ပြည်ခိုင်ဖြိုးပါတီ ရွေးကောက်ပွဲကြေညာစာတမ်း ရှင်းလင်းခြင်းနှင့် ပဲခူးတိုင်းဒေသကြီး(အရှေ့) လွှတ်တော်ကိုယ်စားလှယ်လောင်းများ မိတ်ဆက်အပ်နှံခြင်းအခမ်းအနား ကျင်းပ

ပဲခူး၊ ဒီဇင်ဘာ ၁၈

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ဥက္ကဋ္ဌ ဦးခင်ရီသည် ၁၇-၁၂-၂၀၂၅ ရက်နေ့ နံနက် ၀၉ ၄၅ အချိန်တွင် ပဲခူးတိုင်းဒေသကြီး၊ အားကစားခန်းမ၌ ကျင်းပပြုလုပ်သည့် ပါတီ၏ရွေးကောက်ပွဲကြေညာစာတမ်း ရှင်းလင်းခြင်းနှင့် လွှတ်တော်ကိုယ်စားလှယ်လောင်းများ မိတ်ဆက်အပ်နှံခြင်းအခမ်းအနားသို့ တက်ရောက်ခဲ့သည်။

အခမ်းအနားကို တက်ရောက်လာသူအားလုံးက နိုင်ငံတော်အလံအလေးပြု၍ နိုင်ငံတော်သီချင်းသီဆိုဖွင့်လှစ်ပြီး ပဲခူးတိုင်းဒေသကြီး(အရှေ့)မှ ပါတီကိုယ်စားပြု ဝင်ရောက်ယှဉ်ပြိုင်ရွေးချယ်ကြမည့် လွှတ်တော်အသီးသီးမှ ကိုယ်စားလှယ်လောင်းများအား ပြည်သူများထံသို့ တစ်ဦးချင်း မိတ်ဆက်အပ်နှံသည်။ 

ထို့နောက် ပါတီဥက္ကဋ္ဌ ဉီးခင်ရီက အမှာစကားပြောကြားရာ “မကြာမီ ကျင်းပပြုလုပ်မည့် ပါတီစုံဒီမိုကရေစီ အထွေထွေရွေးကောက်ပွဲ၏ ထူးခြားမှုနှင့် အရေးကြီးမှု၊ ပြည်သူတစ်ဉီး၏ တာဝန်ဝတ္တရားတစ်ခုဖြစ်သည့် မပျက်မကွက် မဲပေးရန်လိုအပ်မှု၊ မိမိမဲပေးရမည့် ပုဂ္ဂိုလ်နှင့်အဖွဲ့အစည်းအား အသည်းကြားက မဲတစ်ပြားဆိုတာထက် ဦးနှောက်ဖြင့် သေချာစဉ်းစားချင့်ချိန်၍ မဲပေးရန်လိုကြောင်း၊ အတွေ့အကြုံရှိသူ လုပ်ကိုင်ဆောင်ရွက်ခဲ့ဘူးသောသူ လုပ်ကိုင်လိုစိတ်ရှိသောသူ ပညာတတ်သောသူနှင့် အင်အားတောင့်တင်းခိုင်မာသော အဖွဲ့အစည်းရှိသောသူများကို ရွေးချယ်မဲပေးရန်လိုကြောင်း၊ အဆိုပါအချက်များဖြင့် ကိုက်ညီမှုရှိသူများသည် ယခု ပဲခူး(အရှေ့) ပြည်ခိုင်ဖြိုးပါတီတွင် များစွာရှိကြောင်း၊ ပြည်ခိုင်ဖြိုးပါတီကိုသာ စိတ်ချယုံကြည်စွာ မဲပေးကြရန်” ပြောကြားသည်။ 

ဆက်လက်ပြီး ပါတီဥက္ကဋ္ဌ ဦးခင်ရီက လူငယ်၊ အမျိုးသမီး၊ တောင်သူလယ်သမား၊ အလုပ်သမား၊ ကုန်ဈေးနှုန်း၊ ကျန်းမာရေး၊ ပညာရေးကဏ္ဍများအပါအဝင် ပါတီမှချမှတ်ထားသော အာမခံချက်များအား အသေးစိတ်ရှင်းလင်းပြောကြားပါသည်။ ၎င်းနောက် ပါတီဥက္ကဋ္ဌက ပဲခူးတိုင်းဒေသကြီး(အရှေ့)အတွက် အောင်နိုင်ရေးအလံအား ပေးအပ်ရာ ဗဟိုအလုပ်အမှုဆောင် ဦးလှသိန်း၊ ပဲခူးတိုင်းဒေသကြီး(အရှေ့)ဥက္ကဋ္ဌ ဦးရဲမြင့်ထွန်း၊ ပဲခူးမြို့နယ် တိုင်းဒေသကြီးလွှတ်တော်ကိုယ်စားလှယ်လောင်း ဦးမျိုးဆွေဝင်းတို့က လက်ခံယူခဲ့ပြီး အောင်နိုင်ရေးသီချင်းနှင့် ကြွေးကြော်သံများအား ဟစ်ကြွေးပြီး နေ့လည် ၁၁၄၅ အချိန်တွင် အခမ်းအနား အောင်မြင်စွာပြီးမြောက်ခဲ့သည်။

အဆိုပါ ရွေးကောက်ပွဲကြေညာစာတမ်း ရှင်းလင်းခြင်းနှင့် ပဲခူးတိုင်းဒေသကြီး(အရှေ့) လွှတ်တော်ကိုယ်စားလှယ်လောင်းများ မိတ်ဆက်အပ်နှံခြင်းအခမ်းအနားသို့ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ဥက္ကဋ္ဌ ဦးခင်ရီ၊ ဗဟိုအလုပ်အမှုဆောင် ဦးလှသိန်း၊ ပဲခူးတိုင်းဒေသကြီး(အရှေ့) ပါတီဥက္ကဋ္ဌ ဦးရဲမြင့်ထွန်း၊ ပဲခူးမြို့နယ် တိုင်းဒေသကြီးလွှတ်တော်ကိုယ်စားလှယ်လောင်း ဦးမျိုးဆွေဝင်း၊ ပဲခူးတိုင်းဒေသကြီး(အနောက်) ပါတီဥက္ကဋ္ဌ ဦးအောင်ချိုဦး၊ ဗဟိုအလုပ်အမှုဆောင် ဒေါ်ခင်ရွှေမြင့်၊ ပါတီကိုယ်စားပြု ဝင်ရောက်ယှဉ်ပြိုင်ကြမည့် လွှတ်တော်ကိုယ်စားလှယ်လောင်းများ၊ ဖိတ်ကြားထားသောအဖွဲ့အစည်းများမှ ဧည့်သည်တော်များ၊ ပါတီဝင်များနှင့် ပြည်ခိုင်ဖြိုးပါတီကို ချစ်ခင်ဝန်းရံကြသူများ၊ ပါတီတာဝန်ရှိသူများ၊ စုစုပေါင်းအင်အား (၅၀၀၀)ကျော် တက်ရောက်ခဲ့ကြကြောင်း သတင်းရရှိသည်။

#MNP #News #2025Election