(၃၁) ကြိမ်မြောက် အာဆီယံပို့ဆောင်ရေးဝန်ကြီးများအစည်းအဝေးနှင့် ဆက်စပ်အစည်းအဝေးများကျင်းပ

နေပြည်တော်၊ နိုဝင်ဘာ ၂၁

ပို့ဆောင်ရေးနှင့်ဆက်သွယ်ရေးဝန်ကြီးဌာနက ဦးဆောင်၍ မြန်မာနိုင်ငံက အိမ်ရှင်အဖြစ် ကျင်းပပြုလုပ်သည့် (၃၁) ကြိမ်မြောက် အာဆီယံ ပို့ဆောင်ရေးဝန်ကြီးများအစည်းအဝေး (31st ASEAN Transport Ministers Meeting – 31st ATM)နှင့် ဆက်စပ်အစည်းအဝေးများကို ယမန်နေ့က နေပြည်တော် Jasmine Hotel ၌ Hybrid Mode ဖြင့် စတင်ကျင်းပရာ နိုင်ငံတော်ဝန်ကြီးချုပ် ဦးညိုစော တက်ရောက်အမှာစကားပြောကြား၍ အခမ်းအနားကို ဖွင့်လှစ်သည်။

ထို့နောက် (၃၁)ကြိမ်မြောက် အာဆီယံပို့ဆောင်ရေးဝန်ကြီးများအစည်းအဝေး အစီအစဉ်အရ ပို့ဆောင်ရေးနှင့်ဆက်သွယ်ရေးဝန်ကြီးဌာန ပြည်ထောင်စုဝန်ကြီးက အမှာစကားပြောကြားရာတွင် သယ်ယူပို့ဆောင်ရေးသည် စီးပွားရေးလုပ်ငန်းများနှင့် ချိတ်ဆက်ပေးခြင်း၊ ကုန်သွယ်မှုလွယ်ကူချောမွေ့စေခြင်း၊ လူမှုစီးပွားဘဝဖွံ့ဖြိုးတိုးတက်စေခြင်းနှင့် ပြည်သူများအချင်းချင်း ပေါင်းစည်းဆက်နွှယ်မှု တိုးမြှင့်ခြင်းတို့တွင် အရေးပါသည့်ကဏ္ဍဖြစ်ကြောင်း၊ လွန်ခဲ့သည့်ဆယ်စုနှစ်များအတွင်း အာဆီယံ၏ ဒေသတွင်းသယ်ယူပို့ဆောင်ရေးကဏ္ဍ ချိတ်ဆက်မှုအားကောင်းလာပြီး ရေရှည်တည်တံ့သော ပို့ဆောင်ရေးကဏ္ဍအဖြစ် ဖော်ဆောင်ရာတွင် သိသာထင်ရှားသော တိုးတက်မှုများရရှိခဲ့ကြောင်း၊ ယင်းတိုးတက်မှုများသည် သယ်ယူပို့ဆောင်ရေးကဏ္ဍတွင် အာဆီယံ၏ခေါင်းဆောင်မှု ကိုထင်ဟပ်စေလျက်ရှိပါကြောင်း၊ မိမိတို့သယ်ယူပို့ဆောင်ရေးကဏ္ဍ၏ ကြိုးစားအားထုတ်မှုသည် အာဆီယံပေါင်းစပ်ဆက်နွှယ်မှု မဟာဗျူဟာစီမံကိန်း ၂၀၂၅ နှင့် အာဆီယံစီးပွားရေး အသိုက်အဝန်း လမ်းပြမြေပုံပါမျှော်မှန်းချက်များကို အထောက်အကူဖြစ်စေပါကြောင်း။

ယခုနှစ်သည် ကွာလာလမ်ပူ ပို့ဆောင်ရေးမဟာဗျူဟာစီမံကိန်း၏ အပြီးသတ်ကာလဖြစ်သကဲ့သို့ အာဆီယံပို့ဆောင်ရေး စီမံကိန်း(၂၀၂၆-၂၀၃၀)နှင့်အညီ ပူးပေါင်းဆောင်ရွက်မှုအသစ်များ စတင် ဆောင်ရွက်မည့်ကာလဖြစ်ကြောင်း၊ ယနေ့အစည်းအဝေးတွင် ဆွေးနွေးချက်များသည်လာမည့် ဆယ်စုနှစ်အတွင်း အာဆီယံပို့ဆောင်ရေးကဏ္ဍဖွံ့ဖြိုးတိုးတက်ရေးအတွက် မဟာဗျူဟာမြောက် ဦးတည်ချက်များချမှတ်ရာတွင် များစွာအရေးပါမှုရှိကြောင်း၊ မိတ်ဖက်များနှင့် ထိတွေ့ဆက်ဆံမှု၊ စည်းလုံးညီညွတ်မှု၊ အပြန်အလှန် လေးစားမှုစသည့်အခြေခံမူများနှင့်အညီ ပြည်သူများအားလုံးအတွက် သာယာဝပြော၍ခံနိုင်ရည်ရှိပြီး အားလုံးပါဝင်နိုင်သော သယ်ယူပို့ဆောင်ရေးစနစ်အား ပုံဖော်နိုင်မည်ဟုယုံကြည်ပါကြောင်း၊ ယခုအစည်းအဝေးနှင့်အတူ ဆွေးနွေးဖက်နိုင်ငံများဖြစ်သည့် တရုတ်နိုင်ငံ၊ ဂျပန်နိုင်ငံ၊ ကိုရီးယားနိုင်ငံတို့နှင့် ဆက်စပ်အစည်းအဝေးများ ကျင်းပသွားမည်ဖြစ်ကြောင်း။

