နည်းပညာဆိုင်ရာ စွန့်စား ရမှုများစွာနှင့်အတူ ပြည်သူများ၏ လိုအပ်ချက်ကို ကြိုးစားဖြည့်ဆည်းနေသည့် လျှပ်စစ်ဓာတ်အားထုတ်လုပ်ဖြန့်ဖြူးပေးနေမှု အခြေအနေများအား လျှပ်စစ်နှင့်စွမ်းအင်ဝန်ကြီးဌာန က ပြည်သူများသို့ အသိပေးတင်ပြ

နေပြည်တော်၊ မေ ၂၄

လျှပ်စစ်နှင့်စွမ်းအင်ဝန်ကြီးဌာနသည် ပြည်သူများ လျှပ်စစ်နှင့်စွမ်းအင်ကို ကြောင့်ကြကင်းစွာ အသုံးပြုနိုင်ရေးအတွက် ကြိုးပမ်းဆောင်ရွက်လျက်ရှိသည့် အခြေအနေများကို ပြည်သူများသို့ အသိပေးတင်ပြထားရာ အကြမ်းဖက်သမားများ၏ ဖျက်ဆီးမှုများအား ပြင်ဆင်သည့် အချိန်များတွင် သွားရောက်ရာ လမ်းတစ်လျှောက်မိုင်း ထောင်ထားခြင်း၊ ပြင်ဆင်နေစဉ်လာရောက်နှောင့်ယှက်တိုက်ခိုက်ခြင်း၊ ပြင်ဆင်ပြီး ပြန်မည့် လမ်းတစ်လျှောက်တွင် မိုင်းများ ထောင်ထားခြင်းတို့ကြောင့် အချို့ဝန်ထမ်းများသေဆုံးခြင်း၊ ကိုယ်လက် အင်္ဂါစွန့်လွှတ်ရခြင်း၊ ထိခိုက်ဒဏ်ရာ ရခြင်းတို့ ဖြစ်ပေါ်ခဲ့ရကြောင်း အသိပေးတင်ပြထားသည်။

နိုင်ငံတော်အနေဖြင့် လျှပ်စစ်ဓာတ်အား တိုးမြှင့်ထုတ်လုပ်နိုင်ရန် ရည်ရွယ်၍ ကြိုးပမ်း ဆောင်ရွက်ခဲ့သည့် စီမံကိန်းများအနက် အချို့သည် အမျိုးမျိုးသော နှောင့်ယှက်ဟန့်တားမှု၊ ပယောဂများကြောင့် အကောင်အထည်ဖော်နိုင်ခဲ့ခြင်းမရှိဘဲ ပြည်သူလူထု လိုအပ်ချက်၏ ... ၇၀ % ခန့်သာ ထုတ်လုပ်ပေးနိုင်လျက်ရှိကြောင်း၊ တစ်ဖက်တွင်လည်း ပြည်သူလူထု၏ သုံးစွဲလိုမှုမှာ နှစ်စဉ် ၁၅ ရာခိုင်နှုန်းခန့် တိုးတက် လာသည်ဖြစ်ရာ ဝန်နှင့်အား မမျှတော့ဘဲ ရုန်းကန်နေရသည့် အခြေအနေဖြစ်ပါကြောင်း၊ လျှပ်စစ်ထုတ်လုပ်မှု၏ ၃.၅ % ခန့်ကို ဓာတ်အားပေးစက်ရုံနှင့် ဓာတ်အားခွဲရုံများတွင် ပြန်လည် အသုံးပြုရပြီး ၄.၅ %ခန့်သည် ရှည်လျားစွာ သွယ်တန်းထားရသည့် မဟာဓာတ်အား လိုင်းကြီးများ တစ်လျှောက် အလိုအလျောက်ဆုံးရှုံးသွားသဖြင့် သုံးစွဲသူ ပြည်သူများထံသို့ ရောက်ရှိချိန်တွင် ထုတ်လုပ်မှု၏ ၈ % ခန့်သည် သဘောသဘာဝအရ လျော့နည်းနေမည်ဖြစ်ကြောင်း၊ ထို့အပြင် အချို့သော ဓာတ်အားထုတ်လုပ်မှု အရင်းအမြစ်များ၊ ဓာတ်အားခွဲရုံများ မဟာဓာတ်အား လိုင်းကြီးများသည် အကြမ်းဖက် ဖျက်ဆီးခံထားရသဖြင့် အပြည့်အဝ အသုံးပြုနိုင်မှု မရှိတော့သည့်အတွက် ကျန်ရှိသည့် ဓာတ်အားခွဲရုံများနှင့် မဟာဓာတ်အားလိုင်းကြီးများသည် ဝန်ပိုများထမ်းဆောင်နေကြရသည် ဖြစ်ရာ နိုင်ငံတော်၏ လျှပ်စစ်ဓာတ်အား ထုတ်လုပ်ဖြန့်ဖြူးမှု ကွန်ယက်ကြီးသည် နည်းပညာဆိုင်ရာ စွန့်စား ရမှုများစွာနှင့်အတူ ပြည်သူများ၏ လိုအပ်ချက်ကို ကြိုးစားဖြည့်ဆည်းနေရသည့် အခြေအနေဖြစ်ကြောင်း အသိပေးတင်ပြထားသည်။

