးယူခွင့်ရရှိပြီး မိုးစပါးစိုက် တစ်ဧကလျှင် ကျပ် ၁၅၀၀၀၀/-နှုန်း ချေးပေးခြင်းဖြစ်ကြောင်း မြို့နယ်မြန်မာ့လယ်ယာဖွံ့ဖြိုးရေးဘဏ်ခွဲ တာဝန်ရှိသူတစ်ဦးထံမှသိရသည်။
ဝါဝါမြင့် (မြစ်သား)
https://t.me/MyanmarNationalPost
No comments:
Post a Comment