ပို့ဆောင်ရေးကဏ္ဍ ချိတ်ဆက်မှုကို အားကောင်းစေပြီး ပြည်သူများအတွက် ရေရှည်အကျိုး ဖြစ်ထွန်းစေမည့် ခိုင်မာသောရလဒ်များကို ဖော်ဆောင်ပေးနိုင်ရန် စည်းလုံးညီညွတ်မှုနှင့် ချစ်ကြည်ရင်းနှီးမှု စိတ်ဓာတ်နှင့် အတူတကွပူးပေါင်းဆောင်ရွက်ရန် တိုက်တွန်းပြောကြားကာ အစည်းအဝေးကို အတည်ပြုထား သည့်အစီအစဉ် ၁၁ ခုဖြင့် ကျင်းပသည်။

အာဆီယံပို့ဆောင်ရေးဝန်ကြီးများက ၂၀၂၆ ခုနှစ်အတွင်း ဆောင်ရွက်မည့်လုပ်ငန်းများ၊ ကွာလာလမ်ပူ သယ်ယူပို့ဆောင်ရေးစီမံကိန်း (၂၀၁၆-၂၀၂၅) အပြီးသတ်အစီရင်ခံစာ၊ အာဆီယံပို့ဆောင်ရေးစီမံကိန်း (၂၀၂၆-၂၀၃၀)၊ သင်္ဘောမှစွန့်ပစ်ပစ္စည်းစီမံခန့်ခွဲမှုဆိုင်ရာ အာဆီယံဒေသတွင်း မဟာဗျူဟာ၊ အာဆီယံလျှစ်စစ် သုံးယာဉ်အကောင်အထည်ဖော်ရေးလမ်းပြမြေပုံ၊ ဒစ်ဂျစ်တယ်စနစ်ဖြင့် အများပြည်သူသယ်ယူပို့ဆောင်ရေးနှင့် အိမ်တိုင်ရာရောက်ဝန်ဆောင်မှု ပေးအပ်ရေးလုပ်ငန်းဆိုင်ရာများ၊ ရထားပို့ဆောင်ရေးလုပ်ငန်း အပြန်အလှန်လုပ်ငန်းဆောင်ရွက်မှု တိုးမြှင့်ခြင်းဆိုင်ရာ မဟာဗျူဟာ စီမံကိန်းများအား အတည်ပြုကြသည်။

ဆက်လက်၍ (၂၄) ကြိမ်မြောက် အာဆီယံ-တရုတ် ပို့ဆောင်ရေးဝန်ကြီးများ အစည်းအဝေး (24th ASEAN and China Transport Ministers Meeting) ကိုလည်းကောင်း၊ (၂၃) ကြိမ်မြောက် အာဆီယံ-ဂျပန် ပို့ဆောင် ရေးဝန်ကြီးများ အစည်းအဝေး (23rd ASEAN and Japan Transport Ministers Meeting) ကိုလည်းကောင်း၊ (၁၆) ကြိမ်မြောက် အာဆီယံ-ကိုရီးယား ပို့ဆောင်ရေးဝန်ကြီးများ အစည်းအဝေး (16th ASEAN and Republic of Korea Transport Ministers Meeting) ကိုလည်းကောင်း အစီအစဉ်များအတိုင်း ကျင်းပကာ အာဆီယံ-တရုတ် သယ်ယူပို့ဆောင်ရေးပူးပေါင်းဆောင်ရွက်မှုမဟာဗျူဟာစီမံကိန်း (၂၀၂၆-၂၀၃၅)၊ အာဆီယံ-ဂျပန် ပူးပေါင်းဆောင်ရွက်မှုလုပ်ငန်းစဉ် (၂၀၂၅-၂၀၂၆) နှင့် အာဆီယံ-ကိုရီးယား သယ်ယူပို့ဆောင်ရေး လမ်းပြမြေပုံ (၂၀၂၆-၂၀၃၀)များအား အတည်ပြုခဲ့ကြပြီး ညနေပိုင်းတွင် အစည်းအဝေးများအားလုံး ပြီးဆုံးခဲ့သည်။

မြန်မာနိုင်ငံက အိမ်ရှင်အဖြစ် လက်ခံကျင်းပသည့် (၃၁)ကြိမ်မြောက် အာဆီယံပို့ဆောင်ရေးဝန်ကြီးများ အစည်းအဝေးနှင့် ဆက်စပ်အစည်းအဝေးများသို့ အာဆီယံအဖွဲ့ဝင်နိုင်ငံများနှင့် ဆွေးနွေးဖက်နိုင်ငံများမှ ဝန်ကြီးများ၊ အာဆီယံအထွေထွေအတွင်းရေးမှူးချုပ်၊ ဘာသာရပ်ဆိုင်ရာအဆင့်မြင့်အရာရှိကြီးများ အပါအဝင် စုစုပေါင်း ၁၈၇ ဦး ပါဝင်တက်ရောက်ခဲ့ကြောင်းနှင့် ၂၀၂၆ ခုနှစ်တွင် အစည်းအဝေးများကို ဖိလစ်ပိုင်နိုင်ငံမှ အိမ်ရှင်အဖြစ် လက်ခံကျင်းပသွားမည်ဖြစ်ကြောင်း သတင်းရရှိသည်။

https://t.me/MyanmarNationalPost