ထန်းတပင်မြို့နယ်၌ (၃၈)ဖြာမင်္ဂလာတရားတော်နှင့် ဗုဒ္ဓဝင်နည်းပြဆရာဖြစ်သင်တန်း အမှတ်စဉ်(၁) ဖွင့်လှစ်

ထန်းတပင်(ရန်ကုန်)၊ ဖေဖော်ဝါရီ ၁၆

ရန်ကုန်တိုင်းဒေသကြီး၊ ထန်းတပင်မြို့နယ် ဗုဒ္ဓဘာသာကလျာဏယုဝအသင်း(YMBA)မှ ကြီးမှူး၍ (၃၈)ဖြာမင်္ဂလာတရားတော်နှင့် ဗုဒ္ဓဝင်နည်းပြဆရာဖြစ်သင်တန်း အမှတ်စဉ်(၁)ကို ယနေ့နံနက်ပိုင်းက ကျောင်းကုန်းကျေးရွာရှိ ရတနာသိင်္ဂီကျောင်းတိုက်ကြီးတွင် ဖွင့်လှစ်ခဲ့ကြသည်။

သင်တန်းဖွင့်ပွဲတွင် မြို့နယ်သံဃနာယကအဖွဲ့ ဒုတိယဥက္ကဋ္ဌ စိန္တိတာရာမနိဗ္မိတာရုံကျောင်းတိုက် ဆရာတော် ဘဒ္ဒန္တစိန္တိတထံမှ ငါးပါးသီလခံယူဆောက်တည်ခဲ့ကြပြီး ထန်းတပင်မြို့နယ် ဗုဒ္ဓဘာသာကလျာဏယုဝအသင်း (YMBA) ၏ သြဝါဒါစရိယဆရာတော် ဘဒ္ဒန္တသီလာစာရက သြဝါဒကထာမြွတ်ကြားခဲ့သည်။ ဆက်လက်၍ ရန်ကုန်တိုင်းဒေသကြီး ဗုဒ္ဓဘာသာကလျာဏယုဝအသင်း (YMBA) တွဲဖက်အတွင်းရေးမှူး ဦးစိုးဝင်းနှင့် မြို့နယ်စီမံခန့်ခွဲရေးနှင့်အုပ်ချုပ်ရေးကော်မတီဥက္ကဋ္ဌ ဦးနိုင်နိုင်ဦးတို့က အမှာစကားများပြောကြားခဲ့ပြီး ထန်းတပင်မြို့နယ် ဗုဒ္ဓဘာသာကလျာဏယုဝအသင်း (YMBA) ဥက္ကဋ္ဌ ဦးသန်းဝင်းက (၃၈)ဖြာမင်္ဂလာတရားတော်နှင့် ဗုဒ္ဓဝင်နည်းပြဆရာဖြစ်သင်တန်း အမှတ်စဉ်(၁) ဖွင့်လှစ်ရခြင်းနှင့်ပတ်သက်၍ ရှင်းလင်းပြောကြားခဲ့သည်။

(၃၈)ဖြာမင်္ဂလာတရားတော်မြတ်များကို လိုက်နာကျင့်သုံးတတ်စေရန်ရည်ရွယ်၍ အဆိုပါသင်တန်းကို သုံးရက်ကြာဖွင့်လှစ်ခြင်းဖြစ်ပြီး သင်တန်းသို့ သင်တန်းသား၊ သင်တန်းသူ (၁၂၀)ဦးတို့ တက်ရောက်လျက်ရှိကြကြောင်း သိရသည်။

ဇင်မင်းထိုက် (ထန်းတပင်)

#News #MNP