ဖျက်ဆီးခံရမှုများကို မြန်မာ့တပ်မတော်သားများ၊ မြန်မာနိုင်ငံရဲတပ်ဖွဲ့ဝင်များ၏ လုံခြုံရေး အစောင့်အရှောက်နှင့် ပြည်သူများ၏အကူအညီများရယူ၍ လျှပ်စစ်နှင့်စွမ်းအင်ဝန်ကြီးဌာန ဝန်ထမ်း များသည် စွန့်လွှတ်စွန့်စားသော စိတ်ဓာတ်များနှင့် ရာသီ အချိန်မရွေး ပြင်ဆင်ပေးလျက် ရှိကြောင်း၊ ယင်းသို့ ပြင်ဆင်သည့် အချိန်များတွင်လည်း သွားရောက်ရာ လမ်းတစ်လျှောက်မိုင်း ထောင်ထားခြင်း၊ ပြင်ဆင်နေစဉ်လာရောက်နှောင့်ယှက်တိုက်ခိုက်ခြင်း၊ ပြင်ဆင်ပြီး ပြန်မည့် လမ်း တစ်လျှောက်တွင် မိုင်းများ ထောင်ထားခြင်းတို့ကြောင့် အချို့ဝန်ထမ်းများသေဆုံးခြင်း၊ ကိုယ်လက် အင်္ဂါစွန့်လွှတ်ရခြင်း၊ ထိခိုက်ဒဏ်ရာ ရခြင်းတို့ ဖြစ်ပေါ်လျက်ရှိကြောင်း သိရသည်။

ယင်းသို့ဖြစ်ပေါ်နေသည့် အခက်အခဲများကြားမှပင် လျှပ်စစ်နှင့်စွမ်းအင်ဝန်ကြီးဌာနအနေဖြင့် နည်းပညာဆိုင်ရာ အခက်အခဲများကို ဖြေရှင်းကျော်လွှားခြင်း၊ မသမာမှု ဆောင်ရွက်နေခြင်းများကို ဖော်ထုတ်ဖြေရှင်းခြင်းတို့ကို အလေးထားဆောင်ရွက်နေသည့်အတွက် ရေလှောင်တမံများ၏ သိုလှောင်ထားမှုအမှတ် အနိမ့်ဆုံးရောက်ရှိနေသည့် ယခုအချိန်ကာလများတွင်ပင် လျှပ်စစ်ဓာတ် အား တိုးမြှင့်ဖြန့်ဖြူးပေးနိုင်လျက်ရှိကြောင်း၊ နိုင်ငံတော်၏ လျှပ်စစ်နှင့်စွမ်းအင် အရင်းအမြစ်များ၊ အခြေခံ အဆောက်အဦများသည် နိုင်ငံတစ်ဝှမ်း ဖြန့်ကျက်တည်ရှိနေသည်ဖြစ်ရာ ပြည်သူလူထုအနေဖြင့် ဝိုင်းဝန်းကူညီစောင့်ရှောက်ခြင်း၊ လျှပ်စစ်နှင့် စွမ်းအင်ဝန်ကြီးဌာနက အခါအားလျော်စွာ ထုတ်ပြန်သည့် အသိပေးတင်ပြ ချက်များအားဖတ်ရှု၍ လိုက်နာ ဆောင်ရွက်ခြင်းဖြင့် ပူးပေါင်းဆောင်ရွက်ပေးကြပါရန် အသိပေး တင်ပြထားသည်။

#MNP #News